Ya dhana esiku lyoTB mOshikoto

0
275

KuMaria Namupala

OMUTSEGWONIME – Aakalimo yomoshitopolwa Oshikoto oyali ya dhana noku dhimbulukwa esiku lyoTB muuyuni,shino oshali sha longekidhwa kUumunusteli wUuhaku oshowo Onkalo nawa. Kohi yoshipalanyolo “Adha aaNamibia ayehe yena oTB,panga ngoye aludha kehe gumwe ngoka a kwatwa”.
Esiku ndino ohali dhanwa aluhe momasiku 24 Maalitsa omumvo kehe muuyuni. Pashigwana olyali lya dhanenwa ko Keetmanshoop moshitopolwa sha Karas metitano lya piti. Aashikoto oyali ya gongala pOmutsegwonime, yo ya dhane esiku ndika ngaashi lya unganekwa kOngongahangano Yuundjolowele Muuyuni.
Omukwatelikomeho goopolohalama dho Tuberculosis (TB),Malaria oshowo HIV/AIDS mOshikoto, Vicky Kambuta okwati omukithi gwoTb ogwo gumwe omudhipagi,no tagu manapo aantu moshigwana. “Omukithi nguno ohagu dhipaga konyala aantu oomilliona 3 muuyuni awuhe,OTB ohayi vulu ku pangwa uuna ndono omuntu wa landula epango lyoye nawa twiiyutha komalombwelo sigo wa mana,”Kambuta tati.
Kambuta tati elalakano lyokudhana esiku ndika pamuthika gwoshitopolwa Oshikoto okugandja uuyelele kombinga yoTB,nkene aantu yena kwiigamena nonkene yena ku kala uuna taya iyadha ya kwatwa komukuthi nguka nonkene yena ku kala naakwanezimo mboka yena omukithi nguka. Tati oyali ya dhiladhila opo esiku li dhanenwe mOmutsegwonime oshoka omo mwa konekiwa muna omwaalu omunene gwaavu yoTB,no tagu londo esiku nesiku.
Omunashipundi gwelelo lyaShikoto nokuli kansela gwoshikandjohogololo Onayena pethimbo ta lesha oshipopiwa sha Minista gUuhaku nOnkalo nawa Omundohotola Bernard Haufiku ,okwati Namibia okuna omatompelo ogendji moku dhimbulukwa esiku lyoTB oshoka osho shimwe shomiilongo omugoyi moka mwa lopotwa muna aantu oyendji ya kwatwa koTB okutala koolopota ndhoka dhazi kehangano lyuundjolowele awuhe. Shono tashi ulike kutya Namibia okuli ponomola onti-4.
“ Oshu uka nosho opala tu dhaneni esiku ndika muukumwe nokwiidhimbulukitha iinakugwanithwa mbyoka tayi keelele opo twaa kwatwe komukithi nguka,tse tu ndungikathane nomaluvalo getu go omwaalu goTB gu shune pevi,otatu dhimbulukwa woo oomwenyo dhaantu yetu mbono ya kanitha oomwenyo dhawo komukithi nguka noku dhi halela dhi vululukwe nombili,” Nekongo ta gwedhapo.

Nekongo okwali a tsu omukumo aaniilonga yuundjolowele oshowo mboka haya longo uusiku nomutenya taya ende momikunda opo ya gandje omauyelele ngoka aantu oyendji yega pumbwa , ya longe yaana ezimbuko yo ya gandje elongo lya kwata miiti nkene kuna ku keelelwa omukithi nguka,ya kale yeshi nkene taya yanda nokwiigamena koTB oshowo kuya lombwela yi iyuthe komalombwelo ngono ya pewa kaapangi noondohotola.
Aanaskola pOmutsegwonime Combined oyali ya dhana oshinyandwa kombinga yomukithi gwoTB noku ulika omathano nomadhindhiliko ngono to mono molutu lwoye uuna wa kwatwa. Ottilie Ikeakanam omukwatelikomeho gwoTB mOnandjokwe okwa indile aavu yoTb ya landule omapango gawo sigo ya mana tati omukithi nguka ohagu pangwa etagu aluka uuna ndoka wa landula nawa epango lyoye ngoye to iyutha komalombwelo. Ta indile opo kehe gumwe a kale iikonakonitha oTB ye a talike mpoka a thikama nomukithi nguka.
PHOTO CAPTION : World TB- World TB1- Aakalimo mOmutsegwonime ya pulakena nawa kuuyelele mboka taya pewa pesiku lyoTB mOshikoto.

LEAVE A REPLY

Please enter your comment!
Please enter your name here