Aapangi yomomikunda ya mono oonzapo

0
252

ONDANGWA – Aaniilonga yuundjolowele mboka haya longele momikunda moshitopolwa shaShana oya mono oonzapo oshiiwike sha ziko.

Pethimbo ya dhana oshituthipito shika Etine oshiwike shayi aayakuli mbaka oya li wo ya pewa oonzapo dhawo pOndangwa mpoka opo pwa ningilwa oshiindingili shika.

Oonzapo oye dhi pewa konima yokukala momadhewo guule woomwedhi hamano mekwatelokomeho lyomahangano  UNICEF, USAID  oshowo Uuministeli wUundjolowele nOnkalonawa. Aapangi  yomomikunda mboka ya pewa oonzapo oye li 98 ya za miikandjohogololo ayihe moshitopolwa shaShana.

Pethimbo ta popitha aapangi mbaka ngoloneya gwoshitopolwa shaShana Clemence Kashuupulwa okwa ti shino oshikando shotango sho aapangi yomomikunda ya pewa omadheulo goludhi nduka. Okwa tsikileko a ti oshitopolwa she osha thaneka okudheula aapangi yatya ngaaka yeli 100 omumvo tuuka, opo ya gwedhe komwaalu gwaamboka ya yapiti nuumvo.

“Elalakano lyaaniilonga yuukalinawa yomomikunda okugandja omayakulo kwaamboka yeli momagumbo yo itaya vulu oku ka konga omakwatho  oshowo okugandja ekwatho lyuundjolowele lyopetameko ku kehe ngoka eli pumbwa, okugandja uuyelele kombinga yomikithi ngaashi HIV/AIDS,Malaria,TB,” Kashuupulwa tati.

Okwa indile aapangi mbaka ya longe nuudhiginini no neitulomo yo ya kwathe okugandja uuyelele noku kumagidha aanamukunda ya kalekepo uundjolowele , yo ya kale aluhe taya simaneke uuyogoki.

Okwati wo elalakano lyawo okukonga omiyalu dhaanamagumbo noku tala monkalo moka yeli ngele otayi etitha ngaa omukumo oshowo enyanyu. Aapangi mbaka oya tulwapo okuhedhitha oshowo okufala omayakulo guundjolowele nuunamiti koshigwana oshowo popepi noshigwana.

Ngoloneya Kashuupulwa ta kumagidha aaniilonga yuundjolowele mboka ya ganithilwa miilonga ya yande elongitho lyiikolitha, yo yi itule aluhe miilonga yawo yo ya adhe omalalakano gawo. Teya halele omukumo noonkondo miilonga yawo yesiku. Okweya tsu woo omukumo ya simaneke uuntu womuntu.

Omukalelipo gwoUNICEF, Micaela Marques de Sousa sho a popitha oonakupita mboka esiku ndyoka okwa holola kutya moNamibia ngaashingeyi omwa dheulwa aaniilonga yuundjolowele wopetameko konyala yeli 1 500 miitopolwa yili 11, no pwa thanekwa opo iitopolwa itatu hoka inaaku mona omadheulo ku kale  kwa thikwa mbala yo iitopolwa ayihe moshilongo yi kale ya mona omadheulo guundjolowele wopetameko.

De Sousa ta ti omanenedhiladhilo ngano ogali ga hololwa mo 2010, netulomiilonga olyali lya ningwa mo 2012 sha ningilwe mOpuwo moshitopolwa shaKunene. Tati aaniilonga mbaka otaya kala taya mono omadheulo ga gwedhwapo ethimbo nethimbo.

Yamwe yomookansela dhomOshana oshowo aavali oyali ya holoka ya ninge iihoyontali noombangi dhaapangi sho taya pewa oonzapo dhawo ndhoka yi ilongela.

LEAVE A REPLY

Please enter your comment!
Please enter your name here