Mepopilo lyiimaliwa yegameno

0
286

Aanamibia oyendji oya li ya fuulwa noya li yuuvite etumba mokumona oondhila dhiita tadhi tuka kombanda yoshilandopangelo komeho gesiku lyokudhimbulwa emanguluko eti 25 lya Namibia. Oyendji oya li wo ya pandula okukala aakwashigwana yevi ndi, sho ya li ya tala iilyo yetanga Lyegameno tayi ndhelela nokudhenga olukaku pevi mepandaanda lyEmanguluko  moVenduka. Oya li woo ya kuminwa omusholondondo gwomatati ngoka geli moompungulilo dhoshilongo, gamwe gomugo gali ga ulikwa kiilyo yetanga lyegameno esiku ndyoka.Omauliko ngaka oga li wo  ga ningwa mesiku lyEmanguluko lyolyene.

Mbaka ya li ya pandula nokuuva uuntsa omolwomatanga gegameno ga li taga salutile shimwe esiku lyevalo eti 25 lyaNamibia, oya ka haluthwa iiwike iyali ya landula sho kwa tseyithwa kutya Oshikondo shEgameno otashi pewa oodola dhobiliona 7,2. Oya gandja omatompelo yati inashi pumbiwa okulongitha iimaliwa mbyoka ayihe koshikondo shuukwiita oshoka evi kali li monkalo yiita, onkene kaya uviteko kutya omolwashike omwaalu ngoka gwa gandjwa koshikondo shoka?

Okugandja uusama kombinga yiimaliwa ya pewa Oshikondo shEgameno kashili nawa, oshafa omuntu wuli moshitsimine. Ngiika pamwe omuntu owa pumbwa okupula kutya iimaliwa otayi ka longithwa shike? Ihe natango epulo ndyoka inali gwana okupulwa. Omvula yini etanga lyEgameno lya Namibia lya tungile oontanda oompe nenge tutye ookamba oompe moshilongo shika?Aakwiita ya Namibia sigo oompaka ohaya longitha  omahala omakulu ngoka ga tungilwepo kaakwiita yepangelo lyuukoloni, ookamba dhimwe ndhoka kadhali dha nuninwa okukala po sigo aluhe ndele odhali ashike oontanda dhopakathimbo nomakwena moka mwa li hamu holama aakwiita yomukolonyeki.

Etanga lya Namibia lyomombepo (eeno otuna aakwiita yomombepo] olya edhililwa mookamba ndhoka dha kulupa na odha tekauka, hali thikameke oondhila dhalyo puupale  mboka wa tungwa itaa wu kalele nenge mboka wa li hawu longithwa ashike uuna sha pumbiwa. Paushili omatanga guukoloni ga South Africa oga tula iilongitho yago yopakwiita muupale waakwashigwana mboka ngashingeyi wi ihanena oshilongo ashihe, shika otashi ti etanga lyomombepo olya pumbwa oku ikongela omahala mpoka tali tungu oontanda dhalyo dhomombepo , naashika otashi pitike oshigwana shi tsikile noku longitha uupale waakawashigwana ngaashi wa kala shito.

Oshikwawo tala omwaalu gwiimaliwa mbyoka methano ndika kutya iilongitho yopakwiita nayo ohayi kulupa, omimvo 25 dha pitipo!Molwa ashike kutya oshilongitho otenga yopakwiita itashi ti  ndjoka iha yi kulupa.Ngaashi ashike nomashina agehe hagakulupa otashi ti uuna oshinima sha kulupa oshapumbwa okupingenwapo.Nenge ngashingeyi otuna okuteglela iilongitho mbika yi kulupe opo ihe tatu yi pingenepo, shoka inashi nika oondunge.

Oko kutya omatompelo ngoka mugo gene kagena mpoka ga kankamekelwa. Muuyuni auhe iilongo ohayi ningi omathaneko gokomongula kombinga yiimaliwa yegameno taga ilongekidhile shoka tashi vulika okuningwa monakuyiwa . Shika oshili ngele owe shi talele miiningwanima mbyoka tayi inyenge muuyuni, mboka we tu kundukidha unene tuu komakuyunguto apehe nOmenenevi Afrika woo.Kapena ngoka eshi shi kutya oshike tashi vulu okuholoka muka na otashi ziilile peni.Ngaashi oondjayi dha Namibia dhe shi ulike kutya aadhimi yomulilo ihaya landa omahauto gokudhima omulilo uuna pwa holoka omulilo ndele nee ohaya kala yi ilongekidhila omililo kuyele.Ye omukulugwonale okwa popya mondjila ngoka a ti ombwa ihayi kolwa esiku lyomilema.

