Kamberipa a mona odegree nande ena oulema womesho

0
250

WINDHOEK – Omunamido 27 omunaulema womesho okwa likola onghatuhongo yo Bachelor of Arts mo Industrial Psychology.

Miriam Kamberipa oo oye aeke a ya fiyo oponghatuhongo ei meumbo lavo okwa ti okwelihonga noudjuu okuhanga elalakano eli mo Universiti yaNamibia.Okwa holola nghee sha li shidjuu okumana elihongo laye.

Mokuhokolola nghee sha pula oshinwi a mone onghatu yoBachelor of Arts in Industrial Psychology, Kamberipa okwa holola nghee oshidjuu okukala omukeena mesho te lihongele moUnam.

Eshi a pewa onghatuhongo oshivike sha dja ko, oku udite okwa pondola  monghalamwenyo, unene tuu eshi eli honga noudju moNAM moWindhoek, a pita mondjila i yadi omashongo. Oilongwa noishangomwa  oi na kushangwa meendada doBraile nomokuhapupalekwa ohaku longifwa omukalo tau ifanwa Duxbury tai scanwa, oishangomwa tai dindwa opo nawa tai hapupalekwa vali meendada doBraile.

Meengulu domambo kamu na omambo oBraile opo u konaakone omishangwa mokuningifa omapekaapeko, Kamberipa okwa kala nokuleshelwa kuvakwao ye eta kwata ewi opo a dule okumana oilonga ya ye. Ta holola kutya moUniversiti kamu na omashina a kwata omawi, omambo novalongi vamwe kave hole ku mu kwafa oye aeke. Onghee okwa pandula omukwatakanifi wovanhu ve na oulema, Penadino Kandjii eshi a kalelapo omikundu dovanaulema.

Paife  ove li vavali koshitukulwa shovanhu vena oulema koUNAM, tava toloka omishangwa meendada doshipofi/ oBraile .

Kamberipa okwa hokolola onakudiwa yaye nghee a tameka ondodo yotete fiyo onhinatu pofikola yovanhu vena oulema pEluwa mOngwediva moshitukulwa shaShana, opo nawa a ka tembukila koWindhoek Institute for Special Education a twikila neilongo fiyo a pita ondodo onhimulongo 2005, nomo 2008 okwa pita ondodo onhi-12 noitwa 27.  Ova dalwa vahamo, oye aeke mepata e shi pondola okufika koUnivesiti.

Okwa hokolola momaudjuu a pita mo okushiiva oUniversiti onhele mu na oinima aishe ye li fa to pumbwa omupukululi, ehepo shaashi keshe umwe okwe lipyakidila. Okwa tonga nhumbi e lidenga nokulipuma movanhu ta ende e he wete ko vamwe vemu handukila eshi e li denga muvo, vamwe va tambula ombili e va pa molwashi elidenga muvo .

Neudo moUnam omu na ovalongwa ve na omaulema a yooloka 47, omulongo 15 vomwaava ova tambulwa neudo. Oku udite moshilonga sheyakulo e shi hokwa,  nande paife ve na eecompiuta nhano, ota yakula vahapu va pumbwa ekwafo loludi eli pefimbo la wapala. Okwa twa omukumo ovanaulema vaha fye ounye okupondola sha meenghalomwenyo davo.

 

LEAVE A REPLY

Please enter your comment!
Please enter your name here