Aanyasha ya kundathana ombili muAfrica

0
299

WINDHOEK-Aanyasha okuziilila menenevi lyaAfrica, osho ya longekidha oshituthi shawo oshi-70 moVenduka, okukundathana nkene taya kalekepo ombili yaaluhe muAfrika.

Moshituthi shika omwali woo mwa kwatelwa oshigongi shoka sha li shaningwa ongulohi yEtiyali oshiwike shika, sha dhenge unene omuthindo mokukonga ondunge mokulongitha oonzo dhenenevi ndika okuli yambula po tango.

Oya kundathana kombinga yekondjelo lyevi okuza nale oshowo ngashingeyi, neinyengo lya manguluka monale nomongashingeyi menevi lyaAfrica.

Oshigongi shika osha li sha kwatelwa komeho komuMinisteli Nale yEgameno  Omusimanekwa Nahas Angula, Henny Seibeb osho woo Zemihret Yohannes, mboka yali ya gandja ontseyo yawo kombinga yomashongo ngoka.

Aanyasha mboka yali moshigongi shika oya gandja iintsa yawo, nuudhigu wawo mboka yataalela. Euvo nayi limwe lyahololwa kaanyasha ongaashi uudhigu mboka wuli moNamibia, wEvi tali kondjelwa kaanyasha mboka ya ti kayena omahala gokuza noyafa natango yeli muukoloni.

Aanyasha oya dhenge omuthindo kutya  sigo oompaka moNamibia evi olili ashike kaakwiilongo mboka yamwe po kaayemo nokuli nomoshilongo, ya ninga oofaalama dhawo omanga aaNamibia taya mono iihuna.

Omusimanekwa Nahas Angula okwali woo atsu kumwe naanyasha molwa onkalo ndjika tayi limbilike yo tayi etitha ohenda ngele tashiya maanyasha, nokwe ya kumagidha kaaya ikuthile nando oveta yawo yene, yo ya ithane epangelo opo yatale kutya ompumbwe yevi otaye yi kandula po ngiini.

Angula okwa ti ngele aanyasha oya uvathana shili okukondjela evi, na ye shininge, shampa ashike ta ya longitha omukalo omuwaanawa, yo yakonge ondunge moshinima shika eta ya pulakenwa.

“Opuna omalimbililo momitima dhaanyasha kutya aakondjelimanguluko noonakulwa aakulu inaya kondjela oshilongo ashihe ngaashi ha ya ti, ashike oyali taya iningile yo yene,  aanyasha mbaka itandi yape nando ondjo, ashike ngele owuna oshinakugwanithwa muna okushininga, ngaashi ekondjelo lyevi, shituleni poshitaafula eta mu tala nkene muna oku shi tula ponkatu mpoka tashi vulu kuya miilonga,” Angula tati ngaaka.

Angula okwa gwedha po ishewe tati opuna iinima oyindji ya ningwa kaakondjeli manguluko ihe mbika ka yi wetike kaanyasha yopaife.

Seibeb okwa gandja ishewe oshiholelwa nkene evi lya li tali kondjelwa nale, nokwa holola euvo nayi lye nokutya evi olya thikama po ashike koshimaliwa, oonkondo nosho tuu emanguluko. “Kaapuna evi, kapena okupopya , okukala wuna evi mongashingeyi oshinima shina ondilo noonkondo na itashi vulika ku kehe gumwe, unene ku mboka ihaa ya longo. Naashika otuna okukondjela opo kehe gumwe a kale ena evi,” Seibeb tati ngaaka

Kakele ashike kevi, moshigongi shika omwali ishewe mwa popiwa nkene oonzo dhAfrika dhina okuyambulapo Afrika. Yohanes okwa li apopi kutya oonzo dhevi ndhoka dhili moAfrica ngaashi uuwe, oongopolo, omahooli, omeya nosho tuu iikwawo inaayi tumbulwa oya gwana okuyambula po Africa alihe.

Okwa kumike aakwashigwana opo yi ipule okulongitha olusheno lwoketango.

Okwa shongo aanyasha opo ya kongepo ishewe ondunge yimwe ya tale kutya Africa otaye li yambula po ngiini nuunongo wawo.

LEAVE A REPLY

Please enter your comment!
Please enter your name here