Viivii a ekelwahi kofamili –shalongo pwa li Gwandaalele

0
544

OUTAPI- Omukiintu ngoka a ngashingeyi a simana unene ngele tashiya kepandja lyo Facebook moku ninga iiyolitha mOshiwambo ota hupu shokadhila.

Nonando ena aalanduli naaholi ye kofacebook, esimano ndika ina li mu etela sha moku kala kwesiku kehe. Shotango Mee Viivii ngaashi eshiwike nawa kaalanduli ye kofacebook okuli moluhepo lwaashi ku tumbulwa, ta hupu nuudhigu, unene tuu kombinga yolukalwa mpoka ha zi.

Viivii ngoka edhina lye lyopambelewa oye Maria Elias ando okwa li miilongo yimwe ando esimano ndika olye mu etele uuyamba, ota ti okwa ekelwahi kaakwawo.

Omunamimvo 59 okwa za kOluteyi moshikandjogoholo Okahao ihe ngashingeyi, okuli omukalimo mOutapi. Mondoolopa moka okwe ya mo nomumati gwe omuniilonga mositola yokulanditha iitungitho. Ota hokolola kutya ye kena egumbo nenge ehala ndyoka ta vulu oku ithana olukalwa lwe.

Okwi iyadha monkalo ndjika konima sho a li a thigwapo noku ekelwahi anuwa kaakwanezimo lye oshowo koyana.

Viivii ngoka eli pamwe na kuume ke komulumentu megumbo mokagumbo koshunyakwi ka ningwa noofaila ndhoka ya tula kumwe yoyene, ota hupu shokadhila. Unene tuu sho ha lala pevi lyowala inaa pu yalwa nando olyo etalashe nenge ekumbatha opo li mu gamene kuutalala. Monkalo ndjika Viivii okwa ti okwa ningamo ngashingeyi uule womimvo ntano.

 

“Kandina iilonga, ondiikwatelela kaasihenda okupalutha ndje oshowo okuzaleka ndje, otandi galikana opo omvula yaaloke oshoka ngele oshaningwa nena otenda yandje otayi yonukapo” Viivii a ti.

Viivii yina yaanona yaali okwa hokolola kutya konima yoku monika ombuto yo HIV, onkalamwenyo oya dhigupala. Konyala nookuli a se, shalongo a li a tuminwa omukadhona gwomimvo 23 ngoka emu yambulamo meso.

Elias okwa hokololele omunona nguka kutya ye okuli kepango na okonyala a ethepo okunwa omiti  molwashoka kali ena iikulya okwiipalutha.

“Gwandaalele okwa uvanekele ndje kutya ota kala nokupalutha ndje uuna ena, nokwa kumike ndje opo ndaa ethe okunwa omiti dhandje. Onda zimine ye okwa ti ota kala nokakalata kandje koshipangelo opo a dhimbuluthe ndje uuna ndina oku ka tala omiti dhandje oshowo uuna ndina oku shuna ku ndohotola,’ Elias a hokolola.

Viivii okwa ti anuwa omumwayina omukiintu okwa kala noku mu ninga onyanya  emu lundile kutya ohe mu dhenge noku mu tuka , okwa ti onkalo ndjoka oyo ye mu thiminike a thigepo egumbo lyandjawo.

 

“Omimvo dhapiti Helvy okwa kala noku monitha ndje iihuna, ta tuku ndje, ta dhenge ndje , eta tidha ndje mo megumbo, oshoka oye awike ena egumbo ewanawa moka ha vulu okulala,.Egumbo ndyoka olya li lya tungwa komwananamati Iiyambo ngoka eli omunambelewa mopolisi ya Namibia,’ Elias a ti.

Elias okwa ti okwa tembukamo megumbo nokwa kakala momapandaanda gaKahao. Moka okwi itsumo omumati ha longele mehangano lya Kambwa Trading ongo omutungi.

“Omumati gwandje okwa tokola oku ya a kale nangame motenda yandje.Konima sho a tuminwa kiilonga kOutapi okwa indile ndje opo ndi ye naye,’ osho a tsikile ehokololo lye.

Elias okwa ti nonando okuli nomumati gwe pOutapi omathimbo gamwe ohi iyadha keena nando osha shokulya.

“Onda hala oku indila Kalunga a yambeke Gwandaalele nookuume ke sho ya hupitha ndje, okwa hupitha ndje noku kwatha ndje a fa ashike omumwandje kadhona.Okwa simaneka ndje onga, ongame yina onkene kandina esiku tandi dhimbwa oku mu pandula.Oye omeho gandje naashihe shandje,”osho Elias a ti.

Elias okwa ti omukadhona nguka okwe mu zaleke nawa oshowo okwe mu kumagidha opo eethepo iikolitha nomakaya.

“Okwa lombwele ndje ndi ethe okunwa oshowo okunana omakaya, onda ethapo ayihe mbika uule woshiwike nonda uvaneke kutya itandi nu we oshowo itandi hile we omakaya. Onda hogolola okunwa iikunuwa yokugandja oonkondo molutu,”Elias a tsikile

Okwa ti olundji oha thindilwa okunwa iikolitha kaantu mboka ya hala oku mu thaneka opo ya tule omathano ngoka ko Facebook inaa ya pula epitikilo lye.

“Kakele kokunwa opena wo aantu oohandimwe mboka haya kala noku ninga ndje oshiyolitha  oshowo haya  tala ndje nondhino. Ihe nando ohandi ningi iiyolitha oshowo omandjenga, yo kayena uuthemba okutulandje  koFacebook inaandi shi hala ”

Okwa ti okwa gandja epitikilo ku yamwe opo ye mu tule koFacebook  opo ye a vule okumona omakwatho okutunga egumbo lye. Elias nomumati gwe onkene ngaa natango taya tsikile nokulala pevi motenda yawo ndjoka ya landele mositola yomuChina. Maria Elias okwa valelwa  mOkakundu,mUukwaluudhi nokwa tembukile kOluteyi yo na yina.Okwa hita osikola ye yopevi sigo ongundu ontiheyali pOluteyi. Okwa ti okwa tembukilile koVenduka mo 1977 manga ena omimvo 15 nokwa li a kala moSingela.

“Onda vala omumwandjemati ngoka a manene oondjenda  mo1982. Omumvo 1984 onda vala ishewe omumati.

Sho  Josefina Iipinge(Gwandaalele) a pulw a okwa ti okwa li ena omimvo 21 sho a tsakanene na Elias ngoka a li aadha monkalo ombwiinayi lela nokwa tokola oku mu kwatha.

“Onde mu adha ena omagulu ga zinda, ta kondjo okumona oshimaliwa oku ya koshipangelo, onde mu kwatha noku mu fala koshipangelo. Okuza mpoka okwa hokolele ndje onkalamwenyo ye. Osha li shuuvitha ndje nayi onde mu etele olukeno onkene onda tokola oku mu kwatha ngaashi ashike meme a vala ndje,’ osho Gwandaalele a ti.

Ohe mu landele omizalo dhopethimbo lye nonando ye omuntu ehole iinima iiwanawa.

Iipinge oha longele Kambwa Trading cc mOutapi, no ta tsikile natango oku kwatha Viivii. Ihe nando ongaaka ota kumike aanamutimahenda shaampoka taya iyadha opo ya kwathele Viivii a vule oku itungila egumbo.

 

LEAVE A REPLY

Please enter your comment!
Please enter your name here