NFA kena oongunga -Rukoro a ti

0
416

WINDHOEK – Aaholi yuudhano wetanga lyokoompadhi otaya fudha nawa sho yu uvu kutya oshiketha shiiyemo shehangano ewiliki lyetanga lyokoompadhi moNamibia[NFA] oshili nawa sigo oompaka.

Aaholi yetanga lyokoompadhi oya uvu nawa sha landula ekwashilipaleko ndyoka lya gandjwa kwAmushangandjayi gwehangano ndika Barry Rukoro.

Rukoro okwa popi ndhika moku yamukula omapulo ega pulwa , kombinga yomuthika gwawo paiyemo ya NFA, sho pena uumbanda kutya otashi vulika ehangano ndika  li ningilwe oondjindikila kehangano ewiliki lyuudhano wetanga lyokoompadhi muuyuni ngele NFA ina gwanithapo iinakugwanithwa ye yokufuta aafutwa hoka ha mono omayakulo ga yooloka.

Omaipulo ngaka oga holoka mokati kaaNamibia sha landula sho ehangano lyokuwilika uudhano wetanga lyokoompadhi lya  Zimbabwe lya indikwa oku kutha ombinga momathigathano gaFIFA molwashoka ndika olina oongunga  sho inaa li futa omahangano ngoka ha ge li pe omayakulo, oshowo sho ndika lya nyengwa okufuta omudheuli nale gwospana yopashigwana yoshilongo shoka.

Oyendji yomaaholi yuudhano wetanga lyokoompadhi oya tila  na ota ya ipula unene ngele pamwe oshinima shika itashi ningilwa wo nehangano ewiliki lyuudhano wetanga lyokoompadhi moNamibia ngaashi shaningilwa ndyoka lyokoZimbabwe, sho nomaliko galyo ga kuthwapo opo ga futile mboka ya li ye li pe omayakulo, ngoka ga kala inaaga futwa.

Rukoro okwa gamene NFA, kombinga yepulo ndika a ti, unene tuu sho taku pulwa kutya omolwashike eliko lyaNFA inaali shangithwa natango nombelewa yokushangitha omaliko okuza tuu nkene NFA a pelwe ombelewa ya tungithwa niimaliwa ya gandjwa kuFIFA omumvo 2006.

“Oshina oku uvikako nawa kutya tse sho twa kuthako ewiliko nelelo lya NFA  momumvo 2006 otwa adha ehangano ndika lina  oongunga tadhi tilitha dhili poodola oomiliona N$3.9 . Onkene osha li tashi kala shaali nawa kombinga yetu okushangitha omaliko gehangano oshoka aayakulwa mboka NFA a li enine oongunga andola oya yuguko omaliko ngoka mbala noku ga landithapo,” osho Rukoro a fatulula.

Omuwiliki ihaa lile kathima koluko guudhano wetanga lyokoompadhi nguka okwa ti ehangano mewiliko lye, ngashingeyi olya yela no kali na nando ongunga yomuntu oshoka olya shunitha oongunga adhihe ndhoka, dha li inaadhi futwa koohotela, komahangano gokulongekidha omalweendo oshowo aagandji yalwe yomayakulo.

Okwa gwedhapo ati NFA okwi ilongekidha ngashingeyi  okushangitha omaliko ge agehe medhina lyehangano lyeinekelo ngaashi osho shuuthwa koFIFA.

“Ewiliko lya NFA olye shipondola oku etapo omukalo omwaanawa gwoku longa niiyemo okuyeleka newiliko ekulu, onkene aaniilonga yehangano ndika ohaya futwa pethimbo, epandulo otali pewa opolgrama yokuyambidhidha pashimaliwa ndjoka tayi wilikwa koFIFA” osho Rukoro a popi uuvite uuntsa.

Olutu oluwiliki luudhano wetanga muuyuni ohalu pe ehangano kehe ewiliki lyuudhano mbuka miilyolongo ayihe konyala oodola dha America omayovi U$250 000 nenge oodola oomiliona mbali nasha miimaliwa ya Namibia okukalekapo eyelekano miiyemo yomahangano omawiliki getanga lyokoompadhi miilyolongo. Rukoro okuna omaipulo unene kombinga yendopo lyospana yopashigwana Brave Warriors okuya komeho okupita momadhingoloko gopetameko  momathigathano gopaigwana . “Ongo ehangano ohatu kanitha iiyemo oyindji haambyoka ashike hayi futwa posheelo uuna aaholi yuudhano taya ka tala etanga ndele naambyoka hayi futwa komahangano goTiivii okuza kuudhano wekopi lyuuni lyoFIFA oshowo ekopi lyiigwana yAfrika CAF AFCON”.

 

LEAVE A REPLY

Please enter your comment!
Please enter your name here