Shitembi a laleke AshGold nomahodhi

0
222

Omudhani a pewa oshitalendi muudhano wetanga lyokoompadhi, Petrus ‘Dancing Shoes’ Shitembi okwa laleke ookuume ke mospana yomoPremier Liha ya Ghana yedhina AshGold opo a shune kospana ye Amazulu moSouth Africa oshiwike shayi.

Omudhani gwomokati kokapale ngoka a yelwa yelwa koyendji okwa li a kengeleka pethimbo a topoka naadhani ooyakwawo Etine oshiwike shapiti.Shitembi okwa li ta dhanene the “Miners”, ngaashi ospana ya AshGold yi shiwike nawa moGhana. Okwa li ta dhana molupe lwohehela mospana ndjoka uule woomwedhi heyali. Neuvathano lyoku hehelwa kwe olya thiki pehulilo onkene okuna okushuna kospana ye Amazulu moSouth Africa ndjoka ya li ye mu gandja koloana koAshGold.

AshGold, ospana yi li pombanda melandulathano lyoliha ya Ghana pethimbo ndjika opo ashike ya tameke, naandjika otayi tsikile nokudhana uudhano wayo yaana Shitembi mokati kayo. Shitembi omunamimvo 22 okwa tulamo ookoola mbali pethimbo a dhanene ospana ndjika  naasho a kala moGhana.

“Ne ongundu yaadhani yuudha iitalendi, nomuna oshindji okulonga monakuyiwa. Ngele ando ondi thithikile ondiwete oyendji yomune tamu yi komahala nomahala meithano lyeni lyuudhano wetanga lyokoompadhi,” osho omudhani gwa Namibia ngoka a dhanena oshilongo she okuza pevi sigo oposipana yopombanda a ti.

“Esimaneko ndyoka nde mu simaneka nalyo, eiyuvo ewanawa ndyoka he kala ndina ngele nde mu tala sho tamu dhana oli vule enyanyu enene.Ne kamu shi ashike ookuume kandje ihe omwa fa aamwamemati oshowo efamilia lyandje. Osha li oshinima oshiwanawa oku mu tseya pethimbo nde ya okumu joina.

“Eyambidhidho alihe nda mono kune olya li ekumithi. Ngele ando okwa li ongame handi tokola, ondali nda hala okukala mpaka sigo ethimbo lyuudhano woliha yeni otali puko, ihe onkalo oya thiminike ndje opo ndi shune kegumbo. Ondina okushininga oku iyutha keuvathano lyandje,nando ongaaka otandi kala aluhe noku pandula ombepo yeni,” osho a gwedhako.

“Omwa taamba ndje noku pandje ompito opo ndi ulike shoka tandi vulu okuningapo molupe kehe. Ongundu yuuteknika oya longele ndje oshindji shoka itaandi vulu okuhokolola, otandi kala aluhe noku mu pandula na onda hala okuya ndi mu talelepo monakuyiwa.”

Okwa shongo aadhani ooyakwawo opo ya dhane nokusindana oliha ndjika lwotango konima yomimvo 19, oku yi sindana okusimaneka oshigwana sha Obuasi.

“Onda hala okugalukila huka pehulilo lyethimbo lyuudhano okuya ndi tale nkene tamu yelutha ekopi lyoliha ndjika, opo mu shi ninge osha pumbwa okulonga nuudhiginini. Osha pumbwa wo elongelokumwe  mokati keni . Onkene dhaneni neitulemo na otamu ka pita kombanda yomaudhigu ogendji ngoka mwali inaamu tegelela.

Shitembi okwa li a dhana uudhano we wa hugunina pethimbo AshGold ya li ya dhana shi thike pamwe okoola 1-1 nospana ya Hearts of Oak etitatu lyayi pokapale ka Len Clay Sports Stadium.

Monkundana yilwe yuudhano wetanga lyokoompadhi moSouth Africa aadhanitanga aaNamibia, Max Mbaeva, Chris Katjuukua na Deon Hotto oya kwathele ospana yawo moLamontville Golden Arrows okuninga enyakwa moliha yoNational First Division mehuliloshiwike sho ya li ya dhana okoola 1-1 nospana Cape Town All Stars. Iizemo mbika oya eta mpoka kutya Arrows ota shuna koliha yopombanda omumvo guudhano ta guya.

Caption: Shitembi action jpg –

Pomathimbo omawanawa … Omudhani gwa Namibia gwopaigwana  Petrus Shitembi mombindja oshunga ta dhanene ospana ye AshGold moliha yopombanda yaGhana.

 

LEAVE A REPLY

Please enter your comment!
Please enter your name here