Festus Katuna Mbandeka a langekwa mUutha

0
368

UUTHA-Ngaashi shili omukalondjigilile nopamuthigululwakalo kutya omikunda ndhoka dhaana aaleli ohadhi pewa ngoka edhi inekelelwa opo a wilike ye a lele aantu yomukunda gontumba,mehuliloshiwike lya piti Tatekulu Festus Katuna Mbandeka okwali a langekwa momukunda guli muuzilo wOndonga hagu ithanwa Uutha.

Shino oshali sha ningwa konima sho ali a ulikwa kElelo lyopamuthigululwakalo lyOndonga opo akale omukwateli komeho gomukunda nguka ye a lele aashitwa ngaashi omikunda adhihe dhina ooyene yomikunda.   Oshituthi shelangeko shika oshali sha ningwa Olyomakaya ga ziko sha ningilwa pegumbo lye pUutha .

Poshituthi opwali pwa kalwa komalenga oshowo kaanamukunda mboka nokokuume mboka yali yeya ya ninge oombangi sho kahewa kawo a ningi mwene gwomukunda.

Uutha omukunda guli moshipundi shOshaampula shono tashi wilikwa ku Ambassada, Eddie Amukongo. Ambassada Amukongo okwa hokolola kutya oshipundi shawo oshina omikunda dhili 11 mono natango muna mbali kaadhina ooyene yomikunda tadhi ilele dho dhene . Amukongo tati omukunda nguka Uutha ogwa kala ethimbo lyuule woomvula ndatu netata tagu ilele gogwene konima sho ngoka a kala tegu lele Nelenge Katshu (Piyepiye) a hulitha oondjenda dhe mo2012.

Mbandeka okwali a pewa omukunda nguka Uutha noku langekwa pambelewa kelenga enene lyoshikandjo shAmuteya tatekulu Vilho Kamanya.  Poshiithanene opwali woo pwa kalwa ku kansela gwoshikandjohogololo Okankolo Josef Imbili,ngoka a kumike Mbandeka a longe nuudhiginini ye a yakule oshigwana ngaashi tashi vulika.

Imbili okali woo atsu Mbandeka omukumo kutya nando okuli kokule na kale aluhe ha pulakene shoka shili momukunda gwe ye a kale ha ningi omatokolo geli muuwanawa woshigwana. Ta indile woo aakalimo yomUutha ya gandje elongelokumwe ewaanawa, yo ya kale aluhe yena ombili noku longa muukumwe,tati ngele momukunda omwa holoka sha tashi limbilike nashi kale sha lopotelwa mwene gwomukunda mbala shi kandulwepo meendelelo. Ongundu Kufamosha oshowo ongundu yuunona woskola pOntana odho dhali tadhi mwenyeke pethimbo lyoshituthi.

Enyanyu enene olyali lya taka noondigolo yo ootate taya kuwilile oshoka omatenga oga mona ooyene naanamukunda mbaka itaya ilelewe yoyene ngaashi ya kala taya iilele uule woomvula ndhoka. Mbandeka ngoka eli omvalele yaNiipa niitya yemwene pethimbo ta taambako oshipundi shuumwene womukunda pelangeko okwali a holola enyanyu lye ta uvaneke kutya otaka longa nomukumo ye a tule ayihe kolutenda mUutha oshoka omwa ningi ethimbo kaamuna mwene gwomukunda nonande pwa kala ngaa ngoka egu lilepo.

 

LEAVE A REPLY

Please enter your comment!
Please enter your name here