Aakiintu ka ye shi aatondi -Nandi-Ndaitwah

0
219

KuHelvy Shaanika

OSHIKUKU – Omuprima Minista gwopevi  Netumbo Nandi-Ndaitwah okwa ti aalumentu aaNamibia na ya tseye kutya aakiintu ka ye shi aatondi.

Nandi-Ndaitwah okwa popi ndhika pethimbo a li ta popitha oshituthidhimbuluko  25 shemanguluko moshikandjohogololo Oshikuku moshitopolwa Omusati Olyomakaya ga yi. Okwa ti aalumentu yamwe aaNamibia ohaya longo naakiintu ye ya talako ongo  aatondi, naashika otashi eta opo mbaka ya kale itaaya longo neitulemo oshowo mbaka otaya longitha oonkondo momagumbo.

Nandi-Ndaitwah okwa ti etompelo enene konima yelongitho lyoonkondo momagumbo kalishi okwaana iilonga andola ,oshoka oyendji yomwaamboka ya kundanekwa ya longitha oonkondo oyo aanashilonga miimpungulonga ya yooloka.Omupevi Prima Minista okwa tothamo iiningwanima iyali moka aanambelewa yaali yopolisi ya yaha aakulukadhi yawo nokonima oyi iyaha yoyene.

“Oshike ano sha puka natse? Natu popyeni momagumbo getu. Natu dhikiipo oongundu yambidhidhi opo tu yandeni iiningwanima yoludhi nduka.” Nandi-Ndaitwah a indile.

Nandi-Ndaitwah ngoka a tanga iilonga iiwanawa ya longwa kaakiintu mepangelo , okwa ti shika itashi ningitha aalumentu ya kale yaanapo  sha andola nenge ya talike ye vulike kaakiintu momutumbo.

Okwa ti etompelo sho aakiintu ya pewa iinakugwanithwa ngaashi shoka shuuPrima Minista nomupevi gwe  oshowo shUuminIsta wIimaliwa, oondika kutya aakiintu nayo ohaya longo nawa ngaashika ashike aalumentu haye shi ningi.

Pahapu dhe oshitopolwa ,Omusati shoka kwali sha ulikwa osho sha longa nawa moshilongo ashihe , oshali mewiliko lyo Ngoloneya onkiintu.

“Ominista tayi wilike uuministeli uupe wu na sha nookansela nenge (Urban and Rural Development) oye omukiintu, oshike ishewe twa pumbwa okugwedhapo? Ihe aalumentu mboka inaa ya itaala muuthike pamwe waantu shi ikwatelela kuukwatya wuukashike oyo mboka itaya longo we nawa iilonga yawo oshoka oya tila okulonga ya manamo.Alikana inamutila , longeni ashike nuudhiiginini.

“Tse katu shi aatondi yeni, otse twe mu valela muuyuni mbuka, otwe mu eta muwo.Otu mu hole, aanona yetu aamati, otu mu hole aasamane yetu,otumu hole.Natu longeleni kumwe okuhumitha komeho oshilongo shetu.Ongula kehe sho wa penduka ipula mwene kutya owa longapo shike oku gandja  sha keyokomeho lya Namibia.Mokuputudha aanona yoye ongo akwashigwana yena oshinakugwanithwa naavuliki, shika otashi ulike kutya ngoye owa longela sha oshilongo .Uuna waa soshimpwiyu kutya megumbo lyoye omuna ombili, nena ngoye owa gwedha ko sha keyokomeho lyoshilongo , kombili yoshilongo  oshowo kengungumano moshilongo” osho Nandi-Ndaitwa  a ulike.

Pethimbo lyedhimbuluko lyemanguluko oshikando oshitimilongo 25, Omupevi Prima Minista okwa tula ongala kewendo lyomukwiita gwoPLAN,[hailwa Sakaria ya Markus gAmushila] ngoka a fumvikwa moshikandjohogololo shoka konima sho ali  dhipagwa kaakwiita yetanga lyuukoloni lya South Africa lyokatongotongo pethimbo lyoku kondjela emanguluko neithikameno lyoshitunda shika.

Caption:

  1. (Nandi-Ndaitwah1.jpg) Omupevi Prima Minista, Netumbo Nandi-Ndaitwah a thanekwa pamwe nakansela gwaShikuku Constituency Councillor Modestus Amutse.
  2. (Nandi-Ndaitwah2.jpg)Omupevi Prima Minista, Netumbo Nandi-Ndaitwah ta gandja esimaneko komukwiita[Sakaria ya Markus gAmushila oshilyo shoPLAN shoka sha dhipagelwe moshikandjohogololo Oshikuku pethimbo lyekondjelomanguluko.

 

 

LEAVE A REPLY

Please enter your comment!
Please enter your name here