A indile epangelo li gwedhele oshimpungu shomaudhano

0
179

OKATANA-Omunashipundi gwewawa lyaagundjuka mOshana Ephraim Nekongo okwa hala epangelo opo li gwedhele omutengenekwa faneko gwomaudhano moshilongo opo ku adhikwe esindano momaudhano.

Ephraim okwa li a ningi eindilo ndika pethimbo ali ta popitha aanyasha yomoshikandjohogololo shaKatana mboka yali ya kutha ombinga muudhano waKansela Rosalia Shilenga.

Ephraim okwa ti omaudhano otaga liwa oshipungo pethimbo lyongashiingeyi na oga fa kaagemo moompangela dhiitopolwa dhehumo komeho.

Okwa ti epangelo opamwe nomahangano gopaumwene oya pumbwa okutala ependulepo lyomaudhano nomeho omanene, opo ku monike ekandulepo lyeshongo ndika omanga inaaku toka.

Okwa ti omaudhano ogena oonkondo okulundulula oonkalomwenyo dhaantu, nogeli osheenditho tashi vulu oku eta iiyemo mokati kaagundjuka naamboka haya kuthombinga mugo.

“Ngele iikwa maudhano oya kwatwa nawa, nena ota yi vulu oku kandulapo eshongo lyokwaahena iilonga ndyoka lya taalela oshilongo shetu pethimbo lyongashingeyi”, Ephraim ta ti.

Ephraim ta endulula a ti“Onkene otandi indile epangelo lyetu opo li dhikepo omahala gomaudhano geli pamuthika gopashinanena moshilongo unene tu komikunda opo tunkondopaleke aagundjuka yetu pamawudhano”.

Okwa indile aagundjuka opo ya longithe oompito ngaashi ndhika ya pewa komusimanekwa Rosalia Shilenga nuukeka opo ya yambulepo omuthika gwomaudhano gawo noku ulika iipewa yawo.

Okwe ya pe etumuambwile kutya okwi inekela kutya epangelo otali ka tala ompumbwe yaanyasha ngele otashiya kiikwamaudhano naashika ngele osha ningwa nena aanyasha naya kale ye na eitulemo lya kwata miiti oshoka oshiwaanawa iha shi zi pokapala kayela.

Okwa indile wo aanangeshefa opo ya tule oshimaliwa momaudhano ya kwathele epangelo kombinga yimwe.

LEAVE A REPLY

Please enter your comment!
Please enter your name here