Oshipopiwa shOmuperesidende Hage Geingob: Omuperesidende Hage Geingob ta kondjitha oluhepo

0
310

Ondi uvite nawa oku mu tala amuhe mwa za kiilongo ya yooloka muuyuni osho wo aakwashigwana yetu mboka yaza komahala agehe gEvi lyOmapenda. Onde mu taamba amuhe nawa .

 “Ndika esiku ndyoka lya longekidhwa kOmuwa.Otatu li nyanyukilwa notatu kala nenyanyu mulyo.”

 Esiku ndika ando inali thika andola ka pwali uuthiga weitulemo waa wiliki mboka ya tetekele ndje.Pitika ndje ndi tameke nomuputudhi gwandje , Omukokoli, na He yoshigwana, Hailwa Sam Shafiishuuna Nujoma. Ye ongundja mekondjelomanguluko lya Namibia oshowo omulumentu ngoka eeta ombili koshigwana shali sha vulithwa kiita .

 Omukanka nguka ogwa kolekwa nokunkondopekwa kOmuperesidende nale Hifikepunye Pohamba ngoka okuza omumvo 1962 sigo onena sho oshikako she sha hulu a ende ondjila tayi mu fala kewiliko. Onkene itashi kumitha aaNamibia kutya oye omusindani gwepapa lyUuwiliki miikaha yAfrica hali takumwa Mo Ibrahim Prize for African Leadership.Kokutya ondjambi ndjika otayi koleke kutya tse moNamibia otwa kala tu shishi nale kutya Omuperesidende gwetu okwa gwana okupewa esimaneko netumbaleko moshilongo oshowo pomuthika gwopaigwana.

 Itandi kala wo inaandi tumbula ooFirst Ladies yaali , Meme Penehupifo Pohamba na Meme Kovambo Nujoma. Tangi sho mwa kala ooyina ya Namibia.

Omu na ehala lyowina momitima dhetu na omaiyuvo getu ohaga inyenge uuna omadhina geni ga tumubulwa.

 Onda hala wo okupandula iilyo yoSWAPO Party pomithika adhihe shono ya longo yaana ezimbuko oku kwashilipaleka kutya SWAPO Party oya sindana momahogololo pamwe nOmuulikwa Peresidende gwayo momahogololo gomumvo gwayi.

Onda pandula aantu ya Namibia sho ya pendje oshinakugwanithwa shayela, opo ndi vule okuthikama mpaka nena komeho guuyuni nokugana ngeyi. Otandi gana peha lyaaNamibia ayehe no tandi uvaneke okuyakula aaNamibia ayehe pwaana ngoka ta thigwako nenge pwaana ondjoolola.Kapena omuNamibia ta ka patelwa pondje.

 Omwa li mwa idhidhimike nokuulika ohole onene yoshilongo sheni sho mwa thikama moonkalo oondhigu opo mu ka hogolole nomukalo omupe gwopalusheno. Eitulomo ndyoka mwa li mwa longitha pomahogololo olyo ishewe limwe lye mu eta kokapale kuudhano nena , nomolwashika,Onde mu pandula.

 Onda popya olundji kutya Namibia omunona a valwa kuukuume wOpaigwana, kuume kaayehe oshowo keena uutondwe nando onalye.Omimvo 25 dhapitipo ekondjo lyetu molwemanguluko olya li lya hulupo. Aamati naakadhona ya Namibia oya kondjele eithikameno lya Namibia okuza koombinga adhihe.Otandi pandula wo Omitse dhIilongo adhihe ndhoka tadhi tu talelepo oshowo aatalelipo yOpaigwana mboka ye ya momwaalu omunene, otandi mu pandula omolwa uukuume nuukwanankali weni mboka mwetu ulukile.

 Otashi ka kutha ndje esiku alihe ngele andola ondi hokolole ashihe shoka kehe gumwe gweni nenge iilongo mbyoka mwa kalelapo ya longo monakuziwa oshowo nena.

Omolwa ethimbo lya ngambekwa , I nandi pitikwa ethimbo lya gwana okundjandjukununa nawa nawa kutya iilongo niilongo yeni oya ningila Namibia shike.Shika oshilonga shoku enda nawa oshoka otandi kala nongunga ngele inandi tumbula Iilongo yokomeho pamwe na Nigeria. IIlongo mbyoka ya topola oongamba natse oya humbata omaupyakadhi giiponokela yEpangelo lyOkatongotongo, mbika oye tu pe omahala gokukala  oshowo omakwatho nkene tatu hingi iita yekondjelomanguluko.Otandi indile Aasimanekwa opo ndi tumbule kondandalunde Iilongo mbika Angola na Cuba sho no yo ya thiminike Souh Afric  opo eye poshitaafula  shoonkundathana. Olugodhi lwopo  Cuito Cunavale olwo lwa etitha etulomiilonga lyokatokolitho kIigwana Hangano Okatokolitho 435. Otandi simaneke wo okukalapo Komuperesidende nale gwa Finland Marti Ahtisaari molwokutonatela etulomiilonga lyokatokolitho 435.

