A dhipagwa medhina lyokomindamba

0
335

ONGWEDIVA- Oshiwike shazako opolisi mOhangwena oyali ya manga po omulumentu gwepipi lyopokati sho anuwa a tsu nokudhipaga omulumentu omukwawo ndele konima temu tete iilyo yopaivalitho.

Oshiningwanima shika oshali shaningilwa pomukunda gwedhina Ehoma moshikandjohogololo Omulonga moHangwena ongulohi yOlyomakaya ga ziko.

Okwa hokololwa kutya omufekelwa, oye Silas Shilamba omunamimvo 26 a zile okumukunda Ongudi moshikandjohogololo Okongo.

Shilamba anuwa okwali a hokololwa a tete Lazarus Hangula iilyo ye mbyoka na okwa li woo aniwa a kwatwa netumwalaka mongodhi tali ti: “shoka wa tuma ndje ondeshi mona”.

Uuyelele mboka wa gandjwa otawu ti kutya Shilamba okwa kwata Hangula gwomimvo omilongo 44 ndele te mutsu nombele yomolumpangwa montulo sigo tasi.

Hangula sho asi ye Shilamba anuwa ote mu tete omunino aguhe, te mu tete wo ishewe uulumentu niilyo ikwao yopaivalitho.

“Okwa thigi nee omudhimba ngoka gwa pombagulwa mpoka ye ta tsikile nondjila ye moka a ka tsakaneka omukiintu gumwe noku kambadhala oku mu kwata koonkondo,” onzo ya lombwele Kundana.

Onzo oyo tuu ndjoka oya ti kutya sho omulumentu nguka a kutha mo ombele okwa tete omukiintu nguka peke ihe omukiintu okwe mu nyenge oonkondo sigo ta fadhuka po.

Omukiintu okwa li a taambelwa moshipangelo moka ali a hokolola kutya okwali ta kondjithwa ku Shilamba a lale naye sigo tashi ya ponkatu mpoka emutete nombele.

Konima anuwa opo nee she keya puuyelele kutya Shilamba oye tuu ngoka, oye kwali a monika lwa hugunina ta ende na Hangula ngoka ali kee wetike pethimbo mpoka.

Osha li sha pula opolisi uule wesiku noowili odhindji opo omulumentu nguka a kwatwe oshika okwa a dhika nale a enda omikunda dha adha pu ne.

Kansela gwoshikandjohogololo shaMulonga Erickson Ndawanifa ngoka uuvithwa nayi koshingwanima shika okwa nyeyeta kutya ando opwali puna opolisi yili moshikandjohogololo nena aalongo yomiyonena otaya kala ya mbandapala na otaya kwatwa meendelelo.

Ndawanifa okwati ye ita popile nande oshiningwanima shinyanyalitha shoka sha ningilwa aakalimo yomoshikandjohogololo she.

Ta indile Uuministeli wEpopilo lyoshilongo opo wu indjipaleke oombelewa dhopolisi moNamibia opo aantu yambandale okulonga omiyonena ,sho shi kwathele okumanga aalongi yiimbuluma pethimbo.

Ashike shika Ndawanifa okwati iiningwanima ya tya ngaaka ite yi  popile no kena nando esiku eke yi pitike moshikandjohogololo she.

Okwati kutya moshikandjohogololo she kamuna nando ombelewa yimwe yopolisi nonando omuna aakalimo ye vulithe pomwaalu gwomayovi  32 500.

Okwa ti ngashingeyi opolisi ndjoka hayi tondokele moshikandjohogololo moka oyo kOndobe ndjoka woo yi na eshongo lyiihauto, olundji aniwa ohaya kala kaa yena ohauto oshoka iihauto inayi gwana.

Nena shoka Kansela okwati otashi gandja ethimbo lyagwana kookalyamupombo ya vule okumatuka po noku ningila aakwashigwana yalwe omuyonena.

“Moshikandjohogololo shika iimbuluma yoku ekelahi uunona nomakwato nkonga oyili pombanda uunene  ihe aantu mbaka ihaya monika nuupu oshoka otashi pula ethimbo opolisi oku yamona,” Ndawanifa.

“Oshinima shika otashi yemateke noonkondo notashi nyanyalitha uunene, Oshili omuntu to kutula omuntu mukweni omunino, tomu tete uulumentu we? Onda yemata nayi,” Ndawanifa ati ngaaka.

Oshiningwanima shika oshali sha kolekwa woo komupopiliko gwopolisi moHangwena, Abner Iitumba.

Ngoka a koleke kutya omufekelwa okuli modholongo natango na omakonaakono gopolisi otaga tsikile.

 

LEAVE A REPLY

Please enter your comment!
Please enter your name here