Omahokololo okOkaku omai, ashike ina tu pangula

1
435

Oshinima sheemhepo domilaulu osho tashi hokololwa tashi li nyenge komukunda Ondangi moshitukulwa shaKaku oshii notashi halula, ashike fye ovanamwenyo unene tuu ovatoolinghundana katuna oufemba wokupangula omunhu.

Oivike ya djako oshitukulwa Okaku osha ninga omafiku tashi dana onghandangala moikundaneki omolwa eemhepo danyata odo vati da holokela moshitukulwa omo, noda kwata ounona konima eshi va dipaa eyoka pomukunda wavo.

Ehokololo otashi dulika loshili, ota shi dulika lihefi loshili ashike fye onga oikundaneki, otuna oshinakuwanifwa shokutwala ouyelele koshiwana uli ngaashi uli.

Katuna oufemba okupangula ile okuulika ovanhu ominwe tutye ovalodi ile otava lundile, shapo ongeenge tuna oumbangi wa wana lela hatu dulu oku kalela po, noha tu dulu yoo okuutukula noshiwana.

Mofikola youtoolinghundana hano kouniversiti okuna oshilongwa sheeveta neemhango doutoolinghundana osho sha fikama po nosheli kolelela keeveta doshilongo naado dopaiwana.

Oshiwa noshafimana opo onga ovatoolinghundana tu talelepo omambo etu oshilongwa eshi hashi ifanwa Media Laws and Ethics opo tu li endululife po vali.

Ngeenge owa lesha ile wa pwilikina kwaashi ovatoolinghundana va nyanyangida shina sha noiningwanimwa yokOkaku otokumwa. Vamwe ove li olwaama mbinga vafa va ama kombinga yoomeme Ruusa Ngwali na meme Selma Gabriel, ooina younona ovo vali vati tava ulike omadidiliko eemhepo da nyata, omanga vamwe ova ama kombinga yomukulupe ou ta fekelwa oshinima eshi. Hano oshi li ngaho oshinakuwanifwa shetu tu kufe ombinga nokupangula? Kashi fi oshinakuwanifwa shetu okuyoololela oshiwana nokushi ulikila kutya olye apuka na olye eli mondjila. Shetu okupula omapulo oo tuu wete kutya shiimba oshiwana ngeno shipewe omhito yokupula, ngeno osho tashi pula -opuwo.

Omutoolinghundana muwa oye ou ha kufa omawi aaveshe ovo vapopiwa mo mehokololo, noku va pa eemhito di fike pamwe oku yandja omawi avo. Ashike ngee owa dopa okumona ovanhu aveshe ovo wa tumbula mehokololo, oshi xwepo u kale ino longifa omadina aavo wa popya mo mehokololo. Unene tuu ngeenge ehokololo olo ota li shundula ile tali tula omwenyo womunhu moshiponga, ngaashi monghalo yokOkaku.

Omapulo omutoolinghundana kaena okukala anyika oupanguli, shaashi oshilonga shoutoolinghundana naasho shoupanguli osha yooloka. Omutoolinghundana oha pula ombaxu nokavava ashike ita pangula.

Momukokomoko wehokololo lokOkaku, umwe ota didilike yoo nghene oufemba wounona wa nyonaunwa eshi va pulwa pulwa koikundaneki nokufanekwa veheli metonatelo, ile pehe na epitikilo lovakulunhu vavo.

Oshinima shotete, ounona ava ovapiyaana nale pamadilaadilo, ove li moumbanda na ota va dulu okukala oihakanwa yokuulwa nai kuva kwao keefikola osho tashi dulu okunyonauna onakwiiwa yavo. Hano oshili oshinakuwanifwa shetu onga ovatoolinghundana okukaleka po nokuamena oufemba womunhu mwakwatelwa oilyo yomoshiwana oyo iha i dilu okuli amena, hano ounona.

Omhango yokuamena ounona oya dja nale, na ota i kala ko nai fimanekwe.

1 COMMENT

  1. ondi uditile shili olukeno memekulu wokokaku ou tafeekelelwa oshiima shatya ngaha. pakupwilikina kwange moradio onda uda ktya meekulu ou okuna eedula dakonda pomilongo hetatu nasha mar ondi udite shili onghenda tatukwa kofacebook vamwe ava tave mutuku shiimba kavefike nopovana sho kapena naana ou ena oushili ngeno natango ktya oinima eyi tapopilwa oyo shili. onda hala kukunghilila oshiwana shikwetu tukaleni netiloKalunga ndee hatuli longeni okuteelela nokufimaneka.

LEAVE A REPLY

Please enter your comment!
Please enter your name here