A longwa okupanga niihemba mondjodhi

0
305

OSHIGAMBO-Omukulukadhi gwomimvo 64  gwomoshikandjohogololo shaNayena okuli omuuliki nomulongithi omunawino gwomiti dha za miimeno, ndhoka a ti okwa ulukilwa mondjodhi.

Helena Shifeleni ngoka eshiwike nawa nokuuministeli wuuhaku okwali a popi peegululo lyoshikunino shomiti dhaza miimeno poshipangelo Onandjokwe  Etiyali oshiwike shika mpoka woo a gandja iimeni yin a ongushu yuunamiti yi tsikwe opo yi vule oku ningwa omiti ndhoka tadhi vulu oku kwathela momikithi odhindji.

Shifeleni omukalimo gwomoNayena okuna ontseyo yokulongitha iimbondi niimeno yilwe okupanga omikithi dhi ili mwa kwatelwa woo elelepeko lyonkalamwenyo kwaamboka taya  lumbu nombuto yo HIV.

Oshikunino shika osha egululwa nelalakano lyokutsika omiti  niigwanga mbyoka ya kala nokulongithwa kaakulu yonale moku aludha omikithi dhi ili nodhi ili omanga ka kwali kuna iipangelo yopashinanena.

Oshikunino shika oshali sha egululwa meni lyoshipangelo shaNandjokwe popepi nongulumpungulilo ndjoka  ya siikilila iitholomwathano yomiti ndhoka dhali hadhi longitha kaakulu yonale ndjoka yishiwike nawa nedhina Museum .

Omeseum ndjika oyo nee ya pungula uuyelele awuhe wuunamiti wopashinanena sho wa ende tawu lunduluka konima yoomvula odhindji dhindji omanga oshilongo inaashi manguluka.

Moshikunino nee muka omuna omiti dhiihemba dhi vulithe pomilongo ne nane ndhoka dhali dha kongwa kuShefeleni ngoka oye omunawino nomunuunongo monooli melongitho lyomiti dhopaushitwe.

Shefeleni okwati kutya ye iimbondi mbyoka ote yi tumbaleke oshoka oye mukwathela oku lelepeka onkalamwenyo yomwana gwosheeli ngoka ena oHIV, eyi monika nookuli omanga omiti dhoshinanena dhokulelepeka onkalamwenyo dha li itaadhi vulika kaantu oyendji.

“ Ngashingeyi okanona kandje okeli monkalo yili nawa no ke li   kepango ndyoka katameka momumvo 2010. Ihe okali ka lalekwa mo moshipangelo moka keye ashike kegumbo oshoka okali keli mokashona. Konima sho ndeka pe iimbondi oka kala nawa sigo omiti otadhi monika,” ati ngaaka.

Okwa ti ye okwa kwathela woo oomeme  yena ombuto ya mone uunona kaa wu na ombuto sho ashike eyape iimbondi.

Shefeleni okwa ti omikithi ndhoka ta vulu woo okutothamo dha aludhwa kiimbondi ongaashi oonkwengu, oluvalo ano oomeme ihaya mono uunona, oshintona, oshipwila, okankela yomela nomothingo noshowo omikithi dhoshipa.

Okwa ti sho ali ena oomvula ntano okwali a uvu ewi tali mu lombwele mondjodhi kutya omaludhi giimbondi ogeni na ohaga panga uuvu woludhi luni.

Omukulupe nguka okwati kutya ye keshi onganga ye iha anekele ngaashi oonganga ashike okwali a ulukilwa iimbondi mbyoka oyo ha longitha inaamu gwedhwa nando osha.

“ Ngaye oku anekela kandi kushi ohandi tala ashike nomesho inandi ninga omuntu sha, iimbondi ihayi longo kumwe nuulodhi,’ omukulupe ati ngaaka.

Amushanga melelo lyoMeseum monandjokwe  Benedict Mwahamubi okwa koleke kutya iihemba mbyoka tayi longithwa ku Shefeleni oya lolwa na natango oyili pomuthika gwomalolelo.

“ Otwa hala tango tumone aantu mboka taya vulu okulonga omiti ndhoka opo  tumone uuwanawa womiti ndhoka,”:Mwahamubi ati ngaaka.

Okwati kutya yo oyena elongelo kumwe ewanawa naanamukunda na oya inekela woo anamukunda.

Eegululo ndika olyali lya kwashilipalekwa nee kOmukalelipo shilongo shaFinland Anne Salorantha ngoka a kumagidha aaNandjokwe ya dhiginine iihemba mbika oshoka oyina oshilonga oshinene.

“ Oshikunino shika otashi ulike elongelo kumwe pokati koondohotola dhopashinanena noondohotola dhopamuthigululwakalo nomiti ndhika nadhi silwe oshimpwiyu,”Salorantha ati ngaaka.

LEAVE A REPLY

Please enter your comment!
Please enter your name here