Iikombo imwe ishewe ya lika komanima aniwa

0
285

ONYAANYA – Aakalimo yomomukunda Onandjamba moshikandjohogololo Onyaanya oyali ya kanitha yimwe yomiikombo yawo mbyono yaashi kutya oya likapo koshike.  Taya ti iikombo oya lika owala iinima yomepunda yo onyama tayi thigalapo.

Meme Abia Nambahu okwa hokolola kutya itatu yomiikombo ye oyali ya penduka ya sa omanga iyali ya ehamekwa.  “Ongulonene yEtine manga nda adhika tandi zala te yi kiilonga uunona wandje owi ithana ndje ndi ye ndi ka tale shoka shaningwa koshigunda,ondali nda adha iikombo mbyoka ya lika ya kangawala moshigunda, yo mbi ya kalapo yi na omwenyo otayi lili owala,” Nambahu tati ngaaka.

Ta hokolola kutya sho ya kambadhala nokukonakona oyali ya mono omakondo gaza moshigunda moka guuka kegumbo lyopuushiinda, sho anuwa ya yi poshigunda shaandjamushiinda oya adha iikombo tayi lili owala yo ya hala oku gwayako koshigunda, sho ya ka tala nani omuna natango iyali ya lika.

“Uunona owa tsikile wa landula omakondo ngoka taga monika omanene, oyali ya adha omanima gafa oombwa ashike itoti oombwa oshoka omanene ge vule oombwa go otaga monika gena uukwatya tawu limbilike,omanima ngano otaga kunduluka owala nomukunda gwetu go otaga limo owala iinima yomepunda lyiikombo,” ta gwedhapo ngaaka.

Mee Nambahu tati ngaashingeyi oyena uutile oshoka omanima ogeli owala momukunda gwawo go kaa ge shiwike kutya omakwashike nonande taga monika gafa oombwa, go ogena omakondo omanene. Tati iimuna koshigunda ohayi lala owala tayi lili tashi ulike kutya omanima ngano ina gaya kokule go ohaga galuka owala uusiku ngele aantu ya ka lala.

Ta gwedhapo kutya onyama yiikombo ndyoka ya hupapo otaye yi fikepo, oshoka kayeshi shoka sha thigwamo komanima ngoka, tati pamwe oya thigilwa nuuzigo ngaashi omanima kaa ge shiwike kutya omakwashike nonande taga monika gafa oombwa dhomikondo ominene.

 

 

LEAVE A REPLY

Please enter your comment!
Please enter your name here