Mupetami natango ota kwathele oshigwana she

0
311

OKATYALI – Aakalimo yomoshikandjohogololo Okatyali onkene taya mono omakwatho okuziilila mombelewa ya kansela gwoshikandjohogololo shoka.

Joseph Mupetami shino okwali eshi ulike sho oshiwike sha ziko ali a gandja elombwelo opo aanuulema ayehe ya kale ya holoka pombelewa ye,ye a tale shoka ta vulu okuningapo.

Aanuulema yomaludhi ga yoolokathana oyali ya gongala mpoka metine opo ya pulakene ketumwalaka ndyoka yali ya nuninwa ku kansela gwawo.

Mupetami okwali unene a tala ombinga yaanuulema mboka ihaaya mono natango omakwatho okuziilila kepangelo. Oyendji mboka yali ya holoka oyo mboka ihaaya kwata openzela noyendji okwali eya uvanekele kutya methimbo efupi otaya ka kala ya mona omakwatho okupitila mombelewa yawo.

Aanuulema oyali ya longekidha nawa pamwe nomauthemba gawo ga gwanapo nomOmaandaha goshiwike shika Mupetami okwali a kutha olweendo lwowina opo a fale aanuulema mbaka koshipangelo yo ya ka konakonwe molwa uulema wawo noku pewa oombapila dhomapopilo, dho dhi falwe koombelewa ndhono dhi lilepo okugandja omakwatho kaakulupe oshowo aanuulema ayehe.

Kansela Mupetami okwali a ningile aanuulema ootundi mono eya tsu omukumo nokuya kunkilila kaa ya se nande ohoni yo yaa kale yena uumbanda molwuulema mboka taya lumbu nawo, ashike naye itale yafa aantu aakwawo,yo ya kale aluhe ya simaneka omalutu gawo. Okwa kumagidha woo mboka taya tekula aanuulema yeya kwathele mukehe shoka taya vulu ,yo yeya yambidhidhe oshoka anuwa uulema kawuna mwene.

“Iilema oyindji momagumbo otayi mono iihuna,onda tokola ndi kongepo esiku lyowina mono tandi talelepo omagumbo agehe moshikandjohogololo mono muna iilema ngame ndi kwashilipaleke mwene ngele oyili ngaa mesiloshimpwiyu ewanawa,aantu oyendji mba yena iilema momagumbo ohaya kala ya holeka aantu yoludhi nduka nolundji ohaya kala owala ya edhililwa moondunda nonande paushili aantu mbano oya pumbwa ku mona ombepo noku kala woo paantu nayo ya mone kutya nani oye holike,” Mupetami ta gwedhapo ngaaka.

Okwa tsikileko tati elalakano lye okwa hala opo ayehe mboka kaayena uuyelele wa nkene taya vulu ku shangitha aanuulema yawo ya kale ya mona omauwanawa ngono haga gandjwa kepangelo,yo ya vule okukala taya ikwathele. Tati aantu oyendji momikunda kayena uuyelele kutya otaya tameke peni onkene oyena owala iilema yawo yo ihaayi mono omakwatho ngono ya nuninwa, ta gwedhapo kutya ota longo ngaashi tashi vulika okugandja uuyelele kaakalimo yomoshikandjohogololo she.

 

LEAVE A REPLY

Please enter your comment!
Please enter your name here