Natu dhimbulukweni wo, kutya egameno kali lilepo ashike iita. Opena iiponga yopaushitwe hayi holoka, nuuna mbyoka ya holoka aakwiita oyo haya inyenge momiyalu ominene oshowo nondjungu oku kwathela mboka ya gumwa kiiponga ngaambyoka.

Oshikwawo kombinga yiita, itashi ti kutya mbika otayi kondjithwa noku keelelwa ashike meni lyoongamba dhoshilongo shetu.Omumvo gwayi Iigwana Hangano , olutu ndoka lwali omuvalithi pevalo lyaNamibia , olwa li lwa pula Namibia a tume aakwiita ko Central African Republic (CAR) hoka epangelo lyali tali  kondjo okukeelela noku mweneka aatsindumbo nelandulathano. Iilonga ngaambyoka oku inyengitha omatanga oku ga thikitha koshilongo hoka itayi vulika koshilongo hashi gandja owala othilinga notiki koshikondo shasho shegameno. Shika oshali eindilo okuyakula okukwatha oshigwana shoka nenge sigo oompaka  tashi hala okutekap omolwa omakuyunguto ngoka.

Oshigwana oshishona ngaashi shetu oshina okulonga neitulemo okuhumitha komeho omahupilo gasho, ihe nando ongaaka itashi  vulika tu kale itaatu pulakene kwaashoka tashi hwalakata mooha dhetu nomuuyuni wetu, unene tuu pethimbo ndika aatondi yombili nelandulathano haya vulu okuponoka nando kapuna ngoka eya shongo, nenge momasiku ngaka sho mu na eindjipalo miilonga yuukulo.

Onkene itashi kala oshiwanawa kutse okukala twa homata oshikatalume tuna omatanga ga homatekwa uukatalume, molwashoka iita niiponga yopaushitwe ihayi tseyitha kutya oyo mbyoka tayi zi hoka oho haluka ashike kwa tsima ngoye opo ihe to kwata kwata. Aa Iraqi kaya li nomandjembo gehanagulo lyaashi ku tumbulwa , ngaashi ya li ya lundilwa , ndele oya ka haluka ashike taya yogo mombinzi yawo yene konima yokuhomonwa  kaakwiita ya Britania na America.Ya yakelwa ashike inaa ya hinda nando olye. Muuzilo wAfrika aaKenya ota ya lili konyala oosa dhaalongwa 150, oyendji aailongi mboka ya ponokelwa  manga ya kotha moUnivesiti ya Garissa, kaafekelwa iikulo ya al-Shabaab.

Ngaashi ashike miita shaampoka nenge monkalo yokuponokelwa, aaKenya ina ya mona kutya oshiponokela osheya , oya haluka ashike ontsi ya tsima. Iita ngele tayi ya muuyuni auhe ihayi monika.

Onkene aaNamibia natu kongeni etompelo limwe kutya omolwashike sha pumbiwa okushonopeka iimaliwa ya pewa egameno, ngaashi sha thanekwa kaagandji yuusama.Ndele etompelo kutya kapena iita onkene iimaliwa na yi shonopekwe olyo owala omadhiladhilo omafupi gafa ashike okandombe kuumeya uuhupi.

Oshoshili oshilongo osha pumbwa oosikola niipangelo. Osha pumbwa oondjila oombwanawa oshowo omahala omawanawa gokwiinyanyudha, okukwatha opo aagundjuka yetu ya keelelwe okuninga oonkolwe naalongi yiikulumuna.

Ihe ngele egameno lyoshigwana olya tungwa ehetenge aaponokeli otaya vulu oku hanagulapo omahala gegameno mepathimo lyeho. Onkene inatu tala ombili ndjoka tuli muyo yafa yaana oshilonga okugamenwa. Oshoka iigwana mbyoka ya kala ya mbwata mombili tayi hunga yo ina yi ilongekidha ngele sha lulu oya futu ondilo, ondilo shili onene.

Tse otu uvite kutya iimaliwa ya pewa Oshikondo shEgameno oyili mondjila okushitalela monkalo yethimbo lyetu. Inayi ziminwa shaashi pena shoka sha tegelelwa okuningwa ndele okunkondopeka  ashike okukala uupathi kwoshilongo shetu esiku kehe.Opo twaa ka kole ombwa uuna omilema dhetu adha.

 

LEAVE A REPLY

Please enter your comment!
Please enter your name here