Ospana yoWelwitschias konyala yi sindane

0
235

Komutoolinkundana

WINDHOEK – “Otatu ka kondja noonkondo opo kaatu sindike pethimbo tatu ka dhana edhingoloko tali ya momasiku 10 gApilili nuumvo. Na ondi inekela kutya omukalo nguka twa dhana muudhano mbuka otatu ka tsikila nago muudhano mboka wa landulako. Epandulo nali pewe aamati  oshoka oya ilongo meendelelo unene tuu yi ilongo okuza momapuko ngoka ya li ya ningi momaudhano gaali ga ziko.Onkene otwa hala okuninga nawa nenge okudhana nawa sho tatu ka katukila ishewe mokapale oshikando tashiya”osho a ti.

Ngaka omatumbulo gomukumo gaKapitiya kospana yopashigwana yoRugby ya Namibia ngaashi yi shiwike nawa nedhina Welwitschias’. Kapitiya  Darryl de la Harpe okwa ti okuuvite nawa komukalo ngoka aadhani yospana ye ya li ya dhana nospana yoGriffons ndjoka ya za kuumbangalantu waFree State mo South Africa.Okwa ti uudhano wEtitano lyayi owa li wa yooloka kwaamboka uyali wotango ospana ye ya dhanene  methigathano lyekopi lyoVodacom.

Ospana ya Namibia yoRugby  o Welwitschias, okonyala yi sindane sho ya sindika ashike niitsa omilongo 32 miitsa 28 Etitano lyayi pokapale ka Hage Geingob, nomomeho gOmuperesidende Hage Geingob neefolo lye Monika Geingos.

Welwitshcias oye a tulamo okoola yotango meni ashike lyominute ngele odhindji inadhi adha nopu gumwe, okoola yotango  nenge okutula etanga pevi kwotango okwa ningwa komudhani Russell van Wyk nokonima ashike ishewe yokathimbo ye , Justin Nel okwa mbalipaleke iitsa mbyoka sho a tula ishewe etanga limwe pevi konima yomusinda gwospana yoGriffons.Uupyakadhi mboka wa  li po ooshoka ashike sho etanga lya li lina okuthangelwa pokati kiiti inaa li pitapo iikando ayihe iyali naashika osha etitha opo iitsa ya Namibia yi kale iishona.

Ospana yoGriffons, ndjoka ya yambuka mo South Africa muumbangalantu wa Free State nayo oya ka tulamo okupitila momudhani gwayo Wynand Pienaar. Ihe nando ongawo okutulamo kwawo huka okwa dhimwapo sho, Shaun Kaizemi a thangelemo openalti nongeyi, eyalulo olya li lya thikama miitsa 13-7 moka Namibia a li komeho.

Ospana yoGriffons oya tulamo ishewe oopenalti lwaali ihe nando ongawo ospana yomegumbo oya ngungumaneke aayenda sho Kaizemi a thangelemo ishewe openalti mokati kiiti nongeyi oospana ndhino sho dha yi pefudho odha li niitsa 21-18 muuwanawa wa Namibia.

Medhingoloko etiyali lyuudhano ospana yo Griffons oya galukilemo ya tokola na oya yuguko okukala komeho niitsa miikaha ya Namibia sho ya tulamo ishewe, nongeyi oya yi komeho niitsa 25-21.Nando ongaaka Nel okwa manitha uudhano we moku tulamo ookola lutatu muudhano na okwa pe Namibia a kale komeho niitsa 28-25. Ihe ospana yo Griffons oya ka tulamo ishewe etanga limwe ndyoka lya eta opo eyalulo likale piitsa 32-28 muuwanawa woGriffon naasho, uudhano wa thiki pehulilo, ospana ndjoka ya li tayi talelepo oyo ya li komeho , nosho ngeyi oya sindi Welwitschia.

Nando oya dhenwga ngaaka konyala ashike Welwitschias okwi ilikolele iitsa yili iyali yoliha muudhano wekopi lyo Vodacom. Oshowo okwa pewa oshitsa sho bonasa molwa okutula etanga pevi iikando yili ine muudhano oshowo oku kanena muudhano meni lyiitsa iheyali.Oshikwawo epapa lyomudhani dhingi guudhano mbuka ndyoka lya pewa Justin Nel omudhani gwokonima gwa Namibia otali ulike lela kutya shika osho shili ye okwe li ilongela. Uudhano wa landulako mboka Welwitschias ta kadhana oomboka sho ta ka tsakanena nospana yo Bulls ndjoka nale kwali hayi ithanwa Blue Bulls.Etsakaneno ndika oliliko momasiku 10 Apilili nuumvo pokapale ka Hage Geingob moVenduka.

Caption: Rugby Pic:

Namibia ota longitha ethigathano lyuudhano wekopi lyoVodacom ongo omukalo goku ilongekidhila ekuthombinga lye, methigathano lyekopi lyuuyuni lyoRugby ndyoka tali ka kalako muSeptemba nuumvo moUnited Kingdom.

 

LEAVE A REPLY

Please enter your comment!
Please enter your name here