Openzela yaakulupe ya gwedhelwa

0
298

KuHelvy Shaanika

ONGWEDIVA – Omupresidende Hage Geingob okwa ingida kutya openzela yovakulupe ota i ka wedelwa i fike poshimaliwa shoN$1000.

Geingob edi okwe di popya pomutumba wokabinete oo wa liko mEtivali loshivike eshi.

Omupresidende ta holola kutya, momavalulo opashiwana omudo 2015/2016, omwa kwatelwa oshimaliwa osho tashi ka wedela oshikuvila shovakulupe noN$400 keshe omwedi.

Mongaha ondjabi yovakulupe oi fike po N$600.

“Omafiku aa otwali meenghundafana nominister yoshimaliwa (Calle Schlattwein), omo twa tokola opo ewedelo lopenzela yovakulupe, onga shimwe shomeenghendabala dokukandula po oluhepo noukuhefike pamwe kwomaxupilo.  Onghee hano, ouwa wopanghalafano oo ta u etwa po kewedelo loshimaliwa eshi natu u shambukilwe.

“Odokumente ya shangwa ku Osmane Faye tai ti okuyandja openzela kovakulupe okwa kwafela mekondjifo loluhepo. Odokumende oyo oya holola yoo kutya moilongo omo hamu yandjwa oshimaliwa shopenzela shili nawa ngaashi moBrazil, Chille na South Africa, ovakulupe vamo kave li naana moluhepo,” Geingob ta yelifa.

Omupresidende ta weda po yoo ta ti ovakulupe moSouth Africa ohava kwata oshimaliwa shifike poN$1350, omanga ovo ve na omido di dulife po 75 ohava kwata oshimaliwa shifike poN$1370.

“Hano ngeenge otwa pe ovakulupe vetu oN$1000 oshilongo shetu otashi ka kala mefano liwa mounyuni, tashi dulika shi dule South Africa oo ena eliko lili pombada oku yeleka na Namibia,” omupresidende ta ti.

Geingob ta ti omakanghameno oo a fiywa po komupresidende mukulu Hifikepunye Pohamba okwa kola na ota e mu kwafele okuxwepopaleka onghalo yoyuuyemo, noshoyo etopolo leliko moshiwana lili nawa.

“Onghee hano ohandi ingida oita, okulwifa oluhepo, naashi itandi keshi pondola aame andike onga omutwe woshilongo, ashike ohandi ka longela kumwe novaleli voikandjo ilili na kulili. Ondi shishi nondelineekela kutya omuna eenghono nomuna oukwao wa nanghali, noshitalendi mokufindana oita  ei,” Geingob ta ti.

 

 

 

LEAVE A REPLY

Please enter your comment!
Please enter your name here