Onesi otayi ka mona uuwanawa meyogopalo

0
229

ONESI – Omukunda Enongo moshikandjohogololo Onesi moshitopolwa Omusati ogwa ningi gumwe gwaandhoka dha pewa iimaliwa opo dhi tungilwe uundjugo ihawu longitha omeya.Etungo lyuundjugo ihaawu longitha omeya wuli omilongo 53, oshitopolwa shelongekidho lyoholomende shokuyogopeka oshowo okugandja omeya momikunda.

Enongo olya tothwamo kelelo lyoshitopolwa okupitila mombelewa yoshikandjohogololo , oshoka ogwo omukunda gumwe ngoka guna aantu ya pumbwa lela uundjugo.Onkambadhala nenge elalakano, okugandja uundjugo komagumbo ngoka geli momahala haga yelulwa. Egumbo kehe momukunda nguka otali ka tungilwa okandjugo.

Mo Namibia omwaalu omunene gwaakalimo yokomikunda sigo oompaka kaguna omahala goku iyakulila ga yogoka nenge tu tye kayena uundjugo. Omolwashika epangelo olya kutha oshinakugwanithwa noku etapo ondungethaneko yokuyogopeka pethimbo lyembo omumvo gwiimaliwa 2010/2011 sigo 2014/2015, sho lya tulapo omwaalu gwoodola obilliona yimwe konyala netata omolwa eyogopeko miitopolwa yayooloka moshilongo ashihe.Kokutya omumvo kehe sigo onuumvo epangelo otali longitha oodola oomiliona N$316 oku gandja omayakulo ngaka.

“Oholomende otayi kambadhala okuhulithapo omukalo gwaantu haya yi kondje miihwa na shaampoka puuyelele” Paavo Hanai, Omunambelewa omukuluntu mokufala omayakulo momikunda pOnesi a ti.

Selma Shooya, omukalimo gumwe gwomEnongo ngoka a pewa nale okandjugo ke okwa pandula noonkondo mwene gwomukunda gwawo oshowo epangelo sho lye mu pe okandjugo. Okwa ti oshali oshiwinayi  no inashi yogoka sho a li hayi kiihwa miihwa . “Omasiku oga hulapo sho twa li hatu yi miihwa uuna twa sa kondje” osho a popi.

Okandjugo haka ihaka longitha omeya  okufala iiyekelwahi kokule na okena iilambo iyali. Uuna shimwe tashi longithwa, oshikalimo shoshilambo oshikwawo otashi kukuta notashi hanagukapo oku etapo uuhoho mboka tawu vulu okulongithwa.Okandjugo okena oluungu lwokupitila ombepo opo nduka lu gandje efudho lya gwana oku kwathela opo iiyekelwahi yi kukute oshowo oku kuthapo ezimba.Okandjugo koludhi nduka hoka haka tungwa konyala oometa omilongo 40 kokule nehala lyomeya okena okatemba koku iyoga komake opo mboka taye ka longitha  ya kale aluhe noku iyoga konima yoku ikwathela.

Uundjugo mbuka ihawu longitha omeya owuna omauwanawa ngaashi ihawu pumbwa omeya okupombako, ohawu vulu okutungwa nuupu, ohawu tungwa wo niitungitho mbyoka tayi adhika pehala lyomomukunda kehe. Uupu okutunga oshowo okukalekapo noku wu opaleka ngele owa yonuka sha. Omukalo guundjugo mbuka otagu longithwa oshoka haantu oyendji yena omeya momikunda dhawo. Oshikwawo otashi kala ishewe oshidhigu  okutula omunino gwomeya noshowo gwonyata momukunda. Iimaliwa yokutungitha okandjugo hoka oyili pevi  oshowo mbyoka yoku ka sila oshimpwiyu, ishewe ihaka pula oshindji oku ka sila oshimpwiyu, na okapu okulongitha.

Uuna pwaana uuyogoki aantu ohaya vulu okukwatwa komavu ngaashi oshimela, typhoid, giardiasis nokolela okutumbulapo dhimwe. Oshikwawo uuna pwaana uuyogoki shika ohashi gumu nayi omudhingoloko, ngaashi enyateko lyoonzo dhomeya.Omolwa oshilonga shika ondhilo yuuntu oya tulululwapo, ishewe iinano oku ya kiihwa oya kuthwapo nomudhingoloko oguli nawa kaakalimo.

Etungo lyuundjugo wuli 123 woludhi nduka pOmindamba mOutapi, Okakukaumbi mOshikuku nOnankandja mOkahao otali ka tameka mbala oshoka mboka ya pewa iilonga mbika oya ulikwa nale.Omayakulo ngaka otaga pewa wo aakalimo momikunda miitopolwa shaKunene nOshana.

LEAVE A REPLY

Please enter your comment!
Please enter your name here