Welwitschias okwi ilongekidha nawa

0
255

WINDHOEK – “Otatu tsikile nomukalo ngoka twa longo nago sho twa sindana uudhano wa ziko, na otatu kumike aadhani opo ya lalakanene okudhana nawa muudhano uyali wa hugunina opo tu manithe uudhano mbuka mombepo ya hwama’ Ndhika oohapu dhomudheuli gwospana yopashigwana yoRugby, Henry Kemp  komeho guudhano wawo uutiyali wa hugunina mboka taya ka dhana nospana yoFalcons Etitano oshiwike shika pokapale korugby ka Hage Geingob moVenduka.

Ospana ya Namibia yo rugby oya fa ya tula konima etameko lyawo lya li inaali kola muudhano wekopi lyoVodacom, sho ndjika ya kala tayi dhengwa momaudhano agehe gopetameko. Ihe ospana ndjika oye ke shi pondola okudhenga ospana yo Assupol Limpopo Blue Bulls oshiwike shayi.

Ospana yo FNB Welwitschias ndjoka ngashingeyi yili nawa mokudhana otayi tsakanene nospana yoFalcons pokapale kaHage Geingob mEtitano oshiwike shika omanga inaa yi manitha ekuthombinga lyayo methigathano lyoVodacom sho tayi ka dhana nospana yo Leopards Rugby XV, konima yoshiwike shimwe. Uudhano mbuka otawu ka kala woo pokapale oko tuu haka.

Omudheuli gwospana ndjika, Henry Kemp okuna etegameno kutya ospana ye otayi ka longa nawa muudhano mbuka uyali wa hupako na okwa itaala kutya aadhani ye oya tula konima omadhengo ngoka ya li ya pewa momaudhano gopetameko muudhano mbuka.

Okwa ti ospana oya li ya longo noku ilongekidha nawa moshiwike shoka sha landula udhano wayo nospana yo Assupol Limpopo Blue Bulls sho shika osho she yi etele esindano ndyoka.

“Shika osho iilonga tayi tsikile otwa kambadhala oku kandulapo uunima wumwe uushona petameko naashika osha kwathele  unene tuu pethimbo lyuudhano moka tse twa li twa sindana lwotango, oshoka omukalo ngoka twa longitha ogwe tu pe ompito opo tu kale otse tu li komeho mewiliko lyeinyengo lyetanga oshowo okukala otse tuna etanga ethimbo olindji. Omuwiliki gwomalanditho nomatseyitho gomayakulo moFNB, Madri Frewer, okwa tanga ospana a ti “Ekopi lyo Vodacom otali gandja ompito ombwaanawa kospana ya Namibia opo yi ilongekidhile uudhano wopaigwana woRugby, onkene tse otatu tsikile oku yambidhidha uudhano worugby moshilongo.”

Nonando omwaalu gwaatali ogwa kala tagu shuna pevi pomaudhano, shika Frewer okwa ti osha etwa komvula ndjoka ya kala hayi loko pethimbo lyuudhano, ihe nando ongaaka okwa ti oya pandula omafamilia oshowo aantu ayehe mboka ya li ya holoka pokapale okuya ya tale uudhano.

“Omakwatathano oga etwapo  piiningwanima ngaashi shoka sho Kick-for-Cash okusindana ooN$1 000 noshowo sho ooDJ dha li dha gandja iinima yi na sha norugby kwaamboka ya li taya tala uudhano, naashika osha fala ekalepo lyaatali oyendji pomathigathano ngaka pombanda lela.

“Ngele owuli moshilando Etitano ndika  li ninga esiku lyokupitamo megumbo . Otwa tegelela uudhano wa hugunina momasiku 8 Mai opo aatali oyendji ya holoke okugandja eyambidhidho enene kospana yopashigwana.

 

LEAVE A REPLY

Please enter your comment!
Please enter your name here