Peter Ondume yOmomufitu Olweendo oku ka dhika ontanda yetu

0
275

Kommanda gwoPlatoon  ndjoka, edhina lye lyoshili inaandi li tseya okwa li ta monika a fa a kala etu tegelela.Oshoka okwetu fala mbala pehala mpoka tse twa li tuna okukala. Kommanda nguka okwa li ena ondjembo ye yoAK-47 ya longwa moRussia okwa li wo ena oomboma dhopeke mepaya lye. Okwa li a zala omuzalo guukwiita gwa luudha go ogwa tuuka. Eholokepo lye olya lundulula omadhiladhilo gandje kombinga yonkalelo yiita mbyoka twa li twa tegelela. Konima yokuya pomahala getu ngaashi etu lomwbele Kommanda nguka okwa ithana Kommanda gwongundu yetu noku ke mu pa ehokololo lyuudha kombinga yonkalo yegameno ndjoka ya li momudhingoloko ngoka.

Otwa li twa tegelela neitulemo opo konima Kommanda gwetu eye etu hokololele kombinga yonkalo yegameno moshitopolwa, ndele ye ka li iipula nasho na okwe ke tu hokololela ashike ashihe ongula yesiku lya landula. Ongula ndjoka tse otwa tameke oku opaleka ehala lyetu nokufula iilambo moka aakwiita hatu holama, konima sho Kommanda gwetu  a zipo putse. Kommanda gwongundu yetu okwa li etu lombwele kutya, aakwiita ashike yaali yena okukala melambo limwe lyokugamena aakwiita, okwa li  a tsikileko ati inashi pumbiwa tu kale tatu popi muule pethimbo lyokongulohi.Pethimbo tweya mokamba ndjoka olya li ethimbo lyomvula  onkene evi olya li lya tuta unene. Pethimbo olyo tuu ndyoka ngame onda li nda ningi omasiku gaali inaandi iyoga na okwa li tandi nyu olutu aluhe molwoongaga. Omvula oya li yetu yonene okuthika kwetu moshitopolwa shoka.Omalambo getu gokwiigamena oguudha omeya oshoka omvula oya tsikile tayi loko unene naashika oshetu thiminike opo tu lale pondje yiilambo mbika, unene tuu sho twa koneke kutya omvula otayi kala oshitopolwa shonkalamwenyo yetu omanga tuli mehala lyomalugodhi.

Ongomukwiita gwoguerrilla paithano onda koneke kutya omvula oshinima oshiwanawa kutse oshoka oyali tayi siikile oompadhi dhetu unene opo kaadhi monike kaatondi yetu uuna tse twe ya homona no tuna oku ka fudhapo kashona.Onkene kandali we nda pumbwa okukala nomaipulo kombinga ya yo.

Oohailwa yalwe mboka ya li popepi kaya li ya hala okutya sha kombinga yomvula no ya li ya hogolola okupopya kombinga yuunene wootenda ndhoka twali twapewa. Oya li ya ti ndhika odha li unene ooshona no inadhi vula okutu gamena komvula.Hailwa Namuxwika na Kaunda oya gandja ombedhi kaahambudhi yootenda ndhika ya ti  mbaka oya hondjo iinima itaa yi kwatha sha, unene sho ndhika inaadhi vula okugamena mboka ta ye dhi longitha.

Pethimbo ndyoka ngame onda li tandi ipopile kombinga yaashoka tatu ka kala twa taalela meni lyoshilongo unene tuu sho tse atuhe twali aape mehala moka twali twa tumwa oku ka longela.

Omvula sho ya sheka onda ende pomahala goohailwa tandi pula kutya oye yi uvitile ngiini, oyendji kaya li taya ipula nayo ndele oya li ya hala noku halelela okutaaguluka oongamba okuya moNamibia oku ka kondjitha omutondi gwawo.

Hailwa Sacky ngoka a popi kutya oshapumbiwa opo tse tu endelele oku kalola owino wetu wiita okwa ti ye okulokwa okwe kwiigilila unene tuu sho a li ha litha oongombe dhaHe muule momakuti gAngola.

Omolwowino ndjika Hailwa Sacky okwa li eshi okuzapo nokuyapo, onkene omukumo gwe nombepo ye yaa nuumbanda oya li ye tu nwethamo unene tuu sho twa ka tameka omalugodhi momakuti nomiiheke ya Namibia.Otandi dhimbulukwa nkene Hailwa Sacky a li ena omukumo pethimbo sho twali tatu dheulwa unene uuna pwa li pwaana iikulya ya gwana. Okwa li ha kala iitulamo momadhewo ngaashi ashike uuna ndoka pena iikulya ya gwana nenge uuna ndoka aadheulwa ya li ya lya shagwana esiku kehe..

