Shack Dwellers onkene ta pula komeho

0
219

TSANDI – Ehangano  lyaamboka yena iiyemo iishona yo kaa ye na omalukalwa natango onkene tali tungu noku ya kwathela ya vule oku mona omalukalwa gawo taga kalelele.

Shino oya holola kutya otashi ningwa ketsokumwe uvathano pokati kehangano ndika nomalelo goondolopa dha yoolokathana.

Omuhwahwameki gwehangano ndika lyo Shack dwellers Federation metalelepo lye moondoolopa ngaashi Okahao oshowo Tsandi, Heinrich Amushila, mEtitano okwali eshi yelitha kutya ehangano ndika olya totwapo nelalakano oku kwathela mboka yena iiyemo iishona opo nayo ya vule kwiimonena olukalwa yo taya tungu omagumbo gawo opo ya kale yena mpoka taya kala.

Amushila tati shino oshali sha monikamo pamapekaapeko nomayalulo kutya mboka yena iiyemo iishona otaya hupu nuudhigu no taya mono iihuna ngele tashiya pomalukalwa,oyendji ohaya kala moombashu nayalwe otaya mono iihuna kokuhiila nolundji ohaya futu iimaliwa komwedhi nonande iiyemo yawo oyili pevi elela. Tati oyali ya mono ompumbwe ndjika noya yamukula meendelelo opo ya kwathe moshinima shika.

“Ehangano ndino sho lya totwapo olyali ashike lili muushimba notwa mono kutya otwa pumbwa woo tu kale tuna iitayi koshitopolwa shaWambo,otwali tweshi pondola oku tota oongundu dha yoolokathana naaniiyemo oyendji oya li ya ulike eitulomo lyawo shono she tu pe omukumo kutya nani otatu vulu tu totepo iitayi oyindji moshilongo ashihe,ngaashingeyi konyala otwa kwatako oshilongo ashihe konyala mondoolopa kehe moNamibia omuna iilyo yehangano lyoShack dwellers yiimanga kumwe moku kondjitha onkalo yokwaahena omalukalwa,” Amushila tati ngaa.

Meme Lydia Nepolo oye gumwe gwaambono ya tunga omagumbo gawo okupitila mehangano lyo Shack dwellers. Nenyanyu lye okwali eshi yelitha kutya ye mehangano muno okwa kalamo ethimbo ele ngaashingeyi sho ali eli joina manga eli kOvenduka naasho a tembukile moTsandi okwa kala natango oshilyo. Tati okwa tunga egumbo lye moTsandi lyapwa nale nongaashingeyi oteli gwedhele li ninge enene omolwa onkalo yaanegumbo lye oshoka oyendji, nokwa hala a kale ta edhilile aantu oyendji megumbo lye.

“Kashali oshipu okuthikamithapo egumbo ndyoka oshoka opuna oonkatu odhindji hadhi endwa nongele oho sholola hashi vulika nokuli wu se uunye ashike kungame ondina eitaalo ndika kutya kokule ihaku thikwa ngula,sho kehe shimwe toshi longo ohashi ende onkatu nonkatu nonda kala ndina omukumo kutya limwe lyomomasiku ondina oku adha esindano yo ondjodhi yandje tayi adha esindano,nena ondili megumbo lyandje naakwanegumbo yandje,” Nepolo tati.

Pethimbo ndino ehangano ndino olya kwathela aaniiyemo yili pevi konyala yeli 134 miitopolwa ,manga omugoyi gomomagumbo ngono oga pwa okutungwa,gamwe oga tameka okutungwa nagamwe opo taga tamekwa. Aniiyemo iishona mbono yali ya gongala esiku ndyoka mondoolopa yaKahao oyali ya holola enyanyu lyawo taya pandula ofederation ndjika sho yi ya lilepo naashoka natango tayi tsikile nokuya kwathelwa okutunga noku imonena omalukalwa ngoka ga pumba.

Ongundu onene yaamboka taya tungu omagumbo gawo oomeme otaya holola kutya ohaya tholoma oondhopi yoyene nolundji ohaya kwathele mboka yi inekelelwa okutunga,oya fula woo omalambo gonyata omale.

Lindoina Iyambo okwa pandula ehangano ndika tati ando kalya lipo ando inaya mona omauwanawa gafa mpaka. “Omuntu kehe okwa pumbwa olukalwa,otwa kala nale tatu mono iihuna koku futa oohila,dho olundji ohadhi ende tadhi yi pombanda nonande tuna iiyemo iishona,otu uvite uuntsa nuunambano oku kala twi imonena omalukalwa getu ngaashingeyi otatu vulu okwi ithikamenapo tse yene tse tatu edhilile woo aakwanezimo nookuume ketu manga nayo taya kongo omalukalwa gawo,” Iyambo ta gwedhapo ngaaka.

Aaniiyemo iishona mbaka ohaya pungula okashona kawo opo ya vule okutunga omagumbo gawo yene nohaya ka indila omukuli kehangano lyo tali kwathele noshimaliwa shomomiimaliwa omwiindili oye mwene ha gandja omwaalu kutya okwa hala ingapi ye a vule okutameka oku tunga.

Photo Caption : Houses –  Yamwe yomaaniiyemo iishona yi itulamo miilonga noku kwathela aatungi mondoolopa yaKahao.

 

LEAVE A REPLY

Please enter your comment!
Please enter your name here