Welwitschias a sindana lwotango moVodacom Cup

0
194

WINDHOEK – Ospana yorugby yopashigwana oya tsuwa omukumo kesindano lyayo lyotango muudhano wekopi lyoVodacom Olyomakaya gayi.

Ospana ndjika oyi itaala kutya oyi na ompito yoku sindana uudhano wawo mboka tawu kalako ehuliloshiwike ndika sho tayi ka tsakanena nospana yo Flacons pokapela komuperesidende Hage Geingob moVenduka. Ospana ndjika oyuudha omukumo neinekelo mwene sha landula sho ndjika ya li ya dhenge ospana yoko South Africa yedhina Limpopo Blue Bulls.

Muudhano wa yo FNB Welwitschias, ngaashi ndjika yi shiiwike nawa oya sindana lwotango okuza tuu nkene uudhano mbuka wa tamekele. Oompito adhihe mpoka Welwitschias a dhanene okwa li a dhengwa onkene Olyomakya ga yi ospana ndjika oye shi pondola okudhengamo ospana yaatalelipo ya za koshitopolwa sha Limpopo yedhina Limpopo Blue Bulls, ndjika oya li ya dhengwa  ku Namibia niitsa 24 miitsa 17, muudhano wa li wa kondekwa okuza koombinga adhihe. Kapteina gwospana ndjika ina holeka nando enyanyu lye omolwesindano ndyoka . Darryl de la Harpe okwa ti omudheuli gwawo okwa li eya lombwele kutya uudhano mboka oyena oku wu sindanapo, molwa shoka kaya li yena ompito yimwe we yaashi okudhanena esindano. “Sho tango nandi pandule aayambidhidhid yetu  mboka ya li ya holoka momwaalu omunene noku tu yambidhidha ngaashi taya vulu.Onda nyanyukwa oshoka mbaka oye tu kumike onkene otwa longo twaana ezimbuko opo tu sindane ngaaka. Shika osha ulike kutya okulonga kwetu nuudhiginini okwa longo onkene okwa yi mesindano lyetu. Ngashingeyi otatu ilongekidhile ashike omaudhano ngoka ga hupako,’ osho a ti.

Namibia okwa tulamo tango okupitila mokumatuka kwa Johannes Tromp opo konima Shaun Kaizemi okwa ka thangelamo etanga ndyoka nospana ndjika oya yi komeho niitsa iheyali monola.Aatalelipo nayo oye ke shi pondola okutulamo etanga limwe , ihe iya ka vula okuthangela ndyoka pokati kiiti. Tromp okwa ka tulamo ishewe etanga ekwawo ndyoka lya ka thangelwamo ishewe ku Kaizemi neyalulo olya ka thikama piitsa 14-3

Mominute 32 Kaizemi okwa gwedhako kiitsa sho a thangelemo openalti okupitila miitenda naashika osha fala eyalulo sigo opiitsa 17-3.

Konima yoka fudho aatalelipo oya galuka taya endelele nelalakano oku hilako iitsa mbyoka ya thigwapo nayo ihe nando ongaaka Aanamibia oya thikama ya kola no ku kambadhala opo ya tulwe ookoola odhindjhi ngaashi sha kala hashi ningwa olundji momaudhano gapiti.

Tromp ngoka a li ta dhana nawa esiku ndyoka okwa tulamo ishewe okoola moku tenteka etanga pevi noku tula iitsa yaWelwitschias komeho niitsa 22-3. Onkalo ndjika oya li ya dhiladhilitha kutya ngiika mbaka yokoLimpopo itaya ka adha we aaNamibia.Ihe Bulls oye shi pondola oku ngungumana noku ponokela aaNamibia.Oya tulamo lwaali oshowo omatanga ngaka oga thangelwamo agehe noku tula iitsa yaambaka popepi niitsa yaaNamibia.Uudhano shono wa tsikile uutile owa kwata Kaizemi ngoka a ka thangela etanga pondje ndyoka a li a pewa okuthangela mo openalti. Esindano ndika olyo etiyali ospana ya Namibia tayi dhenge ospana yoko South Africa methigathano ndika lyo Vodacom, sha landula sho ospana ya Namibia ya dhengele ospana yo Falcons omumvo 2010 niitsa 66-33. Omukalo nguka Welwitschias a longitha okuponokela  ota ye ke gu tsikila sho ta ya ka dhana nospana yo Falcons iiwike iyali tayi landula. Omanga inaa ya kadhana nospana yo Leopards ndjoka oyo ya hugunina tayi dhana naNamibia.Evi lyomapenda otali longitha uudhano mbuka ongo omukalo goku ilongekidhila uudhano wekopi lyuuyuni lyo Rugby mboka tawu ka kalako mo United Kingdom mu Septemba nuumvo.

LEAVE A REPLY

Please enter your comment!
Please enter your name here