Peter Ondume yomomufitu: Okuza kOshitumba okuya kokamba yoontauki ko Kassinga

0
306

Kongulohi yesiku limwe kuyele muSeptemba 1977  aadheulwa aape omulongo nagumwe, ngame nda kwatelwamo otwa ithanwa kOmugandjimalombwelo, kOmbelewa ye mOkamba.Kommanda nguka okwe tu tseyithile kutya otatu ka kala iilyo yongundu ndjoka tayi thindikile aakwashigwana mboka opo ya thiki moAngola okuza koNamibia okuya kokamba yoontauki ya Kassinga.

Kommanda okwetu lombwele tu ilongekidhi nawa, twa opaleka oondjembo dhetu nawa oshowo ndhoka tatu thigi mokamba ndjoka.Okwa ti otuna wo okusoshimpwiyu kutya otuna iikuti yagwana.Esiku lya landula otwa ithanwa ishewe tu gongale pehalandjandja tu na iinguma yetu oshowo omitsalo dhetu

Otwa mono ihe oololi oonene dhili ne ndhoka odho dha li dhe tu ile.Ootoloko ndhika odha li dha tumwa okuza koKassinga oku ila aakwashigwana mokamba  ndjika.

Omanga aantu inaa ya londa miiyenditho mbika oya tulwa manga moongundu ooshona.Kehe ongundu oya li yi na Kommanda gwayo oshikwawwo  ongundu kehe oya li ya thikama maantu  ye li omathele 300 lwaampoka.

Otwa thigipo okamba ndjika twa ende tuuka muumbangalantu uzilo. Otwa ende mondjila ombwiinayi yuudha evi oshowo ya li oshona momutamo gwayo.Omolwa uukwatya wondjila mbuka oololi odha li dha ende kashona opo dhaa tyuulile mevi. Otwa ende ngaaka sigo twa thiki mokamba ya Kassinga komatango gesiku ndyoka lwopotundi onti 18H00. Mondjila yetu okuya koKassinga otwa piti momikunda ngaashiTjamutete, Cuvelai oshowo omikwawo ndhoka inaandi tumbula dhili mondjila pokati kOndjiva noKassinga.

Ondjila ndjoka twa ende oya li ya nika oshiponga oya li yi na iihwa ya thita , onkene opwa li pena ompito oku langelwa ku UNITA  noku umbwa kuye, ihe shika ine shi ninga.Oololi sho dha thiki odha hingi sigo omeni lyokamba nokuthikama pehalandjandja  lya li popepi netungo enene. Aahingi oyetu lombwele opo tu zemo moololi nokutegelela tu lombwelwe ishewe shoka sha landulako.

Okamba ya Kassinga oya li yi na olusheno okuyeleka naa hoka twa zi, onkene ndjika oya li ya fa okandoolopa okashona komoNamibia. Konima yokuza mololi onda li ndi uvite ndafa omukwiita omukulu. Oshoka ngame onda lola nale olugodhi, ndamona omidhimba oshowo onda li nda tumwa pamwe naakwiita ooyakwetu okupatolola miihwa nonando inatu tsakaneka mo we aakwiita ya UNITA.Shoka sha yoolola ndje mokati ka yakwetu omolwashoka ngame onda li ndina ondjembo miikaha yandje okuyeleka naakwashigwana mboka ndeende nayo. Omanga twa tegelela omalombwelo galwe onda kala tandi ipula kombinga yondjila ndjoka twa ende nooyakwetu, Sam, Amukwaya na Junias unene tuu kombinga yondjila yuudha iiponga yaKassinga ndjoka tweende sigo twa thiki moKassinga.

Nduka olwali olweendo olule ndoka olwo ashike ndeenda monkalamwenyo yandje ayihe.Konima yethimbo omulumentu a zala nawa okwe ya pamwe naakwiita yatatu yazala oohema dhafa iihwa ya ziza.Okwetu tokelitha, nokonima okwa ithana Kommanda gwetu opo ya ka kundathane.

Mbaka yaali oya popithathana mokupapatelathana mombepo yuuhailwa omanga inaa ya hedhako kashona noku inyenga okuya kokule natse.Konima otwa ka ithanwa tu gongale opo tu lombwelwe kombinga yaampoka tatu lala uusiku mboka. Omulumentu ngoka a li miikutu yomukwashigwana okwe tu taamba mo SWAPO, moKassinga, nokwe tu lombwele kutya molwashoka otwa thiki kwatoka , otatu lala ashike pehalandjandja ndyoka sigo esiku lya landula uuna tatu ka pewa omahala getu gokulala.Okwe tu lombwele wo kutya  otatu pewa iikulya oshowo omeya okwiiyoga omanga inaatu kalala. Konima yoohapu ndhoka   ongundu yetu oya halakana okuya komahala getu gokulala, omanga twa tegelela iikulya mbyoka ya li ya kalako unene. Naambika oya ka adha oohailwa yamwe yaloloka no ya kotha nale.Sho twa ningi aanegumbo moKassinga onda li ndi uvite onda thika moSWAPO  na ondi ilongekidha oku ka kondjitha oombulu. Esiku ndyoka onda li tandi dhiladhila onyama oyindji ndjoka twa thigi kokamba kOshitumba.Onda li wo nda hala oku uva kutya ooyakwetu mboka twi ile nayo oya uka peni.

Nando onda li nda lala pomakumbatha gandje galuudha opamwe nayakwetu yaali, osha kutha ndje ootundi ndatu nda tonata tandi dhiladhila, ngiika oshikwawo inandi kotha mbala omolwa omvulwe.Yakwetu oya adhika nale ya kotha oshoka ondjila yetu oya li tayi vulitha.

Ongula onene otwa penduka nokugonyapo iikumbatha mbyoka twa fala kohi yomuti omunene ngoka gwa li popepi nehalandjandja mpoka tse twa lala uusiku . Otwa mono ishewe oongundu dhaantu tadhi ende dhuuka pehalandjandja mpoka. Aantu oye ya muungundu wu li we komeho kokommanda ya zala ouniforma. Aantu  ayehe sho ya gongala pehalandjandja ndika Okommanda yimwe ya simana noyina edhina oya popitha aantu unene tuu mboka opo ya zi koNamibia.A ti Swapo ehangao lina elandulathano, moka aantu haya longelathana uuwanawa.Okwa tsikile etu londodha kutya moSWAPO ihamu tukanwa, ihamu kondjwa, mo ihamu yakwa. Konima yokutulombwela opwe ya Kommanda gulwe ngoka etu popitha noku tu lombwela iinakugwanithwa yesiku ndyoka.Ngaashi okumwa omwiidhi ,okutya iikuni,okufula iilambo yokuholamena okwoopaleka okamba oshowo okwa pe ongundu yimwe iilonga yoku kwathela mokombitha.

Ongundu yaakwiita 15 mboka twazi nayo kOshitumba oya joina ongundu yaakwiita mboka ye na ontseyo nawa yiita, naambaka oyo yakala  aakwiita aagameni yokamba haya  patolola pondje yokamba oku tala ngele opena aatondi yahala oku iyakelamo. Ongundu ndjika oya li ya thikama maakwiita 200.

LEAVE A REPLY

Please enter your comment!
Please enter your name here