Ya nyanyukilwa omuperesidende omupe

0
208

ONDJAMBAYONGHALU – Aakalimo yomoshikandjohogololo Okankolo oya li yuulike enyanyu lyawo molwOmupresidente omupe ngono ali a ganithilwa miilonga momasiku 21 gomwedhi gwayi.

Shino oyali yeshi ulike pethimbo taya dhimbulukwa oomvula 25 dhemanguluko.

Oshituthi shino shemanguluko nonande tashi dhanwa kwa tokelwa osha li sha ningilwa momukunda hagu ithanwa Ondjambayonghalu moshikandjohogololo osho tuu shoka.

Aakalimo yomomudhingoloko ngoka oyali ya gongala momwaalu omunene nokutyapula evalo lyoshilongo.

Kansela gwoshikandjohogololo Olukonda, Darius Shikongo okwali a hokololele aanaskola mboka nayo yali ya holoka ondjokonona yoshilongo pethimbo lyiita yekondjelomanguluko nonkene aantu ya kala nokudhengwa oshowo okuhepekwa kaakolonyeki. Tati ekondjelo manguluko inali za pokapala kayela sho kashali oshipu okumangulula oshilongo shaNamibia.

Shikongo ta indile aaNamibia ya pangelwe kombili yo ya longe muukumwe oshoka muukumwe omo muna esindano. “Natu kambadhaleni tu ete omalunduluko moshilongo ngono tage tu humitha komeho tse tu kale tatu ilongele ku tseyene noku humitha komeho oshilongo shetu paliko,natu yandeni woo onkalo yokwiihola yene oshowo yokwiiyambapaleka manga yamwe taya sondjasla moshilongo shetu,” Ta gwedhapo ngaaka.

Mwene gwomukunda Ondjambayonghalu, Hafeni Mwandingi pethimbo ta popi peha lyaakwashigwana nkene yu uvite molwepangelo epe, okwa holala kutya yo oyu uvite ombili nOmupresidente Hage Geingob,noye wete kutya ayihe oyina oku enda mondjila ombwanawa ngaashi ya kala.

Mwandingi ta indile aantu ya kondjithe uukwamuhoko,yo ya kale onga omuntu namumwayina mo moshilongo mu kale omalunduluko ogendji. “Oshilongo shetu osho shimwe shoka shina omwaalu gwaantu omushona nena ngele otwi imanga kumwe atuhe otatu kala tuna ombili naayihe otayi kala yili kolutenda,omahumokomeho oga pumbiwa onkee natse momikunda dhetu otatu kondjitha okuyambulapo iitopolwa yetu tse tu mone uuwanawa owundji mboka aakwashigwana yetu ya pumbwa,” Mwandingi ta gwedhapo ngaaka.

Okwa pandula woo kiilonga iiwanawa mbyoka ookansela taya longo moshigwana,ta holola woo kutya aakwashigwana yamwe ohaya kala ye wete ookansela itaaya longo ashike oyendji otaya kambadhala oku eta omahumokomeho miikandjohogololo yawo. Ta indile ookansela dhi tsikile niilonga yadho iiwanawa dho dhi gandje omauwanawa moshigwana ngaashi hadhi shi ningi shito,ye teya indile ya longele kumwe nookansela ooyakwawo. Oongundu dhomaudhano niiyimbo odhali tadhi mwenyeke esiku naantu oya li ya nyanyukwa noya pandula epangelo epe noku halela Omundohotola Hage oonkondo nomukumo momukokomoko gwiilonga ye.

 

LEAVE A REPLY

Please enter your comment!
Please enter your name here