Omusati gwa sindana Ekopi lyo The Namibia

0
247

OUTJO – Oshitopolwa shOmusati muuningininombangalantu waNamibia osha li shuudha oondigolo ehuliloshiwike lyoPaasa. Enyanyu ndika nepandulo oshowo eligolo ndyoka olya holoka molwashoka ospana yetanga lyookomapadhi yaadhani aagundjuka yaamoka oya sindanapo lwotango ekopi lyoshifonkundana The Namibian.

Omusati ogwa sindana lwotango uudhano mbuka konima sho gwa dhengemo ospana yokOshikoto noopenalti 4-3 sho oospana ndhika mbali dhali dha dhana shithike pamwe uule wominute 120, dha li kehe yimwe oyi na okoola yimwe. Esindano lyOmusati inali za pokapala kayela ndele olya pitile mekondjo lyuudhiginini lyapula omazigudhe nepupyu, okudhenga ospana yOshikoto ndjoka nando oya li ya dhana ethimbo lya hugunina naadhani yeli ashike omugoyi , oya li tayi homona ombinga yOmusati pwaana oluthuwo.Oshikoto osha li shaana elago sho sha ka dhengwa koopenalti pehulilo lyuudhano mbuka hawu dhanwa aluhe pethimbo lyOpaasa. Mbuka wonuumvo owa li wa dhanenwa pokapale kuudhano wetanga lyokoompadhi mondoolopa yOutjo. Omusati ogwa thanga nawa oopenalti dhago nonando omuthangi gwawo gwotango okwa li a kwatwamo, ospana ndjika otayi pandula omukwati gwayo sho eshi pondola oku kwatamo omatanga gaali gaadhani yospana yokOshikoto, nongeyi okwa kwashilipaleke Omusati esindano muudhano wekopi ndika lyaagundjuka oshikando shotango nkene uudhano mbuka wa tamekele okudhanwa omumvo kehe oomvula 15 dhapitipo.

Oospana ndhika odha tamekele uudhano wadho wotango okutsakanena kedhingoloko lya hugunina, tadhi yugathana etanga nonando Oshikoto osho shali sha kala netanga ethimbo olindji.Onkene ina shi kutha ospana ndjika ethimbo ele opo yi kale ya tulamo okoola ndjoka ya thangelwamo ku Desmond Kharigub nongeyi Oshikoto osha yi komeho nokoola yimwe monola sigo oosho uudhano wa yi pokafudho. Medhingoloko etiyali  Omusati ogwa li gwa tokola oku tulamo okoola oshoka ogwo gwali tagu dhana nokuhomona ombinga yospana Oshikoto omathimbo nomathimbo nogwa ka tulamo okoola kuChristopher Johannes , konima sho omudhani gwOshikoto gumwe a tidhwamo mokapale sho  a pewa okakalata okatiligane.

Oospana ndhika odha kala dha hakela pokoola yimwe sigo oosho ohiya ya hugunina  ya hikwa wo uudhano tawu gedhelwako ominute 30 ishewe. Ihe naandhika odha dhanwa eta dhi puko nokonima oospana ndhika odha yi koopenalti hoka Omusati gwa tulamo ookoola ne dhomookoola ndatu , noshongeyi gwa sindana po ekopi ndyoka lwotango mondjokonona yuudhano mboka.

Ospana ndjoka ye ya pehala etitatu oondjoka yokoshitopolwa Okavango Uuzilo ya dhengemo Oshana nookoola 3-2 no ya pewa ooN$10 000. Oshana osha hekelekwa nooN$4 000. Israel Shikongo na Salatiel Johannes oyo ya tulamo ookoola dhOshana.

Omusati ogwa dhenge Kavango East 1-0 poosemifinala omanga Oshikoto sha dhengemo Oshana konima sho oospana ndhika dhali dha dhana shithike pamwe ookoola 3-3.Opo ihe Oshikoto osha ka dhengamo Oshana koopenalti 4-3.

 

LEAVE A REPLY

Please enter your comment!
Please enter your name here