Ohamba yovakwangali

0
235

MAYARA – Omunamido 44 Eugene Kudumo Siwombe Olomakaya la djako , okwa vaekwa a ninge ohamba onhi-21 yOvakwangali moshitukulwa shomoutokelo woKavango.

Evaeko laSiwombe omuvalulimambo oimaliwa keifano, ola ningilwa pombelewa yoipambele yomufyuululwakalo  popepi nodoolopa yaNkurenkuru i li oshinano sheekilometa 120 moutokelo woRundu.

Okwa ya ponhele yohamba yOvakwanagali, Sitentu Mpasi oo a xulifa oweenda waye momafiku 17 Deseba 2014 mepipi leedula 80.Ou manga inaafya a ulika Siwombe e mu landule mokuwilika. Ovakwangali ova kala oule weemwedi ne vehe na ohamba.

Mokutambula ko oshilonga Siwombe, okwa pula oshiwana shi longele kumwe naye mokukondjifa omashongo oo eshi kondeka. Ta ti, ngaashi e lineekelelwa oshilonga eshi okwe shi tambula nelelelo laye itali ke lididimikila omikalo dolutandu loshiwana opo a pangele aeke.

Ta weda po kutya, elelo lOvakwangali ola taalela omashongo  oluhepo li li moshiwana, okuhe na oilonga, omhumbwe yomaumbo, nomikifi.  Okwa udaneka okulongela kumwe  novaleli vopamufyuululwakalo notava lalakanene okuyambula po onghalo yoshiwana neemhito deengeshefa.

Ta kwashilipaleke oshiwana kutya ota ka longela kumwe nepangelo laNamibia okuwanifa po ondjodifaneko yokuka fika komudo 2030. Okwa lombwela oshiwana kutya mepangelo laye ota kondjele ombili yoshiwana ashishe.

Ovauyi koshivilo vahapu ova li va djala omudjalo womufyuululwakalo, mongudu yavo mwa kwatelwa ovaleli vopamufyuululwakalo, ovakwateli komesho veengeleki mwa kwatelwa nOhamba yoshitukulwa shaUkwanyama, Martha Mwadinomho Kristian Nelumbu. Oshivilo eshi osho shinene menangeko lomufyuulullwakalo wovaleli Ovakwangali. Oshivilo eshi osha li shinene momuhoko wOvakwangali onghee osha nana vahapu va dja moitukulwa aishe ivali yaKavango sha etifa vahapu vaa ha wane mongulu yoshivilo.

 

LEAVE A REPLY

Please enter your comment!
Please enter your name here