Tava indilile omukalo wokulanda omeva ulundululwe

0
255

KuTuulikki Abraham

Luderitz – Ovakalimo vomoKomboni poBenguela moLiindili otava tanguna tava ti omukalo wokuhalanda omeva pefimbo langabekwa nau xulifwepo.
Paulus Kamati omukalimo wo mokomboni okwa tumbula kutya ovanhu ovo hava di mokomboni vahapu vomuvo ovava vehe na oilonga, have linyangele ashike mokulandifa eshi naashinya, noku helufuna yoo apa naapenya.
Kamati okwa tumbula kutya omukalo oo tau longifwa paife wokulanda omeva komunhu oo ha longo ashike pefimbo lokuya komusha, oshoyo nolokudimbuka, owa eta ovakalimo vahapu va kale ina va mona omeva.
Tati, omunhu ashike umwe ha longo po omalandifilo omeva, na iha mono efudepo mexulilo shivike, ohauhala ashike akalela omukweyo wovanhu veuya okulanda omeva.
Shooya Ndakalako ou halongo nokutambula eembadi odo hadi longifwa okulanda omeva mombelewa yaMuni ya Luderitz okwe shikoleka kutya, oha patulula omeva ongula inene po tundi 7h00 yee ta ka fuda po okudja po 12h00 fiyo opo 14h00 taa luka euye atwikile oilonga yaye po14h00 fiyo opo 18h00.
Ndakalako ota tumbula kutya efimbo keshe a patulula ovanhu ohava kala vahapu neenghono, novanhu vahapu ohaveya kuye eva patulule nande okuli pefimbo laye lokufudapo.
Regina Endjala oo naye hateke omeva opo okwa tumbula kutya omukalo ou wo vanhu vahapu tava lande omeva pokapomba kamwe akeke owa hovelele odula yaya mu October lwaapo.
Ta tumbula kutya voo kaveli omhinge no kulanda omeva, ashike ovahala muni a etepo omukalo wokulanda omeva no kakalata, opo omunhu to dulu okuuya uteke omeva keshe efimbo, ku kelelwe omikweyo diledile yokuuya uteke omeva pefimbo langambekwa.
“Efimbo limwe tate Shooya ohakala ehe udite nawa ta ehama, osho ha shi eta opo tukale ina tumona nande omeva”.
Endjala okwa indila oupomba va hapupalekwe, voo tava tulilwapo oukalata vokulanda omeva keshe efimbo
Komukalo ou wokulanda omeva komunhu umwe auke oo hauhala akalela opomba yomeva Omunambelewa ou elilepo oshikondo shoku xumifa komesho oshiwana melelo la muni wa Liindili Victoria Hameva okwa tumbula kutya omukalo wokulanda omeva nokakalata oo wali haulongifwa tete petameko, ndele okwa didilikwa itau longa nawa.
Hameva okwa tumbula kutya omukalo ou wokulanda eembadi keembelewa damuni odo dili momalukanda noku uya uyandje eembadi odo kwaau tapatulula omeva oo omukalo taulongifwa komalukanda aeshe eli a tatu mo Liindili , haulongifwa ponhele opo po Komboni, ko Amilema, oshoyo kolukanda lo Area 7.
Ta fatulula kutya komalukanda oo eli avali Amilema no Area 7 omukalo otau ende nawa, osho ovakalimo vo mo komboni vena okuninga oku li unganeka ashike nawa noku tulapo efimbo lokupatulula, omeva.

LEAVE A REPLY

Please enter your comment!
Please enter your name here