Inatu longitheni iimaliwa melongo lyaana oshilonga

0
255

Pomapandja gamwe moshifonkundana shika omuna ehokololo lyaantu haya yi kosikola ndjoka anuwa ta yi ya longo ontseyo yuupangi nenge ndjoka tayi ti yo osikola yokulonga uupangi.Ndele  osikola ndjoka inayi shangithwa nolutu lwokuwilika iiputudhilo nenge Namibia Qualification Authority ishewe ndjika kayi shiwike kolutu lu na sha nomadheulo lwaNamibia nenge Namibia Training Authority.  Ihe osikola ndjika yi na edhina tali ngelengendja nawa kokutya University of Technological Sciences (UNITECS) oyi na aalongwa haya futu ofuto komwedhi opo ya vule oku kala muyo. Oshikwawo enongelo ndika anuwa olya pititha sigo oompaka aalongwa ya pewa oonzapo yeli 1 000 mboka sigo onena taya ende momapandaanda giilando taya kongo iilonga.

Aagundjuka noshigwana inamu kala nokahalu kutya ngaaka otamu longitha iimaliwa yeni mweyi longa nuudhigu okufutila oosikola inaadhi ukilila nenge ndhoka dha pya ondombo.

Oshike shapuka tashi longwa koshiputudhilo shika.Oshiputudhilo shika itashi fundju ashike oshigwana ndele otashi yugu aantu puuyelele. Otashi yugu noku kotokela aalongwa okutopoka niimaliwa yawo. Aantu mboka ye li mompumbwe onene ohaya longitha oondunge dhopampumbwe opo ya vule oku ikongela onkalamwenyo ohwepo. Taya kotokele mboka wo yaa wete kutya naya ninge ngiini, sho oshinima shika inashi pumbwa oku kumikwa nenge okuhumithwa komeho.

Otashi halutha kutya omukokoli gwosikola ndjika Polykarp Ameya ota yukipalitha iilonga ye yokuyuga  sho a lombwele omutoolinkundana gwetu a ti “ Mo Namibia kamuna oveta ndjoka tayi indike  aakwashigwana ya leshe  omishangwa dhopauteknologie.Tse otatu lesha ashike omambo”.

Ashihe otashi ka kala nawa ngele elalakano lya UNITECS oku kumika omukalondjigilile gwoku lesha omambo osho wo okukonga uunongo nontseyo momambo.Eeno onkambadhala ndjika otayi pandulwa.Ndele nee aantu ina ya yugwa iimaliwa yawo ye yi longa nuudhigu opo ashike ya kale mosikola yokulesha omambo. Moshigwana omuna oongulu mambo dha tungwa nelalakano ndyoka.

Shimwe ooshika kutya oshiputudhilo shika oshafa tashi gandja etegameno lyiifundja nolyaana omukanka gwasha kaalongwa mboka ha ya yi kosikola mpoka. Aantu ohaya yi komanongelo gopombanda netegameno lyoku ka mona  iilonga nenge oku imonena eithano konima yokumanitha eilongo lyawo.Ngele oshiputudhilo shika inashi shangithwa  nomalutu omawiliki melongo gomondjila nena otashi ti oonzapo oshowo oodiploma ndhoka tashi gandja kaalongwa yasho kadhina ongushu yasha , odho ashike oombapila dhaana ongushu yasha.

Oshikwawo iipumbiwa yini yopevi yina okugwanithwapo opo omulongwa a vule okushangithwa menongelo ndika? Okwi ilongela uupangi nuuvalithi osha pumbwa omukanka  gwelongo gwa kola montseyo yonkalamwenyo nenge Biology, Ophisika noChemistry. Aapangi naavalithi ohaya sile aantu oshimpwiyu, ohaya longo noomwenyo dhaantu.Onkene oshiputudhilo hashi gandja ootundi dhaaniilonga, ngaa mbaka osha pumbwa okukala tashi talelwa omathimbo ogendji oku kwashilipaleka kutya elongo ndyoka tashi gandja olyo ngushu yolela.

Oshiputudhilo shoshene osha pumbwa okuya puuyelele  nokugandja efatululo kombinga yiinakugwanithwa yasho oshowo oludhi lwelongo ndyoka shika hashi gandja kaakwashigwana.

LEAVE A REPLY

Please enter your comment!
Please enter your name here