Stone a halutha The Hitman

0
273

WINDHOEK – Aaholi yuudhano woongonyo oyendji otaya tengeneke kutya epipi edhengi lyoongonyo ndyoka lya tula Namibia ketuni omimvo dhapiti ngele tashiya puudhano mbuka olya fa lyuuka pehulilo mokuumba oongonyo.

Epipi ndika lya simanekitha Namibia moshitopolwa shoongonyo olya thikama maambokisi ngaashi Hitman Moses, Tyson Ushona, Vikapita Meroro, Paulus Ambunda, Wilberforce Shihepo, Sacky ‘Izinyoka’ Shikukutu, Martin Haikali, Immanuel ‘Prince’ Naidjala na Abmerk Shidjuu, okutumbulapo ashike yamwe.

Oyendji yaadhengingonyo mbaka oye li momimvo dhomilongo ndatu nenge dhi vulepo, onkene aaholi yuudhano mbuka otaya hunganeke kutya yamwe yomuyo otaya vulu ngaa natango okudhenga oongonyo uule womimvo dhontumba, noku eta omapapa niishani yAfrica ihe oya limbililwa ngele yamwe yomwaambaka otaya vulu tuu okukondja nokusindana omapaya niishani yuunyakwa muuyuni.

Ngaka omaiyuvo gaaholi yuudhano woongonyo ye ga popi noku ga ulika konima sho omudhengingonyo ngoka ye hole no ya simaneka, Paulus The Hitman Moses a li a pewa oshilongwa mokudhenga oongonyo pethimbo lyolugodhi lwawo na Stone Klassen omuSouth Africa Etitano lya yi poRamatex moVenduka.

Oyendji yomaayambidhidhi ya Hitman Moses oya thigipo osaala ya Ramatex yena omitse dha sizimana kehaluko nokohoni oshoka ka ya li ya tegelela enyakwa nale lya Namibia li dhengwemo muudhano mbuka.

Moses okwa kuthwa oshishani she shUuyuni shehangano lyoWorld Boxing Organisation (WBO) International Lightweight eshi gandjapo komukondjithi gwe omuSouth Africa, Malcolm ‘The Stone’ Klassen molugodhi lwali lwa lula moshinyanga sha Ramatex koongula dhOlyomakya ya yi.

Molugodhi nduka olwo lwali olunene lwongulohi ndjoka Hitman ngoka eshiwikile okudhenga oongonyo dhaana ohenda dho oondhigu, okwa li ta umbu oongonyo dha fa tadhi pegeya, nolundji okwa li ta tidhilwa koongodhi ku Klassen ngoka a li iitulamo okusindanapo epaya ndyoka.

Nonando Moses okwa kambadhala ngaashi ta vulu petameko lyolugodhi sho a dhenge omukondjithi gwe molutu nokomutse , Klassen okwa ka kuthako olugodhi sho a kala ta umbu oongonyo oondhigu ndhoka dha undulile  Moses konima ethimbo alihe.

Okukondja kwa Klassens hoka kwali kwaana okushuna monima okwa tula Moses muudhigu, oshoka Klassen okwa tsikile okuumba oongonyo kashina mbudhi kutya  Mosese okwe mu dhenge shithike peni okwa li ashike uuka komeho tadhenge oongonyo tadhi kwata.

Medhingoloko etihamano Klassen okwe shi pondola okutula Moses pevi nonando opwa li inaapu yalwa,sho e mu dhenge ongonyo yimwe yeehama . Moses nando okwa thikama po mbala omanga omuhikihiya inaa mana okuyalula kali ena obalance ya gwana. Ihe shaashi ontsezi iha yi si ngonzinzi Moses okwa tsikile ta umbu omakolokela ihe poompito odhindji uuna ndhoka dha kwata oonkondo kali edhina opo a landulitheko oonkwawo nokutula Klassen mohuke.Oku enda kashona hoka okwa pe Klassen ompito opo nguka a tsikile noku mu dhenga ngaashi a hala. Klassen okwa tsikile ngaaka sigo omedhingoloko lya hugunina  na okwa ulikwa omusindani sho aagandji yiitsa ayehe yatatu ya zimine kutya oye omuumbi gwoongonyo omuhwepo muudhano mbuka.Iitsa ya Klassen oya li 115-110, 116-110, 113-112.

Aambokisi yalwe ya Namibia ayehe oya sindana omalugodhi gawo, ngaashi Julius Indongo okwa mono oshishani sho WBO Africa Junior Welterweight  konima yokudhengamo, Ibrahim Class gwa Tanzania niitsa, ye Tyson Ushona ta sindana ishewe mokudhenga Tshepo Mandawe omuSouth Africa, niitsa konima yolugodhi lwomadhingoloko gahetatu.

Vikapita Meroro ina mona ompito opo a ze omazigudhe molugodhi lwawo lwondjundo  yoCruiserweight na Omour Mzungu, oshoka omukondjithi gwe okwa dhengwa ashike yimwe nopevi medhingoloko lyotango ye ota ti ina hala we okweehamekwa.

Japhet ‘Thin Man’ Utoni okwa kapagula Sibusiso Twani omuSouth Africa niitsa konima yomadhingoloko omulongo molugodhi lwondjundo yoFlyweigh.Ye Immanuel ‘The Prince’ Naidjala ta dhengemo  Aubrey Masamba gwa Malawi medhingoloko etitatu nongonyo yimwe nopevi.

Mondjundo yoLightweight, Martin Haikali okwa sindi  Nkosinathi Ntsangase gwa South Africa niitsa omanga Walter Kautondokwa a thekagula Charles Masanjo gwa Malawi nongonyo yimwe nopevi medhingoloko etine. Molugodhi lwondjundo yoWelterweight omudhengingonyo  Immanuel Mungandjela okwa sindi Tommy Hango nongonyo yimwe nopevi medhingoloko etine.

LEAVE A REPLY

Please enter your comment!
Please enter your name here