Mannetti okuna omukumo okusinda Zambia

0
325

WINDHOEK – Omudheuli gwospana yopashigwana yetanga lyokoompadhi, Brave Warriors, Ricardo ‘Bucksy’ Mannetti okwi ilongekidha okudhengamo Zambia muudhano wokupita opo iilongo yi ka dhane muudhano womanyakwa gAafrika womumvo tuuka. Omathigathano gokupita okuya kuudhano mbuka otaga tameke muJuni nuumvo.

Olutu oluwiliki lwetanga lyokoompadhi lwaAfrika CAF olwa li lwa hogolola oospana ndhoka tadhi ka dhana momadhingoloko gokupita okuka dhana methigathano lyomanyakwa genenevi omumvo 2016.Omahogololo ngaka oga li ga ningwa mOsoondaha ya ziko. Namibia ngoka keena eyalulo lyasha otashi vulika ta ka tulwa mongundu yiilongo mbyoka ya yalulwa ngaashi Angola, Zambia, Zimbabwe, South Africa, Mozambique nenge Botswana, na okwa li a tulwa pamwe nospana ndjoka ya talika pehala etiyali moshitopolwa shoCosafa yondjika oyo Zambia.

Moku yamukula onkundana ndjika Mannetti okwa ti okwa taambako ompito ndjika okudhana na ChipoIopolo ngaashi ospana yetanga lyokoompadhi yatseyika nawa moZambia.”Mbaka oyo ospana yili pehala etiyali mokudhana nawa moshitopolwa sha Cosafa onkene uudhano mbuka otawu ka kala eshongo enene kutse pompito ndjika” osho Manetti ati.Eeno tse, otse aadhinwa naashika oshiwanawa,’ Mannetti okwa ti , a ulike kutya okudhana uudhano wotango megumbo otashi kala muuwanawa wetu, oshoka shika otashi vulu okugwedhwa keilongekidho ewanawa.

“Ngashingeyi otushi kutya olye tatu ka dhana naye onkene  oshasimana opo tu ilongekidhe nawa nokuyele molwa uudhano mboka tawu ka dhanenwa tango moVenduka. Kandina esiku nda dhengelelelwe pokapale kaSam Nujoma okuza tuu nkene nda pelwe oshinakugwanithwa shokudheula ospana yopashigwana.Ngele otwi ilongekidha nawa na ishewe sho tatu dhanene tango megumbo otuna ompito okudhenga Zambia.Otaya vulu okudhengwa, ndele opo shika tu shi ninge otuna oku ilongekidha shagwana nawa.”

Mannetti okwi inekela maadhani mboka yena owino yomimvo odhindji muudhano woliha yomegumbo. Uudhano mbuka owaadhani mboka haya dhana etanga lyokoompadhi meni lyiilongo yawo, na otuna aadhani yena owino nuunongo mboka ya galuka okuza pondje yiilongo na ohaya dhanene meni ngashingeyi ngashi, Freedom Puriza, Heini Isaacks, Sidney Uri-Khob na Pineas Jacob. Aadhani mbaka otaya vulu okutukwathela mokudhana kwetu ihe otuna oku ilongekidha nawa nawa,’ osho a ulike.

Uudhano wotango otawu ka dhanwa mehuliloshiwike lyomasiku 19-21 Juni nuumvo , nuudhano uutiyali otawu kalako momasiku 3-5 Juli nuumvo.Omusindani pokati ka Namibia na Zambia ota ka dhana nomusindani ngoka tazi pokati ka Mozambique/Seychelles opo nguka a mone ompito yoku ka dhana medhingoloko lyomanyakwa gomeni lyenenevi Afrika moRwanda 2016.

LEAVE A REPLY

Please enter your comment!
Please enter your name here