Aanathinge natango ya pewa omapapa

0
299

ONAYENA –  Etitano lyoshiwike sha ziko olyali esiku lyopandjokonona moshikandjolongo Onathinge, sho konyala ayehe mboka ya longa nawa koshikondo shelongo yali ya pewa omapapa shiikwatelela kiilonga yawo mbyoka ya longo omumvo gwo2014.

Oshituthi shino shomapapa oshali sha ningilwa posekundeskola yaNehale mono oosikola adhihe dhomOnathinge dhali dha holoka dho dhi tale aailongidhingi oshowo aalongidhingi.

Engathithi lyaanaskola oshowo lyaalongi olyali lya gongala nelalakano ya ninge oombangi yo ya tyapule iiyimati yiilonga yawo.

Omukuluntu gwElongo moshitopolwa shaShikoto, Lamek Kafidi naye okwali eya opo a gandje etumwalaka lye lyesiku. Pethimbo ta popitha aakwashituthi Kafidi okwali a holola etumba oshowo enyanyu lye molwiilonga iiwanawa yuudhiginini mbyono oosikola dhomOnathinge tadhi longo.

“Ondi uvite uugumbo oshoka Onathinge osho shimwe shomiikandjolongo mbyoka tayi longo nuudhiginini noshi itulamo melongo,shino omweshi holola sho mweshi ulike okupitila miizemo yomakonakono ngono gali ga shangwa,otashi gandja omukumo omwaanawa kiikandjolongo mbyono hayi longo nuuhasha opo yi kutheko oongaku yi tule elongo komeho,” Kafidi tati.

Kafidi okwa kumike aalongi oshowo aanaskola ya longe nuudhiginini,yo ya kale aluhe haya longo iilonga yawo yoskola pethimbo. Ta indile aalongi ya gandje omapukululo kaanaskola mpoka taga pumbiwa. Okwa tsikileko noku pandula oosikola ndhoka dha longa nawa ta indile woo ndhoka tadhi ende tadhi shongola dhi kuthe oshiholelwa oshiwanawa opo nadho momumvo ta guya dhiye pondondo ombwaanawa.

Inspekta gwelongo mOnathinge Naemi Amuthenu okwa ti oku uvite naye ombili oshoka Onathinge oyo yimwe yina oosikola hadhi piti nawa okuyeleka niikandjolongo yilwe moshitopolwa shaShikoto. Ta uvaneke kutya otaya longo nuudhiginini opo kaa ya shune monima yo ya kale aluhe aatango ngele tashiya pelongo, sho Oshikoto nOnathinge yi kale aluhe mokaalita okawanawa taka nyanyudha woo naavali.

Aanaskola oyali ya pewa omapapa gawo shi ikwatelela kiilonga yawo mbyoka ya longo,yamwe oyali ya pewa omakopi,iimaliwa, oonzapo,omambo oshowo oombandi.  Nuule Toini oshowo Kristofina Nakanyala ayehe taya lumbu nuulema oyali ya pewa omapapa ongaanaskola mboka taya lumbu nuulema ,noye wete kutya shoka itashi ya imbi ya kale moskola yo ya mone elongo ngaashi uunona uukwawo.

Shapaka Fannie oshowo Akwaake Kristofina oyo yali ya kangele ayehe mondondo ontimulongo omumvo gwa piti sho ya mono iitsa 42, ye vule ayehe no yeli ngaashingeyi mondondo onti-11. Ayehe oyali ya mono ooA miilongwa omugoyi noya pewa oonzapo,oombandi dhoshingoli ,omakopi noshimaliwa shooN$250,taya tsuwa omukumo ya tsikile nuudhiginini.

Jeremiah Mweendeleli omulongi pOnathinge oye ali a pewa ekopi lyomulongidhingi,Mweendeleli okwa tseyika nawa moku gandja elongo lyatya shoo kaanona no aluhe ngele omunona ku uviteko ohemu pukulula sigo eya kondjila. Osikola yaNathinge oyo yali ye ya tango sho ya kangele adhihe moshikandjolongo shika. Aavali mboka yali ya holoka esiku ndyoka oyali ya nyanyukwa moku mona aana yawo taya pewa omakopi noonzapo naashihe shoka yi ilongela.

 

LEAVE A REPLY

Please enter your comment!
Please enter your name here