Lucia Witbooi a popitha Aanayena

0
240

KuMaria Namupala

ONIIHWA – Omupevi Minista gUukashikekookantu nonkalo nawa yuunona, Lucia Witbooi okwali a talelepo oshikandjohogololo Onayena mOlyomaka ga piti. Shino oshali sha ningilwa poskola pOniihwa pethimbo taku dhimbulukwa esiku lyemanguluko lyaNamibia.
Omupevi minister Witbooi okwali a holola enyanyu lye ta ti okwa nyanyukwa unene mokuulikwa ongomupeviminista guuthikepamwe oshowo onkalonawa yuunona ta uvaneke kutya otaka longa ngaashi tashi vulika noku etapo omalunduluko ngoka ga pumbiwa. Ta ti oku uvite etumba mokugongala nAanayena opo a gandje etumwalaka lye.
Witbooi okwa indile ayehe opo ya longe nuudhiginini ,yo ya kondjithe onkalo yoluhepo nondjala moshilongo. Ta ti elalakano okushunitha pevi oluhepo oshowo okuyambulapo oshilongo paliko naashino otashi adhika uuna puna elongelokumwe pokati kaantu ayehe nepangelo. Witbooi ta gwedhapo kutya aantu ngele oyi imanga kumwe nena otaya vulu ya adhe esindano. Okwali woo a indile uunona wu silwe oshimpwiyu,yo aakaluntu yewu tume kooskola wu ka mone elongo.
“Epangelo lyetu olya longa oshindji no tali longo woo nawa opo kehe omuNamibia a tyapule oshikuki shoshilongo,konyala aaNamibia oyendji oya lyako koshikuki oshoka opuna oopolohalama odhindji dha totwa mokukondjitha oluhepo nokwaa hena iilonga mokati kaagundjuka,aadhinwa oyendji oya mona iilonga naakulupe onkene natango taya mono oshikwiila shawo shaakulupe,” Witbooi ta gwedhapo ngaaka.
Nonande sha ningwa ethimbo lyongulonene aakwashigwana oyali ya gongala momwaalu omunene opo yeye ya tyapule esiku lyemanguluko lyoshilongo. Oyendji oyali yeshi holola noondjimbo kutya oya nyanyukilwa epangelo epe,nokutyapula oomvula 25 dhemanguluko lyoshilongo.
Aakulupe mboka yali ya holoka oyali taya ligola nokukugilila sho ya nyanyukilwa epangelo nomuleli omupe. Omukalimo gomoshikandjohogololo Onayena, Simon Hango okwali a indile aaNamibia ayehe opo ya ekelehi ombepo yokatongotongo nuukwamuhoko yo ya pangelwe kombili aluhe,teya indile ya kale ye holathane onga omuntu namumwayina opo ashike taku adhika esindano,sho oshilongo shi koke nawa paliko.
Oondjimbo oshowo iidhano yopamuthigululwakalo oyo yali kadhenga esiku ndyoka. Aanaskola nayo oyali ya gongala nawa noku pulakena ondjokonona yoshilongo. Oniihwa omukunda gumwe moka mwali hamu kala omalugodhi itaaga nuwa meya pokati kaakwiita yomukolonyeki naakwiita yoPLAN pethimbo lyiita yekondjelomanguluko.
PHOTO CAPTION : 21 March- Omusita Selma Sheya,Quitto Mulunga,Lucia Witbooi,Kansela Max Nekongo na kuku Laina Nekongo.
21 March- Ookahewa ka Minista Lucia Witbooi taye mupe omagano.
21 March- Oohembundangele taya monika ya thaanekwa mpoka pethimbo lye tyapula lyoomvula 25 dhemanguluko.

LEAVE A REPLY

Please enter your comment!
Please enter your name here