Egumbo lyaChristof Iiyambo otali pi po

0
757

ONGWEDIVA – Egumbo lyomusamane Kristof Iiyambo na Ruusa Ngwali, mboka yeli aakalimo yomomukunda Ondangi moshikandjohogololo Okaku ngashingeyi olya tameka okupya po komulilo kaagushiwike mpoka tagu ziilile.

Aanegumbo yomooIiyambo opamwe nomushiinda shawo Selma Gabriel, oyo mboka yali ye na uunona wali anuwa tawu hege wafa omayoka konima sho anuwa wa hangene nokudhipaga eyoka lyontoka, ndyoka lyali tali tidha gumwe gwomuyo.

Kakele kokwiinyenga wafa omayoka, uunona anuwa owa li wa piyagana, wa li tau kondjitha okukiiyumbila momeya, kamwe oka li ka kuthile mukwawo ekatana nokakwao oka hanagula po omambo netalashe maandjawo. Uunona anuwa owa zi wo ewi lyomuntu iipopi kedhina ta nyenyeta sho wa dhipa po eyoka lye, na okwa li a hala li galulwe li na omwenyo. Owa ka kala nawa anuwa sho wa galikanenwa kongeleka yedhina True Gospel of Salvation Ministry Apostle Church yokOshikango

Sho kwali kuna omasiku geli gaali egumbo lyawo li pye po, aanegumbo naashiinda oya uvu oshinima tashi ningi ewi lyafa lyomuntu ta lili oosa. “Aashiinda oyali ta yiipula kutya okaandjetu taku lili, tse otuli po tatu ipula kutya opuushiinda,” Ngwali ta ti.

Mbaka oya londodhwa woo sho okanona kamwe komuushiinda hoka nako kali taka hege kafa eyoka anuwa mEtitano lyoshiwika shazi ko oka li ka falwa kuyina kongeleka yili koWindhoek, na oka li ka zi ewi lyomukiintu tati ota ka tumina ooNgwali yo na Gabriel omulilo.

“Yina yokanona okwe tu dhengele etu tseyithile ashike ngame shoka onda li ndeshi dhimbwa po thiluthilu, onde shi dhimbulukwa owala sho egumbo lya tameke okupya,” Ngwali ta gwedha po.

Ngwali okwa hokololele Kundana kutya egumbo lyawo olya tameke okupya lwopo 21h00 mOsoondaha.

“Ngame onda li ndili puushiinda sho nduuvu okanona kandje Loide ka kugu, na sho nda yelula omeho onda mono kutya yimwe yomoondunda megumbo oya yaka omulilo. Sho twa matuka naashinda mbo yeya yetu kwathele okudhima omulilo, otwa adha ondjugo tayi pi. Elago enene mondjugo kamwali hamu lalwa,” Ngwali ta ti ngaaka.

Ngwali ta hokolola kutya konima sho aashiinda ya dhimi omulilo, gumwe gwomuyo okwa pula opo ya ye pamwe kaandjawo yoo ya galuke andola yo ye ye ya lale kaandja Iiyambo. Ashike, oya ningi owala sho ya thiki puushiinda yo ondunda onkwawo oya yaka natango omulilo.

Ngwali ta ti mOmaandaha, megumbo ina mu pya ondunda, ashike mEtiyali, omanga Ngwali naye mwene a li megumbo ethimbo lyomutenya, oya ka haluka owala megumbo mwa nika omulilo. Sho ya tala tala, oya mono kutya okaiyogelo oka pya po thiluthilu. Manga yali taya kambadhala okudhima okaiyogelo, oya mono owala yimwe yomoondunda ndhoka dha pile uusiku woOsoondaha natango ya yaka omulilo. Omanga ngaa yiipyakidhila nokuyi dhima, koo komutse gwokatala keli kehale nako okwa yaka.

“Otwa kala nee sho tatu kambadhala andola tu dhime, omulilo kokatala gwo ota gu lundu mombanda. Sho to tile omulilo omeya, owafa owala to gu tile omahooli. Otwa kala nee yamwe ota ya dhimi, yo yamwe ota ya galikana, sigo gwa dhimi,” Ngwali ta hokolola.

Ngwali ta hokolola kutya, ngashingeyi yoo nomusamene gwe naanona oha ya lala owala pondje, molwa uumbanda kutya pamwe oondunda ota dhi hwama omulilo.

Ta ti omambo nomizalo dhosikola dhuunona we wuumati odha pila moondunda.

Ngwali okwa holola woo okuuva nayi kwe, sho anuwa yimwe yomiikundaneki ya nyanyangidha omahokolola ta ge mu nyana nokumulundila.

“Ota ya ula ndje kutya ngame omufuko, ndina oomvula 36, kandi shiwike po pOkaku, anuwa onda yile kuuwa ndaka pula Omukwaniilwa a tidhe omukulupe momukunda. Oshinima shotango, ngame omukulukadhi nda hokanwa, ngame onda valwa momasiku 02 August 1971. Nashingeyi ondi na oomvula 43 tandi ka gwanitha oomvula 44. Ngame omvalele yaKaku, nameme okwa valelwa mOkaku. Kandina esiku nda ka popile oshinima shika kuuwa ina ndi shangela ko ombapila, nOmukwaniilwa keshi ndje. Onda lundilwa woo anuwa onda ka gandjele ombili kegumbo lyomukulupe. Ota ndi ka gandja ombili ngiini pwaana opolisi? Ngwali ta ti.

 

LEAVE A REPLY

Please enter your comment!
Please enter your name here