Esiku etiyali okukala pokamba ndjoka otwa kala tuuvite omingungumo dhoondjembo oonene tadhi umbu koongamba dhaAngola na Namibia. Otwa li twa lombwelwa kutya oondjembo ndhoka odhaakwiita ooyakwetu mboka ya ponokele omutondi meni lyaNamibia okuhanagulapo okamba yopakathimbo ndjoka a li ta tungu kooha dhoongamba meni lyaNamibia.Aakwiita mboka ya li ya tumwa oku ka nkondopeka etanga ndyoka lya li lya tumwa tango koongamba oya li ya galuka kuyele esiku etitatu lyetu okukala mokamba ndjoka. Oya li ye ya ya humbata oohailwa yaali mboka ya ehamekwa. Tse aakwiita aape otwa li twa lombwelwa tu kale ashike pomahala getu.Ngiika otwa lombwelwa ngaaka opo twaa mone aakwiita mboka yeehamekwa.Otwa koneke kutya mboka ya galuka oya li taya ligolelwa ishewe opwa li aakwiita taya papatelathana unene pokati kaamboka ya li ya kala mokamba naamboka ya li ya galuka kehala lyolugodhi.

Okupapatelathana okwa tsikile tashi ulike kutya olugodhi olwa li lweende nawa. Ihe ngame onda li ndina epulo kutya ngele nduka olwa ende nawa omolwashike inaatu pitikwa tu popithtathane naamboka ya zi kolugodhi. Ihe eyamukulo kepulo ndika olya ka adha ndje esiku lya landula sho twa tseyithilwa kutya aluhe uuna aakwiita ya galuka molugodhi , mbaka kaye na okukwatathana naamboka aape sigo uuna ndoka Kommanda gwontanda a pewa ehokololo nkene olugodhi lwa li lweende.

Manga twa li twa tegelela onda mono aakwiita yaali ya zala omizalo dhaakwiita ya South Afrika yo ishewe oya li ya humbata oondjembo dhi vule yimwe okuulika kutya ndhoka oye dhi yugu miikaha yaatondi.

Konima aakwiita mbaka oya ka pitikwa okutu popitha, na oya li ya hokolola nkene olugodhi yelu enditha nawa shono ya dhipaga aatondi yetu oyendji noku yugako iikondjitho. Ya li ya hokolola kutya oya mono sho iilumbu yimwe ya li ya sile momulilo, naasho yimwe ya kala noku kugagana pethimbo lyoshiponokela shoka. Tse otwa li twa hala okuuva oshindji kombinga yaatondi yetu nkene ya dhengwa , na ka twali naanaa tuna ohokwe yokuuva kutya yangapi yomoohailwa yetu ya sile polugodhi ndoka nenge ya ehamekelwa po.

Tse otwa li twa homata nawa lela na otwa li tuuvite kutya otwiilongekidha oku ka dhenga oombulu nomakakunya uuna twa yi moNamibia.

Mokamba ndjoka otwa kalamo omasiku gatatu omanga inaatu zamo oku ka dhika ontanda yetu yene pomukunda Ohandabo. Otwa li twa ithanwa ku Kommanda gwetu Kamati ngoka a igidha kutya Iita ota yi tsikile nesindano oshili.Kamati okwe tu lombwele kutya iita oya yaga kegonga moNamibia oshowo koongamba dhAngola onkene tse aakwiita yoPLAN otuna okuka kondjitha omutondi. Okwe tu lombwele kutya ye ite kiidhidhimikila aakatalume mboka taya ka hala okufadhukapo olugodhi. Okwe tu lombwele kutya otuna okukala twiilongekidha okudhipaga aatondi yetu nenge okudhipagwa kuyo. Pethimbo Kommanda a popi atuhe otwa li twa mwena thilu, nopethimbo ndyoka onda li nda dhimbulukwa olugodhi lwetu pOshitumba sho twa kondjele noongangala dha UNITA, mpoka ngame nda mwene omudhimba gwomukwiita gwaUnita gwa fikwapo oshowo omidhimba odhindji ndhoka dha li dha halakana pehala lyolugodhi esiku ndyoka. Ihe pethimbo ndyoka onda li ndishishi kutya ngashingeyi ngame onda zalekwa owino nontseyo yiita okuyeleka shono nda lwile olugodhi pOshitumba naakwiita yaUnita.

 

LEAVE A REPLY

Please enter your comment!
Please enter your name here