Peter Ondume yomomufitu: Eilongekidho okuya kehala lyolugodhi

0
291
Peter Jungle Fighter

Ongundu yetu yaakwiita yoguerrilla yeli omilongo ndatu  otwa kala montanda ndjoka uule woshiwike inaatu uva nando osha kutya uunake tatu yi kehala lyolugodhi, nenge okupewa omalombwelo galwe ngaashi sha li sha uvanekwa.

Ihe konima yiiwike iyali okukala mokamba ndjoka otwa ka ithanwa kombelewa yomugandjimalombwelo gwontanda ndjoka. Mpoka otwa topolwa moongundu  ndatu ooshona . Ndhika odha li tadhi ka tuminwa koodetachment dha yooloka  kehala lyolugodhi. Oodetachment ndhika ongaashhi ndjoka yo A, B, no C.Odetachment ya A oya li kokule noombelewa oonene dhokugandja omalombwelo moshitopolwa sholugodhi moka tse twa li.

Ongundu yetu yakwiita yokundaadha oya li kohi yekommando lya Lukas Nakale [Kalute] na oya li ya tulwa kodetachment ndjoka opo ya li tayi ka dhikwapo, ya li yi na oku tseyika ongo oDetachment yOkuuzilo wokokule.Omukwiita a tseyika nawa Shikuma sha Kamati ngoka eli oBrigadier Ndjayi moNDF moVenduka nena oye a li omuwiliki gwo detachment ndjika. Oombelewa oonene dhodetachment ndjika odha li dha dhikwa pOhandabo konyala ookilometa omilongo ntano okuza koongamba dhAngola-Namibia.

Odetachment ndjika oyo ya li tayi kala ya hugunina kuuzilo  kooha noongamba dhAngola na Namibia. Oya li tayi longele moshitopolwa shoka sha kwata uuninginino wOkongo okuya sigo okoongamba dhoKavango nOwambo nale. Oya li wo tayi longo okuuka meni lyoshilongo okuya sigo omEtosha, moshitopolwa shoofaalama sha Mangetti oshowo omahala galwe meni muule waNamibia.

Konima sho twa lombwelwa kutya otatu ka longela peni kommanda gwetu okwetu lombwele tu shune komahala getu opo tu ka tegelele ishewe omalombwelo ga landulako. Konima yomasiku gaali ongundu yetu oya lombwelwa opo yi ilongekidhe okuya kodetachment yetu ompe. Naandika olya li ethimbo ndyoka tse twa kala twa tegelela, onkene inatu manapo nando ethimbo .

Otwa kutha iinima yetu noku galukila pehala opo tuu mpoka ngaashi twa li twa lombwelwa okutegelela okommanda ompe yodetachmenta yetu opo yi ye yi tu popithe. Hailwa Shikuma sha Kamati ngoka a li a pya molugodhi  pethimbo ndyoka okwe ya pehala mpoka hapu ningilwa ondhelela  a zala omuzalo gwiita omundjimbi, ena ombistoli oshowo ombandi yuukommanda, eeno okwa li a zala  nawa ongo omugandjimalombwelo gwoshili. Konima otwa ka kundana kutya Hailwa Kamati okwa adhika opo ashike a galuka okuza koUSSR hoka a li a ka dheulilwa uukwiita ishewe konima sho a li kala omukwiita momalugodhi meni lyoshilongo  ta kondjo naatondi.Tse ka twa li tu mu shi nonando okwa li ta holoka ena uukwatya wokommanda molugodhi .Kommanda gwontanda moka twa li okwa tseyitha Hailwa Shikuma nenge okwa ningi efalemo kombinga yokommanda yetu a ti nguka oye ta kala okommanda ya shigako pethimbo lyiilonga yetu kehala lyolugodhi.Hailwa Kamati ina popya oshindji pethimbo a taamba oshinakugwanithwa shika.

Okwe tu lombwele tu kuutumbe omanga inaatu tsikila nondjila yetu okuya kodetachment yetu. Okwa li ta monika ena ohoni , iitegelela nokwa li iilongekidha oku kwatela komeho aakwiita ye okuya molugodhi. Omanga twa li twa kuutumba tatu kundathana mokati ketu, omukwiita gumwe okwe ya ta matuka nokwe tu ithana atuhe opo tu hedhe kehala lyokugandjela okommando. Pehala mpaka otwa pewa iilongekidhilwa yetu mbyoka tuna okulongitha uuna tuli mehala lyolugodhi, otwa pewa oondooha dhonyama, uundini womeya wa gwedhwapo, omizalo dhuukwiita omipe, oompunda dhokulalamo, iikuti ya gwedhwapo oshowo oomboma dhopeke[handgrenades. Aakwiita aape mboka ya li yena okupewa oondjembo dhomashina dha li dha tseyika nawa Rebekka oya kuthwa ooAK-47 nokupewa oondjembo dhomashina oshowo oya pewa oobazooka nenge o RPG-7. Nonando otwa li aakwiita aape  inatu kala ando tuna uumbanda kombinga yomalugodhi ngoka tatu ka taalela. Ka twa li wo ando twa tila oshilanduli shoku kutha ombinga miita okukondjitha Oombulu nomakakunya meni lyoshilongo.Konima yokuzalekwa omahomato oshowo ashihe shoka twa pumbwa , ehalo lyetu olya li oondyoka opo tu ye tuukilila noku ka kondjitha omutondi okumangulula oshilongo shetu.Omanga inaatu thigapo ontanda ndjoka otwa li tatu imbi omaimbilo gekondjelomanguluko ngoka twali twi ilongo pethimbo twali tatu dheulilwa uukwiita momanongelo oshowo palwe moAngola okuulika kutya tse otwa tokola na otuna omukumo.

Otwa thigipo ontanda ndjoka okuya kodetachment yetu omanga ethimbo lyomwiha inaali adha na otwa thiki kehala lyodetachment A pOshana sha Mwashekele kongulohi .Pethimbo ndyoka Hailwa Lazarus Shihepo Hamutele oye kwali okommanda yodetachment A ye okwa li wo opo a thiki moAngola okuza komadhewo gopakwiita na okwa li a pingenepo Hailwa Epaphras”Denga ‘ Ndaitwah[Oshikulo sha pandulilwe]. Sho nda lengalenga onda koneke kutya opwa li ashike aakwiita ye li omilongo ndatu modetachment.Omukwiita ngoka etu tsakaneke posheelo shontanda okwe tu fala pehala lyokugandjelwa okommanda nenge elombwelo, mpoka twaadha okommanda yongundu ndjoka ya li miilonga ethimbo ndyoka.

LEAVE A REPLY

Please enter your comment!
Please enter your name here