Konima yemanguluko , otwa li tuna oku etapo omulandu omupe gwoshilongo  sha manguluka, unene tuu molwashoka shika okwa li sha topagulwa kokatongotongo. Otwa li tuna okuteyapo uutondwe monakuziwa, uutondwe pokati kaaluudhe niilumbu oshowo mokati kaapopi yomalaka ga yoolokathana.

 Otwa tokola opo pu kale edhiminathanepo moNamibia opo pu kale ombili.Otwe shi pondola okutunga oshigwana sha dhiminathanapo, onkalo ompe ya Namibia oya pitilila pedhiminathanepo. Onkalo ndjika ya etwapo omimvo 15 dha piti oya tseyika nawa ongo Ondjodhi yokomumvo 2030. Omimvo omulongo dhotango dhemanguluko otwa li twa tungupo omalutu niikondo yayooloka okuyakula aantu yoshilongo shika oshigundjuka. Uule womimvo omulongo ndhoka dhapitipo Omuperesidende  Pohamba okwa kalekepo omalutu ngoka niikondo mbyoka.

 Emanguluko olya endele pamwe netegameno sho kwa tegelelwa elongo, omayakulo gopaundjolowele, omayakulo kombinga yevi, kombinga yegameno, kombinga yuuyuki, kombinga yemanguluko lyoku inyenga, kombinga yomwenyo oshowo yokumanguluka . Omategameno ogendji ngaka oga gwanithwapo mbala , omanga gamwe omolwa uukwatya wago natango ngaka ota ga tsikile okulongwa nago.Uukwatya wiitegamenwa owu li ngeyi kutya

Kuuwindji waambika tayi gwanithwapo oshowo mbyoka ya tegelelwa ishewe ya halika yi longwe pamuthika gwopombanda. Sho shika oshili mondjila ngaaka.

 Uuthemba uunene mboka ongundu Swapo  opamwe nOmuulikwa Omuperesidende  gwayo ya mono, owa ulike kutya oshigwana oshina einekelo moSwapo nomungame.Oshikwawo shika otashi ulike kutya opena oshindji sha tegelelwa.Konima yomimvo 25 oya hala iikulya, iizalomwa oshowo omahala gokukala. Oya hala  oompito dhiilonga, omagumbo omahwepo oshowo oondya tadhi tungu.Oya hala omuwiliki ngoka ta longo nondjungu oku etela oshigwana uuyamba.

 Oshinakugwanithwa shika otashi kakala oshidhigu okugwanithilapo etegelelo lyomuntu kehe, onkene omashongo getu otaga kala omanene , ihe nando ongawo ondina einekelo lyuudha kutya melongelokumwe  ongomuntu gumwe  otatu ke shi pondola okugwanithapo omahalelao nomategameno ngoka.

 AaNamibia ooyakwetu

Iinima iinene mbyoka ewiliko ndika tali ka tala nokulonga kuyo oyo okuthitika omwaka gomahupilo ngoka tagu adhika moshilongo shetu.Otwe shi pondola okutungapo iiyalo yewiliko na ohatu longitha omilandu omiwanawa  dhomahupilo.Shoka sha pumbiwa opo oshilongo shizeko  osha kwatelamo,ekotampango ewanawa, ombili nuudemokoli.Ihe otu shishi nawa kutya aantu ihaya li  ekotampango, ombili nuudemokoli.Aantu oya pumbwa okulya iikulya yina omulyo, okumwenya momagumbo omawanawa oshowo yena iilonga iiwanawa.

 Onkene oshinakugwanithwa shetu shotango osho oku igidha olugodhi lwokukondjitha twa manamo oluhepo nokwaathike pamwe.

 .Otatu kondjitha oluhepo nondjala naashika otashi ningwa mokutala komilandu dha yooloka oku palamena eshongo ndika okuli kandulapo.

 Itatu ka longitha ashike omukalo gumwe, ngaashi haku tiwa kutya onomola yimwe otayi gwana ayehe. Otwa pumbwa omikalo dhomaludhi ogendji mwaashika.

