Peter ondume yomomufitu Okudheulilwa uukwiita

0
320

Otandi zimine kutya okudheulilwa uukwiita hoka nda piti muko pompito ndjika ,okwa li okudhigu nenge kwa ya pombanda okuyeleka nedheulo ndyoka nda pitile mulyo pOshitumba nopoKassinga.

Mokuthika kwetu mendiki lyomadheulilo lyaTobias Hainyeko momasiku 3 Mai 1978 ,otwa li twa topolwa moongundu dha yooloka.Ngame onda li nda tulwa mongundu yOondaadhi ontiyali kohi yekomando lya Hailwa Pondo, a li omulumentu gwomuthika omufupi,a mwena ye okwa li ena ontseyo yolugodhi ashike ngaashi ngame.Ongundu yoondaadhi yotango oya li tayi komandwa ku hailwa Manya ngoka a li omule kashona momuthika ye ishewe okwa li a nika onyati nokuna wo ontseyo yomalugodhi.

Uule woomwedhi hamano otwa  dheulwa nawa nawa momikalo adhihe dhiita yokudhenga ngoye to holama nenge shoka hashi ithanwa iita yoguerrilla oshowo mekondjo niikaha uuna omukwiita  wa tsakanene nomukondjithi gwoye oshipala noshipala.

Otwa longwa wo omutungilo guukwiita, elongo lyokutseya omakankameno getu ,twa longwa nkene tuna okundaadha oontanda nomahala gomutondi, okuthaneka omahala mpoka pena omutondi,okuwilika ongundu yaakwiita mokuhomona,okugandja ekwatho lyotango uuna gumwe a mona ,okutega oomboma dhaakwiita kolupadhi oshowo dhiiyenditho ngaashi omakanona nootenga oshowo nkene omukwiita ta longo niikondjitho yoludhi kehe kutya oondjembo ooshona naandhoka oondhigu.

Otwa li wo monkalo ondhigu moka kehe shimwe sha li shapumba ,kutya iikulya,omizalo dhopakwiita,oothewa,iikumbatha noshowo iipumbiwa yilwepo.Otwa tameke okudheulwa pethimbo aatondi yetu ya li taya tilitha kutya otaya ka homona oontanda dhetu oonene oshowo omahala kehe goSWAPO moAngola noZambia.Onkalo yegameno oyo ya thiminike opo tu tameke omadhewo getu gopakwiita twa tokelwa,nonando otwa ka endelela noku  gwanithapo ethimbo nale komeho.Pethimbo  ndika opo mpoka omatanga gomutondi gahomona okamba yoontauki yaKassinga nokamba ya Vietman oshowo omahala galwe.Oomwedhi ne dhotango dhokudheulwa odha li oondhigu molwa ompumbwe yiikulya.

Onkalo oya li ondhigu unene kwaamboka opo yazi  koNamibia oshoka oya li inaa ya igilila okukala inaa ya lya.Shika osha thiminike yamwe opo yakambadhale okufadhukapo oku iyakamo montanda yomadheulilo yayi momikunda na yamwe oya kambadhala okushuna komagumbo koshilongo.Shika ina ye shi ninga anuwa andola oshoka oya li ya tumwa komutondi ihe oye shiningi molwashoka mokamba kamwali sha shokulya nando.  Oshikwawo yamwe shivalelwe ya kale nondjala uule wesiku li vule limwe.

Moomwedhi mbali dha hugunina otwa kala tatu ningi omadhewo giilonga yoyene yiita ngaashi twa li twa longwa otwa tulapo ookamba dhiifekela notwe dhi homona,otwa ende  iinano iile,twa londo oondundu,twa sisila kohi yoondhalate dhomakwega twa kala uule womasiku tatu li ashike iikulya iishona,twa ndhelela,twi ilongo okuumba iishonekwa kokutya ando aakwiita yomutondi.Otwa tula wo miilonga ontseyo yetu yokundaadha omutondi mooonkalo dha yooloka dhopakwiita.Endiki lyokudheulilwa uukwiita otwe li thigipo twa pyokoka ongo aakwiita yiita yoguerrilla,iita mbyoka hayi kondjwa to dhenge omutondi ngoye to mu holama.Otwa li twa telekwa twa pya nonando hamombiga twa li ,kokutya otwa li twi ilongekidha nawa oku ka dhenga omutondi kehala lyolugodhi nenge kehe mpoka twe mu tsakaneke.

Otwa  li twapewa oondjembo dhoAK-47 oompe nooholo dhagwana oshowo oongaku dhopakwiita,nomizalo dhopakwiita,ndi tye kehe shimwe osha li oshipe.Pethimbo lyokudheulwa ngame onda li nda kala motenda nahailwa Sakaria yaAndreas[Haidenga].

Uukume wetu naye owa tameke manga twa li moKassinga,oomwedhi ooshona omanga iinatu tuminwa koTobias Hainyeko moLubango moshitopolwa shaHuila .Uukuume wetu owa kolo,unene tuu sho twa ka tulwa ishewe metanga limwe moka twa kala noku kondjitha omutondi kehala lyolugodhi ,momalugodhi ogendji.Hailwa Haidenga okwa lukila omwanamati gumwe pethimbo a li ti ilongo mendiki lyelongo mOmugulugombashe moLubango.

LEAVE A REPLY

Please enter your comment!
Please enter your name here