Omalidipao a ninga ahapu- omolwashike?

0
305

Oshilongo shetu Namibia osho vati edu lomapendafule, ashike kombinga imwe shama owa tale oiningwanima yamo oto hale utye edu lovanhu vena ondende, olwisho lii, okahalu, oshoyo ovanhu va kanifa oshinge shounhu pamwe neteelelo. Oukwatya woufule ohau limonikila, nomapenda alushe keshe apa eli okwa teelela oku li amena komadiladilo madjuu, kehandu lapitilila oshoyo komahongo pukifo omewangadjo.

Ondjungu yomapendafule aa a lwila oshilongo shetu inatu hala ashike  ixulile meyeeko lomauta, ndele nena otwa pumbwa natango omapenda aa taa kufa oshilongo monghalo yoku hena ouyuki, oluhepo, ondjala, omikifi, omadiladilo oupwidi, omahepekafano, omalidipao, ekupuleshi louhanana, omakwatonghonga ounona vashona noomeme, oumbudi oshoyo ekengelelafano.

Paku tala oinima, ndadi noku tumbula oyo imwe tai ninginifa oshilongo shetu mengwangwano oshoyo monghalo ei iheshi yopanhu. Omafiku  nomafiku, ovili novili, oshivike noshike, omwedi nomwedi keshe moshilongo shetu ito dulu oku kala ino uda oshimbuluma shaningwa mokati kovanhu ava have li ufana omapenda. Omapenda fiku limwe oo ngoo taa dipaa pamwe ovakulukadi vavo voo tave li dipaa, omapenda oo ngoo ta efele oshilongo ondjala nounona va ninga kakombo lilifa kadi laalula. Ounona ava tava ekeleshi ouhanana ohava di peni hano? Hamomaumbo ngoo omapendafule a Namibia. Oupendafule wetu openi hano vakwetu?

Oshinima sha duka nena medu lomapendafule osho oku lidipaa oshoyo oku dipaa. Omakanda aa ena oku amena omeme nounona okwa ninga fimba ina ongodi moku dipaa ovakainhu. Onghalo yoku li dipaa nayo oya ninga onhiko mokati komapupi aeshe. Opa pumbwa exwaxwameko la kwata moiti opo ku kelelwe omafyo mokati kovanhu voshilongo shetu, oshilongo osha pumbwa omandiki exungomwenyo taa longo eevili omilongo mbali nhane.

Ovanhu vahapu veli dipaa vamwe va fiyapo omikanda daashi she ve li dipaifa, shimwe toshi uduko, shimwe ito shi uduko nande nande. Lunga vamwe va kendabala oku li kufa omwenyo ndele tava popiwa navo, ova popya kutya opena omawi ovanhu vakwao oo hae va lombwele ve li kufe omwenyo. Eshi tashi ku mwifa apa osheshi kutya, mbela oshike omunhu ta lombwelwa e ke li kufe omwenyo  kewi ndele ta dulika kewi olo, fiku limwe ewi keshi nau temu lombwele nokuli. Oha kala nee a tila pamwe ile ote shi ningile shike?

Nongeenge nee okwa lombwelwa kewi olo, mbela omolwashike ita dulu oku pula oo tadi ewi kutya omolwashike ena oku li ningila omunyonena mwene. Omolwashike mbela omunhu ita dulu oku lombwela omunhu ou tadi ewi oye eke likufe omwenyo ponhele ya ye?. Ovanhu vetu vamwe vati ova lombwelwa vaka dipae ounona, ovashamane oshoyo ovakulukadi vavo. Oixuna oifike peni kombada yedu?

VaNamibia ovaholike, opena ngoo omunhu ena eenghono oku findikila mukwao mefyo, ile oku hanaunapo onghalamwenyo yamukwao, nongeenge okuna umwe ena ohafela, okwe ipewa kulye? Onda hala oku lombwela ovatekulu vakwetu ava veudite omawi ile tave keuda omawi tae va lombwele veke li kufe omwenyo kutya, inatu pumbwa tu pwilikine komawi omewangadjo, ashike ngeenge owe li udu li pula ombaxu nokavava kutya onelalakano lashike una oku shiningila. Popya ndele to nyamukula ngaashi wa pewa okanya u popye. Efimbo onena omunhu keshe taka uda ewi tali popi kuye eli pule yoo lifatulule elalakano lasho noku pula kutya omuna ouwa washike. Inatu pumbwa tu ninge eshi hatu lombwelwa koifalakanena ndele tai tu pondola fiyo hatu kanifa eemwenyo detu moinima ihafele.

Pexulilo apa onda hala ndi lombwele ovaholike vakwetu kutya oshinima shomawi taapopi movanhu itashi tula ashike oshilongo medundakano, ashike otashi hongo ounona vetu oumbudi noku hena oshili. Ounona otava dulu oku ninga oimbuluma ngaashi oku dipaa ndele tavati ova uda omawi ta eva lombwele va dipae ngadi ile nhumba nonande ihapa kala naanaa oumbangi.

Oshiwana oshiholike natu kale yoo moshili, tu ha kale ashike ovahondami moinima ei itai tungu oshilongo. Omolwashike mbela omawi ha eya ashike neenghundana defyo ponhele e uye neenghundana dombili. Efyo kali shii oshikulya, loo kali shii oshikunwa, natu ude omawi taapopi ombili ponhele yedipao. Ombili nai kale moshiwana shaNamibia!

 

LEAVE A REPLY

Please enter your comment!
Please enter your name here