 Omolwashika otwa tulapo omutungilo gwepangelo gwa lundululwa ngoka tatu ka longitha omimvo ntano tadhi landula. Elalakano oku opaleka Iikondo opo yi kale tayi longele kumwe nomalalakano gepangelo niilalakanenwa yalyo ngaashi okukuthapo oluhepo, okushonopeka okwaathike pamwe neyooloko, oku etapo eyokomeho momahupilo tali tsikile aluhe, okunenepeka omahupilo oku etapo iinyangadhalwa yilwe, oku etapo oompito dhiilonga, oshowo okuhwepopeka egandjo lyomayakulo .

 Otatu ka longa moku opaleka nokuhwepopeka etulomiilonga lyoopoloyeka oshowo iilonga yepangelo opo tu tule omahupilo methimbo lyekoko tali endelele, oku opaleka eetepo lyiilonga oshowo egandjo lyomayakulo lyoopala.Shoka twa hala osho oku kala nomutungilo gwepangelo ngoka tagu yamukula  omalalakano gopashigwana oshowo iilalakanenwa yalyo okuhumitha komeho okulonga nawa nonondjungu miikondo ayihe yoholomende.

Ondjodhi yetu oya yela. Otwa thaneka  oku andjaneka noku andjaganeka oompito dhekoko oshowo eyambapalo opo ndika li tyapulwe kaaNamibia ayehe miitopolwa ayihe yoshilongo twa tala unene kaakwashigwana mboka ya kala ethimbo ele ye li konima yesiga.

Shika otatu shi ningi mokulandula omilandu oshowo oondungethaneko  okukalekapo engungumano momahupilo omanene moshilongo. Oku kokeka omahupilo moku tota iinyangadhalwa yilwe mbyoka kaa yi mo natango muka osho wo okulundulula omahupilo gaNamibia opo ngaka ga kale ga kwatelamo aantu ayehe go ishewe otaga vulu okupita momaupyakadhi gomakuyunguto mo  mahupilo muuyuni.

Omolwa iilalakanenwa mbika otwa dhikepo Iikondo iyali iipe kokutya Uuministeli wokukuthapo Oluhepo oshowo Uuministeli wOmahangano gEpangelo. Otwa tungulula wo iikondo yimwe opo tu yi opalekele iilonga yayo  .Otwa etapo omalandulathano  ngoka taga ka kwathela opo omahupilo ga vule oku kala taga koko, oku etapo eliko noompito dhiilong kaaNamibia ayehe.

 AaNamibia ooyakwetu .

Tse mo Namibia lya manguluka otuna elago omolwa ewiliko lyiikaha iiwanawa  uule womimvo 25. Neyambidhidho lyeni ondi inekela otandi ka tsikila omukalo nguka

Sho tuuka komeho ota tu kongo okukalekapo iilonga yetaambathano moku kala twa nkonopeka omutungilo gwepangelo.Ihe nando ongaaka otatu kala wo mombepo yelunduluko sho tatu longekidha aakwashigwana ya ilongekidhile  omahupilo omape, eputuko  noongamba oompe melongo, okudhiladhilapo sha, oshowo uunangeshefa.

 Atuhe otuna okulonga shoka twa tegelelwa okuninga mesindano lyegumbo ndika ewanawa hali ithanwa Namibia.Otwa pumbwa okuli ninga epe omathimbo nomathimbo moku li opaleka ishewe . Onkene otandi hiya aagundjuka yoshilongo shika opo ya ete oondunge dhawo nomathaneko gawo omape, nomadhiladhilo gomuule okuetapo sha metungo lyegumbo  epe. 

Ondjodhi yokomumvo 2030 oyina ko ashike omimvo 15 opo tse tu adhike twa huma komeho pangeshefa osho wo oshilongo shoompito dhi thike pamwe kashina mbudhi kutya omuntu ogwo mu hoko guni.

Pitika ndje ndi endulule eimbilo lyo AU ndyoka tali ti

 “Natu yeni kumwe nokutyapula pamwe omasindano gemanguluko, natu itule tse yene nokuthikamapo pamwe okugamena emanguluko lyetu nuukumwe wetu.Natu thikameni kumwe mokutunga egumbo Namibia epe  moka itaamu kala omuNamibia uuvite a thigwapo nenge a dhimbiwa. Natu ukeni komeho ndele ha konima nando aluhe.

Evi lyOomeme Namibia nali kalepo aluhe

Tangi na Kalunga ne mu yambeke amuhe.

LEAVE A REPLY

Please enter your comment!
Please enter your name here