Oondjuhwa niingulu dhe mu kutha moluhepo

0
313

ETUNDA-Omunamimvo omilongo ndatu nomugoyi ngoka ta tatekula omona omunuulema womagulu okwati okulanditha kwe oondjuhwa niingulu okwe mu kwathela noonkondo.

Micheal Johannes gwokomukunda Onanghombe moshikandjohogololo shaRuacana okwa ti ye okwali eli muupyakadhi womwanamati ngoka a valwa nuulema wokomagulu itaga zi kumwe ita vulu noku zala omunambo ashike okulanditha oondjuhwa okwe mu kwathela okufutila epango lyomwana.

Johannes okwa ti okwa kala ta longo nuudhiginini sigo a landitha oondjuhwa omathele gaali momvula opo a pangithe omwanamati.

“Okanona kandje oka valawa nuulema mboka womagulu ihaaga zi kumwe na otwali twa pumbwa oshimaliwa okumufala koshipangelo opo a ka thulwe  omagulu ga vule oku ukilila noku vula oku zala omunambo,” Johannes ati ngaaka.

Okwa ti ngashingeyi omwana ngoka ena oomvula ndatu oha zala ombulukweya noshowo ominambo ndhoka ali ihaa zala okuza kevalo.

Johannes okwa tamekele ongeshefa ye omumvo 2010, moka ali a tameke noondjuhwa dhili omilongo ne na ntano ashike ngashingeyi kehe komumvo oha landitha oondjuhwa omathele gaali.

Oondjuhwa dhe odhina oondando dha yooloka ndhoka dha tameka pomilongo ntano sigo opoodola ethele.

Kakele koondjuhwa Johanness okwa kambadhala woo opoloyeka yokutekula iingulu.

Okwa ti ye sho a putuka okwa kala ashike ehole iingulu noondjuhwa na okwa tokola opo a ninge ofaalama yiinamwenyo mbika.

“ Ofaalama yiingulu oya tameke ashike omvula ya ziko ihe ngashingeyi ondina iingulu yili omulongo nashimwe,” ati ngaaka.

Okwa ti kutya nethimbo iingulu ye otayi koko oshoka uuna kena oshimaliwa sho ku landa iikulya yiingulu oha kambadhala nee okulanditha po oondjuhwa dhe opo aka lande iikulya nomiti dhiingulu ye yi kale yi na uundjolowele.

Kakele kwaambyoka ha tekula opo a mone uuhupilo Johannes okuli woo omuniilonga mEtunda moka a kutwa okulonga mepya moshikunino ongo omuloni mepya.

Johannes okwa longitha woo ompito ndjika okwa nyenyeta  omikalo dha yamwe yomoondohotola mboka ha ya yamukala aantu nayi , tati kutya okwa uvithwa nayi ku gumwe gwoomoondohotola dhokOshakati sho ya tindi oku shayina ombapila ye, opo omwanamati ngoka a lemana a mone oshimaliwa  shoka ha shi taambwa kaanuulema.

Okwati kutya ndohotola ngoka kemushi edhina okwe mu uvitha nayi oshoka okwa tondola omwana ine mu halela uuwanawa wepangelo.

“ Ashike ngashingeyi enyenyeto ndika ondeli thikitha momakutsi ga kansela gwoshitopolwa omusimanekwa Absta Iipinge ngoka a uvaneke opo aye nasho komesho,” Johannes ati ngaaka.

Aanuulema ngashingeyi oyeli taya ka kwata oshimaliwa shili peyovi sho Omuperesidende Hage Geingob a tokola opo aakulupe naanuulema ya gwedhelwe noodola omathele gane.

Okuna egumbo lye moka eli  mo nomukulukadhi gwe noshowo oyana yaali.

 

LEAVE A REPLY

Please enter your comment!
Please enter your name here