Omupolifi nohonda medipao lomukadi

0
411

ONGWEDIVA – Omhangulilo yaMangestalata waWindhoek oshivike eshi oya anya opo omulumenhu nakaume kaye kopaihole tava tamanekelwa edipao lomukulukadi womulumenhu oye tuu oo opo ve li futile mo modolongo.

Omunamido 31, John Sheetekela Werner nohonda yaye Rosalia Eliphas weedula 26, aveshe ovapolifi moCity Police, oshivike eshi ova holoka momhangu, tava tamanekelwa edipao lomukulukadi wa Werner wedina Taleni Werner omunamido 29, a shivika yoo nedina Mommie.

Oshiningwanima eshi shikumwifa, oshaningwa mEtine, 24 April 2015, osha holoka konima yeedula mbali kuyadi, eshi nantango omulumenhu oo pamwe novapolifi vakwao vatatu, vakwatelwe po, vali tava fekelelwa edipao lokaana kokamati Mandela Ramakutla keedula 17, shaningilwe mEtitatu 24 April 2013.

Kouyelele oo wa yandjwa kopolifi, nakusa Taleni Werner oshivike shadja ko okwa landula omusamane oufiku wEtine keumbo lili kolukanda Wambo Location moWindhoek, oko emu hangelela veli na Eliphas.

Omupopiliko wopolifi Inspector Slogan Matheus okwa ti, John Werner, vati okwa shinga ndele tai keumbo lohonda yaye Eliphas konima eshi omukadi emu anyena mo meumbo.

Nonande kapena naana ouyelele wa wana shaashi ava vatatu ovo aveke vali po poshingwanima, olwoodi vati ola tukuka pokati kaava vatatu sha etifa opo Taleni Werner a monifwe oshiponga neenghono komutwe nomolutu.

Omulumenhu, hano omusamane wa nakufya, vati okwa tutumbila omukadi motuwa oo ali ta di eehonde, na kali eshi apa eli, ndele temu twala keumbo lamumwaina (mumwaina John Werner).

Konima ovaka djako keumbo nasuala shaye, hano omukulukadi wa mumwaina, nokumutwala koshipangelo sha Catholic moWindhoek oko a li a tambulilwa monduda yovanhu tava ehamenene. Taleni Werner okwa xulifa ongula inene yEtivali loshivike eshi, hano konima yomafiku ane eshi oshiningwanima sha ningwa.

John Sheetekela Werner, okwa mangwa po kopolifi mEtitano lomafiku 24, April, omanga ohonda yaye ya mangwa po mOlomakaya lomafiku 25, April.

Ava vavali ova holokele momhangu, mOmaandaxa 26, April omo petameko vali tava tamanekelwa oshibofa shonghendabala yedipao ashike paife omhangulilo oyeshi lundulula noshaninga oshibofa shedipao.

Otaku hokololwa kutya omukainhu oo okwa kala nale nokupiyaaneka ohombo yooWerner na opakala pena oikolokosha mohombo ei efimbo lile.

LEAVE A REPLY

Please enter your comment!
Please enter your name here