Okuholola omaliko ovawiliki pouyelele

0
272

Edilaadilo nonghatu oyo tai ka kufwa komutwe woshilongo Hage Geingob, na Hefolo laye meme Monica Geingos okulombwela oshiwana omavalulo eliko lavo nokuli eta pouyelele, oshiholelwa shiwa neenghono kovaleli vakwao.

Kuyele oshivike eshi, Omutwe wOshilongo owa lombwele Oparliamende kutya owa indila ehangano lyokuvalula Omambo loPrice Waterhouse Coopers opo li mu kwafele okumuvalulila nokutala kutya okuna omaliko efike peni, loo li mukwafele okulongekida oku eta pouyelele oipambele yoimaliwa yaye. No ngeenge omushangwa oo wa manifwa ote ke u shivifila oshiwana moshivike oshitivali shomwedi twa yuka.

Oshinima eshi tashi ningwa komupresidende Geingob, nonande tashi monika shafa shidjuu kovaleli vahapu, ota shi dulu yoo okumangulula ovaleli vahapu ovo va kala nokutalika ko koshiwana vafa veli moshinima sha lunga litapula.

Ngee omunhu owa tale keemwedi dinini kwa diwa oko kwali Ominista yoilonga Erkki Nghimtima ali a kandoma noshiendifo shaye shopaumwene, oshiwana osha li shina omapulo mahapu, shinasha noimaliwa oyo yahangikile poshiponga. Omhunda yoimaliwa oyo ya hangwelwe poshiponga opo, oya eta opo vahapu velipule kutya Nghimtina pamwe okwa pewa oimaliwa ya pitila kokanhu, pamwe opo a yandje eetendela kunhumba ile kungadi. Ashike ngeno oshiwana okwali sha yelelwa kutya Minista okuna ofaalama lwopoTsumeb, pamwe a landifa eengobe ile pamwe nande okandingosho ile ofitola yonhumba mOtavi ile ponhele yonhumba ya ama kombinga oko ta dilile, ngeno ita pa kala omalundilo ile okafekela shaashi keshe umwe oku wete kutya minista ota dilile kongeshefa yaye, na otashi dulika oko ta di noimaliwa.

Okupopya omaliko ota ku kwafa yoo oshiwana opo shi hakale nokulundila nokufekela kutya eshi opoloyeka yonhumba ile yongadi ta ii komesho, osheshi Omupresidende ile minista ena mo oipambuliko.

Eshi otashi kwafa opo ovaleli va ha kale vena omahangano eli mouministeli wavo, voo va lunge tave li tapula.

Omuperesidende okwa ninga vali nawa eshi eya po nomafaneko, okutala koshikumungu shedu osho tashi kufa po ombili pokati komalelo eedoolopa, epangelo, omalelo omikunda noshiwana.

Koshinima shondado yedu ili pombada neenghono, okwa kumako pefimbo la wapala. Oshoshili, omalelo eedoolopa oha eli popile kutya ohava landifa edu kondado ili pombada, shaashi oshimaliwa shokulongekida edu, oshi li pombada neenghono.

Ashike oshike mbela tashi eta opo edu lounene wo 400m² li kale ta li kosho oshimaliwa shidulife pi N$600 000 monhele yomaumbo? Onawa eshi omutwe woshilongo ta i mo eenyala moshinima omo, na oshiwana okudja poshipopiwa shaye otashi kala sha tala omesho kuye mokuteelela elunduluko.

Oshinima sheefaalama dili komadina ovanhu vehemo moshilongo nasho onawa eshi Geingob eshi tala. Mongaha, Namibia ota kendabala oku kondjifa onghalo yoluhepo, neefaalama, odili naana dimwe domeedjo da fimana ngeenge tashiya pokueta po eendja tashi pitile moku eta po eemhito doilonga noku eta eliko moshilongo.

Eefalama dihapu odili ashike moshilongo, dina oovene veli koGemany ile koSwitzerland. Eshi shi nyemateka unene shaashi, oovene veefalama edi oveli ashike koilongo yavo tava mono oshimaliwa tashi pitile unene moutaleli po, omo ova talelipo have va futu oshimaliwa momavalulu avo eembaanga koilongo yavo.

Eshi ovapashiyoni tave ya koNamibia, ova futa nale koilongo kwinya naNamibia ita mono po sha, shi dulife eshi ngeno ovatalelipo ovo tave ya tava ningi oukongo meefaalama, nokunangala meelodga ngeno tava futu oshimaliwa moshilongo.

Oshi etwa po shomupelesidende eshi oshiwa lela, unene tuu ngeenge ovakwanepangelo ova tameka nokuli nale okukonaakona oveta va tale kutya oshinima eshi ota ve shi ende ngahelipi ina shi pitila momakuyunguto.

LEAVE A REPLY

Please enter your comment!
Please enter your name here