Emono FC olyo tali tjakaleke mOkatana 

0
211

UUKWANGULA-Emono FC olyo enyakwa lyuudhano 2015 waanyasha yokohi yomimvo 19 woshikandjohogololo shaKatana mboka hawu unganekwa komusimanekwa, Rosalia Shilenga, kansela gwoshitopolwahogololo shoka.

Emono olya li lya dhengemo osipana yoKaku FC muudhano wedhingoloko lyahugunina mboka wali wa dhanenwa pokapale kUukwangula Sport Stadium Osoondaha yaziko.

Osipana Emono FC oya li ya toolapo ekopi lya Kansela, okapandi ko N$ 500, oombandi dhoshingoli, netanga.

Okaku FC hoka kali keya pehala etiyali okali ka toolapo okapandi ko N$ 300,oombandi dhoshisiliveli netanga.

Osipana yuukadhona yEmono oyo yasindanapo uudhano wokatanga komokambamba moka nayo yali yambendekwa ekopi, okapandi ko N$ 300, etanga noombandi dhoshingoli.

Eino Panduleni oye omudhani dhingi, omanga Sem Shavuka oye  a tulamo ookoola odhindji muudhano auhe sho  a tulamo oshipandi shookoola 8.

Iileni Kuume oye omuhikihiya dhingi, omanga Elago Wilikies oye omudheuli dhingi muudhano mbuka wOkatana Constituency Youth Tournament.

Uudhano mbuka waanyasha ohawu kalako omumvo kehe, noshikando shika oshali oshitine, Omusimanekwa Rosalia Shilenga oye omukwashilipaleke guudhano mbuka.

Sho ali ta popitha aadhani pamwe nengathithi ndyoka lyali puudhano mbuka kansela Shilenga  okwa ti , oha unganeke uudhano mbuka pethimbo lyefudho lyosikola opo aagundjuka yomoshitopolwa hogololo she ya kale yi ipyakidhila niinima mbyoka tayi tungu.

Okwa ti ndjika oyili wo ompito ombwaanawa oku kala pamwe naanyasha ye a tseye nokuuva omikundu dhe ya kundukidha, nokumuna iitalenti mokati kaanyanyamagulu.

Okwa indile wo oosipana dhomoshitopolwa opo dhi tale ngele otadhi longitha yamwe yomaadhani yotonamende ndjika okunkondopaleka oosipana dhawo.

Kansela okwali a kwashilipaleke uudhano mbuka nomakopi, oombandi, iikulya yaadhani naatali, nofuto yokapale.

Tatekulu Tarah Ithete mwene gomukunda Uukwangula okwali a gandja ondumetana ndjoka yali ya liwa oshali ku kehe ngoka ali eya kuudhano mbuka.

Aron Shikongo okwali a gandja ootenda dhomuzile omanga Natangwe Mungungu a li a kwashilipaleke uudhano mbuka nomambako.

LEAVE A REPLY

Please enter your comment!
Please enter your name here