Welwitschias a dhengwa ishewe muudhano Etitano lyayi

0
172

WINDHOEK – Namibia okwa tegelelwa oku ilongekidha nawa omanga inaa ka tsakanena nospana yo Griffons, ya za koSouth Africa, medhingoloko etitatu lyuudhano wekopi lyo Vodacom mEtitano lyomasiku 27 ga Maalitsa nuumvo pokapale kaHage Geingob Stadium.

Ospana ya Namibia yorugby, Welwitschias’ methigathano lyekopi lyaVodacom oya ninga Simon ya Malombo “shitiwa Kwela’ oshoka Metitano lyaziko ndjika oya mvumvagulwa kospana ya South Africa yedhina Puma niitsa 61 -7 pokapale ka Hage Geingob.

Puudhano wa li wa kalwa kaaholi yuudhano oyendji ospana yoPuma ndjoka ya li tayi talelepo oya ulike kutya yo ina yi endela efuu oya enda okutoola iitsa nomukalo kehe tashi vulika. Ospana ndjika oya kala nokuponokela Welwitchias moombinga adhihe naasho ya yi pedhingoloko lyotango oyali komeho niitsa 33 -0.

Nando ongundu yaa yambidhidhi yospana ya Namibia oya li taya igidha muule oku yambidhidha ospana ndjika, Puma okwa tisikile okupuma aaNamibia noku mona oombuthulu megameno lyawo nongeyi okwa tulamo ookoola ngaashi a hala.

Omanga inaa ya ya kokafudho Puma okwa li a tulamo nale omatanga ngoka ha ga tulwa pevi konima yomusinda gwaakondjithi ye geli gatano. Ye ishewe ta thangelemo omatanga gane gomwaangoka gatano.Omanga Namibia okwa ndopa okutulamo nando olyo etanga limwe, unene tuu sho Martin Olivier inaa tulamo openalti ndjoka ya li tayi gandja etegameno kutya Namibia ota kala ena oshitsa omanga inaa ya ka fudhapo.

Okuza kokafudho Puma okwa tsikile nuudhano we ngaashi a li a yi nawo pondje ta pangele apehe kombinga yospana ya Namibia nokwa gwedhako kiitsa ye eta yi thikama pookoola 57 -0.

Welwitschias okwa kala ena etegameno nokonima okwa ka tulamo iitsa itatu mbyoka ya ka ninga iheyali sho etanga lya thangelwamo ku Shawn Kaizemi, naashika osha eta eyalulo li kale ookoola 61-7.

Omudhani gwa Welwitschias’ Eneill Buitendag oye a li uulikwa omudhani omwaanawa muudhano mboka. Welwitschias’ okwa li ishewe a dhengwa niitsa 53-3 kospana yo  Xerox Lions medhingoloko lyotango a dhengelwa megumbo.

LEAVE A REPLY

Please enter your comment!
Please enter your name here