Ngoloneya Kankoshi okwi ilongekidha okuyakula Oshikoto

0
249

OMUTHIYA – Henock Kankoshi kansela nale gwoshikandjohogololo Onyaanya okwa taambako nenyanyu oshinakugwanithwa shUungoloneya shoka a pewa kOmupresidende gwoshilongo Omundohotola Hage Geingob omasiku ngaka.

Kankoshi shino okwali eshi holola sho Omaandaha oshiwike shika pethimbo a pewa iipatululo yombelewa yuungoloneya woshitopolwa shaShikoto, konima sho Penda ya Ndakolo a kala ta wilike nokukwatelwa komeho ewiliko lyoshitopolwa shika.

Ya Ndakolo ngashingeyi oye Ominista yEgameno moKabinete ka Namibia..

Ya Ndakolo pethimbo a gandja iipatululo mbika ku Ngoloneya Kankoshi poombelewa dhelelo lyaShikoto ongula yOmaandaha pOmuthiya okwali a pandula Omuperesidende sho a mono shuuka opo emu ulike a ninge Ominista Yegameno, ta pandula woo omukokoli Peresidende Sam Nujoma nOmundohotola Hifikepunye Pohamba molwelelo newiliko lyawo ewanawa naasho ya eta noku kalekapo ombili moshilongo.

Ta gwedhapo kutya nonande a ulikwa ngeyi okwa holola kutya ota kala noku talelapo oshitopolwa shaShikoto ye ta tala ayihe ngele oyili ngaa kolutenda. Okwa uvaneke ta ka longa noku kwathela iitopolwa ayihe 14 moshilongo. Ya Ndakolo tati okwa kala ta wilike oshitopolwa shaShikoto uule woomvula 11,no ina mona mo nande uuwinayi washa pamwe newiliko lye ta ti oya kala taya longele kumwe nopauvathano.

Ngoloneya Kankoshi mo ku taambako iipatululo yombelwa ye ndjono iinekelelwa kOmuperesidende gwoshilongo okwa uvaneke kutya otaka longa ngaashi tashi vulika ye a tsikile mpono Ya Ndakolo a hulile ,yo ya tsikile noku humitha komeho Oshikoto.  “Otandi uvaneke tandi ka longa muuwanawa noku gandja omayakulo ngoka aakalimo yomoshitopolwa shandje ya pumbwa,otandi pandula ewiliko alihe lyoSwapo sho natango tali eta omahumokomeho miitopolwa noku kalekapo ombili yoshilongo,”Kankoshi tati ngaa.

Kankoshi okwali a tumbula kutya otaka longela kumwe naaniilonga pamwe naye,tati itaka uvitha nande gumwe moshitopolwa she nayi, nokwa gwedhapo kutya okwi ilongekidha okuyakula oshitopolwa she yo ya kalekepo ombili yoshilongo ngaashi ya kalapo. Okwa pandula woo Ya Ndakolo kiilonga ye iiwanawa a longele oshitopolwa shaShikoto uule woomvula odhindji te mu halele omayambeko omawanawa miilonga ye ayihe.

 

LEAVE A REPLY

Please enter your comment!
Please enter your name here