Oshakati osho shi na magumbo ge na ondilo moNamibia

0
229

WINDHOEK – Oshakati omo mwa monika eyo pombanda miimaliwa yokulanda omagumbo omumvo gwayi oshowo moshikako shomimvo ntano dha pitipo. Egumbo mOshakati ndyoka lyali tali landwa kooN$486,300 mo 2009 olya li tali landwa omumvo 2013 kooN$420,000 ihe egumbo olyo tuu ndika muDesemba 2014 olya li tali landithwa kooN$964,100. Mo Windhoek egumbo lyondando oyo tuu ndjoka okwa li tali kotha ooN$472, 000 momumvo 2009 nomu  Desemba 2014 egumbo ndyoka otali landithwa ngashingeyi  kooN$900,000, tashi ndika olina ombiliha nooN$64,100 okuyeleka negumbo lyuunene wa faathana naandyoka lyomOshakati.

 Yeleka egumbo lyafa ndika mOshikango, lyali tali landithwa kooN$340,000 momumvo 2009 nondando yalyo ya londo ashike pombanda sigo opoo N$600,000 mu Desemba 2014. MOshikuku egumbo ndyoka lyali tali landithwa koo N$294,000 omumvo 2009 ondando yalyo oya yi pombanda sigo opooN$458,000 muDesemba 2014.

 Shoka tashi hili omuntu Otavi, moka oshilando shika sha tameke okulanditha omagumbo omumvo 2010, konima yetungepo lyomupepo gwokuhambula Osamende gwOhorongo, oondando omolwashika odha nuka okuza  pooN$350,000 momumvo 2010 okuya poodolaN$760,000 muDesemba 2014,dhili puule okuyeleka nondando yegumbo lya faathana mOshomeya, moka egumbo lyuunene wafaathana ondando yalyo ya londo sigo opoo N$722,500 muDesemba 2014 okuza pooN$341,000 momumvo 2009.

 Oondando ndhika odhili momushangwahokololo kombinga yoondando dhomagumbo gwoMbaanga yOtango yOpashigwana gwomumvo 2014. Omushangwa nguka ogwa ndhindhilike kutya oondando dhoku landa omagumbo  miilando ya yooloka moshilongo odha kala nokuuka pombanda.Eyo pombanda moondando ndika olya li enene li vule eyo pombanda miimaliwa yoku landa omagumbo moVenduka.Oodoolopa ndhoka dha ulike eyopombanda miimaliwa yoku landa omagumbo okuyeleka noshilando sha Windhoek odha kwatelamo Arandis, Eenhana, Otavi, Ondangwa, nOmaruru.

 Miitopolwa yomuumbangalantu oondando dhomagumbo niikwamatungo odha londo pombanda nooperesenda dha pitilila pomilongo 27%omumvo aguhe ndele nando ongaaka ndhika otadhi vulika oshoka oondando odhili pokati kooN$434,000 nooN$560,000.

 Oondando mOngwediva odha yi pombanda nooperesenda 25% okuza omumvo gwayi oshowo odha londo nooperesenda 50 uule womimvo ntano dha pitipo. Ondangwa oondando dhayo dhomagumbo odha yi pombanda noopresenda 17 okuza omumvo gwapiti noondando odho tuu ndhika odha uka muule nooperesenda 142 uule womimvo ntano dha ziko.

 Rundu, oshimaliwa she shoku landa omagumbo osha yi puule nooperesenda 38 okuza omumvo gwa piti omanga ondjele yeyopombanda miimaliwa yomagumbo uule womimvo ntano dha ka londongela ogwo ooperesenda 163. Aakalimo moKatima Mulilo mboka ya landa omagumbo oye ga landa kondando ya ya pombanda nooperesenda 23% okuyeleka naamboka ya landele omagumbo omumvo gwayi moshilando shoka omanga oondando dhomagumbo moshilando shokomunkulo gwomulonga gwa Zambezi odha yi miikogo nooperesenda 120 uule womimvo ntano dha yi.

 Aambaye oondando dhomagumbo pethimbo ndika odhili pooperesenda 30 okuyeleka nomumvogu, omanga oondando odho tuu ndhoka odha londo nooperesenda 111 uule womimvo ntano dha pitipo.Oondando dhomagumbo moHenties Bay odha yi kashona pombanda ashike nooperesenda 7 okuyeleka nomumvo gwayi nonando eyo pombanda miimaliwa yokulanda egumbo moshilando shokomunkulofuta shika ogwa li ooperesenda 79 uule womimvo ntano dha ziko.MoMbundu ya Kiiyala[ Swakopmund] oondando dhomagumbo pethimbo ndika odhili owala pombanda noopersenda 7 okuyeleka nomumvo gwayi neyopombanda lyoondando odho tuu ndhoka omimvo ntano dhapiti olya ndhindhilikwa olyo ooperesenda 56 adhike.

 Luderitz oshilando shomatuliloskepa muumbungantu wevi lyOmapenda oondando odhuuka pevi nooperesenda 4 okuyeleka nomumvo gwayi nonando dha kala tadhi londo sigo opooperesenda 72 uule womimvo ntano twa pilamena. Mariental oondando dhomagumbo ge odha yi puule nooperesenda 31 okuza omumvo gwayi omanga mboka ya landele omagumbo omimvo ntano dha ziko oya landele kooperesenda 82 pombanda. Aranos oondando dhe odha londo nooperesenda 23 okuza pwaandhoka dhomumvo gwayi ihe eyo pombanda moondando olya li ooperesenda 21 uule womimvo ntano dha yi.Oondando dhomalukalwa moKaiti odha yi pombanda nooperesenda 19 ethimbo ndika omanga muule womimvo ntano dha piti oondando odha londo nooperesenda 82.

 Okahandja omagumbo oga ndilopala nooperesenda 27 pethimbo ndika okuyeleka nomumvo gwayi omanga uundilo wago wa yi puule nooperesedna 127 uule womimvo ntano dhapitipo. Gobabis ondoloopa moka aalandi yomagumbo ya gumwa kelondo lyondano yomagumbo nooperesenda dhili kohi yondjele yengushuluko sho oondando dhokulanda omagumbo dhili pombanda nooperesenda mbali okuyeleka nomumvo gwayi. Ihe nando ongaaka ekoko moondando dhomagumbo uule womimvo ntano dha yi olya li ooperesenda omilongo 96. Omanga moWindhoek oondando dhomagumbo odha hunyama nooperesenda hetatu okuza komumvo gwayi ihe eyokomeho moondando ndhika olya li ooperesenda 91 uule womimvo ntano dhapiti.

Okwa tegelelwa kutya eyokomeho momahupilo goshilongo otali ka ukitha oondando dhomagumbo pombanda, molwashoka opena ompumbwe onene yomagumbo omape ngoka taga tungwa. Shimwe ishewe okwa tengenekwa kutya  egwedhelo miihohela yoombaanga oshowo moondando dhomayakulo gopamuni  ota yi ka mweneka ekoko moondando dhomagumbo uule wokathimbo unene tuu kwaamboka opo taya landa omagumbo lwotango monkalamwenyo yawo nuumvo.

 

LEAVE A REPLY

Please enter your comment!
Please enter your name here