Peter ondume yomomufitu Okudheulilwa uukwiita kwa tsikile

0
248

Inandi vula okuhokolola oshindji kutya uukwiita mboka twa dheulilwa owa li tawu longo nawa nowino ndjoka twa pewa oyi na oshilonga sigo oosho ndjika twe yi tula miilonga kehala lyolugodhi. Ethimbo lyokutula shika miilonga olya thikana ashike sho twa ka tuminwa kehala lyolugodhi.

Ongundu moka ndali opamwe nadhilwe dhaakwiita odha thigipo ontanda yokudheulilwa aakwiita muKotoba1978.Otwa londekwa moololi dhopakwiita nokufalwa kokamba yaakwiita yaVietnam yili pokati kOndjiva nOmongwa. Moka otwa tsakanenemo nookommanda dhopombanda dhoPLAN.

Gumwe gwaambaka okwa li Omukuluntu gwoondaadhi a tseyika nawa Hailwa Isaak Pondo ya Shikongo.Okwa li omukwiita ena omukumo pethimbo  lyekondjelomanguluko. Oye etu taamba noku tu topolela moongundu dhaakwiita dha yooloka. Mokamba otwa thikimo twa hwama notwi ilongekidha oku ka dhenga aakondjithi yetu ngaashika twa longwa pethimbo lyomadheulo getu.Otwa kala mokamba moka uule wethimbo li vule oshiwike shimwe twa tegelela okupewa omalombwelo ga landulako.

Petameko lyoshiwike oshitiyali otwa li twa lombwelwa tu gongale pehala lyondhelela nokupopithwa kuHailwa Shikongo.

Okwe tu popitha kombinga yiinima oyindji ya guma onkalo yopolitika niita meni lyaNamibia.Hailwa Shikongo okwa li a zala ouniforoma yuukwiita waCuba  nokwa li a humbata ondjembo yoAK-47 ya gonywa oshowo ombistoli yo Makarov. Okwe tu indile tu kale aakwiita twi itulamo mokumangulula Namibia okupitila komulungu gwondjembo.

Okwa popi wo kombinga yomashongo ngoka twa tegelela oku tsakaneka kehala lyolugodhi. Okwe tu dhimbulukitha kutya tse aakwiita yoPLAN otuna okukala twiilongekidha okudhipaga aatondi yetu nenge tu dhipagwe kuyo.Okwa lombwele ihe aanambelewa yopevi mboka a li eende nayo opo ye tu topole moongundu dhili ne.

Ngame onda li nda tulwa mongundu yaalumentu yahamano mboka ya li yena okukalonga iilonga yuundaadhi moshitopolwa shokuuninginino shoka sha li shina oombelewa dhasho oonene mOmbadja.Oohailwa yalwe oya li ya topolelwa iitopolwa yilwe kohi yoombelewa oonene dhiitopolwa mbyoka. Ya topolelwa oshitopolwa shokuumbangalantu zilo, oshowo kuumbangalantu kokwene.Konima yokutopolelwa oongundu dhetu otwa ka tseyithilwa kutya otatu ka ya uunake komahala hoka tatu ka longela.Ngame onda li nda tulwa mongundu yaamboka taya yi koshitopolwa shokuuninginio, ihe sho ndeya ndi londe mololi okwa tiwa nandi londe moololi ndhoka dhuuka kehala lyolugodhi kuumbangalantu.

Onda li nda lombwelwa kutya ehala lyokuumbangalantu zilo okwa pumbwa aakwiita oondaadhi oyendji molwashoka okwa li taku tumwa oongundu oompe dhaakwiita. Okutuminwa kwandje kehala lyolugodhi kuumbangalantu zilo okwa etele ndje enyanyu oshowo okwa nyanyudha oohailwa yandje ngaashi Sacky na Kalute mboka ya li ya pandula sho nda tulwa mongundu yawo.

Ngame onda li nda lombwelwa mbala opo ndi ka tale iinima yandje ndi joine ongundu ndjoka yuuka kuumbangalantu zilo.Otwa londo moololi opo tu falwe koombelewa oonene dhoshitopolwa sholugodhi shokuumbangalantu zilo ndhoka dhali pOshana Shanandjili moprovinsa ya Kunene moAngola. Poombelelwa mpoka otwa thikipo mokati kuusiku.

Mokamba ndjika omo twaadha oohailwa Charles Namoloh ngoka pethimbo ndyoka a li oye omukuluntu gwaakwiita, Martin Shalli ngoka a li omukuluntu moshitopolwa shokugamena omahala kiiponokela yomombepo, konima okwa ka pewa iilonga yuukuluntu womalongekidho gokwiinyenga kwaakwiita. Omwa li wo Nabot Helao Nafidi ngoka a li Kommisala gwopapolitika moshitopolwa na Mathias Ndakolo Mbulunganga ngoka a li kommanda gwoshitopolwa  opamwe naakwiita yalwe.Pokamba mpoka otwa mono kutya aakwiita ayehe oya li haya lala momalambo goku igamena kiiponokela nenge ngoka haga ithanwa omatrencha.Yamwe yomuyo oya li miilonga yuusiku yokupatolola oku gamena ooyakwawo mboka ya kothapo.

Otandi zimine kutya okamba ndjika ya li ya kundukwa komudhingoloko gwaana omutalelo gwo itaagu vulu okukalwa inayi fuula ndje nando.Kommanda ngoka a li miilonga ongulohi ndjoka okwe tu lombwele tu heluke mo miihauto opo ihe okwe tu fala komahala getu hoka twa kalala uusiku mboka.

Manga etango inaali pita kehe gumwe okwa penduka nale. Potundi ontihetatu ookommanda dhetu odha li dha ithanwa pehala lyokukommandela okuhokololelwa kombinga yonkalo yegameno . Oshinima shika shokutseyithila ookommanda kutya onkalo oya tya ngiini osha li hashi ningwa esiku kehe.Tse otwa li twa tegelele ookommanda yetu opo ya galuke oku tu lombwela kutya oshike tuna okuninga.Manga twa tegelela otwa koneke aakwiita ya homatekwa kwaanawe taya ende popepi natse ndele ina ye tu popitha. Opo mpoka onda koneke kutya nani otwe ya mehala lyolugodhi, oshoka aakwiita yamwe yomuyo oya li ya zala omizalo dhetanga lyaakwiita ya South Africa lyuukoloni.

LEAVE A REPLY

Please enter your comment!
Please enter your name here