TAKAMITHA TIGER A GALUKA …ye Reds na Ghosts otaye kiikwata woBidVest…

0
237

KuCarlos Kambaekwa

 

WINDHOEK – Ospana yo Tigers ndjoka ya dhengemo ospana yaanasikola yopo Univesiti ya Namibia medhingoloko etine lyuudhano wekopi lya BidVest, otayi kiitaalela nospana yo Eleven Arrows muudhano medhingoloko etiyali lyahugunina lyuudhano mbuka.

 

Ospana yetanga lyokoompadhi yoTigers hayi yambuka moKatutura oya dhengemo Unam nookoola 2-0 muudhano wawo mboka wali wa dhanenwa pokapale ka Sam Nuujoma, moKatutura sha Venduka Osoondaha oshiwike shika.

 

Junior Shikolola na Absalom Imbodi (ngoka a thangelemo openalti) oyo aadhani mewiliko lya Bobby Samaria mboka ya tula mo okoola yimwe kehe gumwe. Esindano ndika olya pe ospana ndjoka ompito opo yi ka tsakanene nospana yokomunkulofuta yo Eleven Arrows. Tigers okwa li ena okusindanapo uudhano mbuka pwaana omalimbililo gasha.

 

Momaudhano galwe omudhani gwOrlando Pirates, ngoka a zi pondje yokapale okwa tulamo okoola konima yokathimbo shono opo a thiki mokapale kuudhano.Okoola ndjoka Nickey Masabane a tulamo oya pe Orlando Pirates ompito opo a ka dhane mosemifinal no African Stars.

African Stars ngoka oye enyakwa lye kopi ndika okwa hala okuninga ondjokonona moku li sindapo oshikando oshititatu sha landulathana nuumvo.

Omudhani ha endelele  gwokomeho,Guti Korukuve, okwa li ya dhana nawa nomudhani omvalelele ya Zimbabwe Jane  Godwin oyo yaali mboka ya tulamo ookoola mbali dhomookoola 3 ndhoka dha tulwamo kospana ndjika muudhano mbuka.

Ospana ndjika ha yi dheulwa ku Woody Jacobs oya dhengemo ospana yo Young Chiefs yokOshana ndjoka ya li ya ende nawa sigo opondondo ndjika yuudhano mbuka wekopi lyo BidVest Namibia.

 

Uudhano mbuka owa li wa kwatelwa komeho mokudhana komudhani gwo Young Chiefs, Castro Nuyoma ngoka oye a tulamo tango okoola nomutse gwe noku tula ngaaka ospana ndjika komeho meyalulo lyokoola.Etanga ndyoka Nuuyoma a thanga inali monika komukwati  gwoAfrican Stars , Athiel Mbaha , ngoka a li ashike ta kambadhala oku kwata ombepo.

 

Esindano ndika olya gandja ompito koAfrican Stars opo yi ka tsakanene nospana yOrlando Pirates medhingoloko etiyali lyahugunina lyuudhano mbuka.Esindano ndika wo olya pe African Stars etegameno kutya otashi vulika yi ka sindanepo ekopi ndika li na oshimaliwa oshindji oshikando oshititatu momalweetho ga landulathana. Olya etele ishewe African Stars etegameno lyoku sindana omakopi gaali kokutya ndika lyoBidVest oshowo ndyoka lyo MTC Prima Liha . Molwashoka African Stars oye eli komeho muudhano woliha nuumvo ena iitsa omulongo pokati ke nospana ndjoka ye mu landula pehala etiyali momusholondondo gwospana dhomoliha yopombanda.

 

Ospana yokomunkulofuta FNB Eleven Arrows na yo oyi imonene ehala muudhano womedhingoloko etiyali lyahugunina sho tayi ka tsakanena noTigers.Eleven Arrows okwa dhengemo ospana yo Citizens nookoola ne dhomu mbali sho oospana ndhika dha li dha yi koopenalti molwashoka kapwali ndjoka ya sindana meni lyethimbo lyominute omilongo omugoyi ngaashika shuuthwa.

 

Omudhani nale mospana yopashigwana Papi Kavezembi ngoka eli a hehelwa okuza ko Tura Magic oye a tulamo  okoola yotango muudhano wawo mboka wa ka hulila mokudhana okoola yimwe muyimwe. Omugameni mospana yoArrows’ Ephraim Mwaikange oye a ulikwa omudhani omwaawanawa muudhano mbuka.

 

Uudhano mbuka owa li wa hulile mokudhana kuthike pamwe na owa ka tokolwa mokuthangelamo oopenalti.

 

Oospana ndhoka tadhi kiitalela kedhingoloko etiyali lyahugunina odho.

African Stars vs FNB Orlando Pirates

Tigers vs FNB Eleven Arrows

 

 

 

Caption: Reds/Chiefs jpg –

Uudhano wekopi lyo BidVest edhingoloko lyokotafinala pokati kenyakwa lyuudhano mbuka African Stars no  Young Chiefs yokoshitopolwa shaShana pokapale ka Sam Nujoma moKatutura sha Venduka Olyomakaya gayi. Stars okwa sindanapo mbuka nookoola 3-1.

LEAVE A REPLY

Please enter your comment!
Please enter your name here