JS Academy ya ningi oshitopolwa shoTura Magic 

0
195

WINDHOEK – Ospana hayi dhana moliha yopombanda yaMTC oTura Magic oya taamba osikola yedhina JS Academy ndjoka hayi dheula aadhanitanga aakiintu.

Etaambelemo lyoJS Academy ndjoka ya dhikwa po komudheuli gwospana yaakadhona yetanga lyokoompadhi yopashigwana olya ningwa konima yoonkundathana dhuule  woomwedhi odhindji. Oonkundathana ndhika odha ningwa okutala omukalo omwaanawa ngoka tagu longithwa okutula mumwe ooklaba ndhika mbali opo dhi tholome po ongundu yimwe onankondo mokudheula aagundjuka ya ninge omanyakwa metanga lyokoompadhi.

Omolwa ehengumukilo mumwe ndika lyoJS Academy mewiliko lyaJacqui Shipanga, ospana ndjika otayi kala ya tseyika ngashingeyi ongo Tura Magic Ladies na otayi tsikile nokudhana etanga lyokoompadhi moliha yedhina Women’s Super League.

Tura Magic Ladies ota kala natango newiliko lye lili ngaashi lya kala kohi yo JS Academy, newiliko ndika otali kala noku gandja olopota yalyo kewilikongundu lyaTura Magic, ndyoka nagshingeyi hali talele noku siloshimpwiyu ospana yaalumentu oshowo enongelo lyokudheula aadhani aagundjuka okudhana etanga lyokoompadhi.

Omathaneko opo geli oku etapo oshitopolwa shoku dheula aakadhona  mosikola yokudheula aadhanitanga. Omathaneko ngaka otaga tsu kumwe nelalakano lyoklaba okugandja oompito dhi thike pamwe kaamati nokaakadhona opo yi ilonge okuthanga etanga lyokoompadhi moshinima shoku humitha komeho uudhano wetanga lyokoompadhi mokati kaagundjuka.

Omunashipundi gwaTura Magic ,Peter Nakurua okwa ti etokolo  okudheula aamati naakadhona olya pumbiwa oku uvikako momwiityo gwokuhumithakomeho uudhano wetanga lyokoompadhi pomuthika  gwo pashigwana.

“Otwa nyanyudhwa kosheetwapo shika oshoka otwi itaala kutya otashi keeta iinima iiwanawa mospana ndjika oshowo kuudhano wetanga lyokoompadhi moshilongo.Opena omipopyo odhindji ndhoka hadhi ti kapena eyokomeho li wetike muudhano wetanga lyokoompadhi, onkene tse otwa mono kutya otuna okulonga po oshishona  okutulapo omukanka gweyokomeho muudhano mbuka,’ osho Nakurua a ti.

Monakuyiwa shampa ayihe tayi ende nawa ospana ndjika oyi na edhiladhilo okudhikapo omakwatathano nuudhano wonetball, volleyball oshowo mboka wokumatuka noospana dhomaudhano goludhi nduka moKatutura okutulapo omuhingo gwoku koka.

Pahapu dha Nakurua, okudhikapo omakwatathano ngaka otashi pe ospana ompito oku imonena iilyo momwaalu ogundji  opo ospana yi kale aluhe yi iwetikile oshowo oku imonena iiyemo okuza miilyo  nomaa yambidhidhi yayo.

“Oshi shiwike nawa kutya opena oospana oonkulu moNamibia nomoKatutura wo moka tse tu li,”Okwa gwedhako a ti  oospana ndhika odhina aayambidhidhi mboka ihaaya zimo mudho no ya kala noku dhi yambidhidha omimvo odhindji.

“Onkene oshidhigu oku hilako aayambidhidhi mbaka okuza koospana ndhoka, onkene osha simana opo tse tu longithe omikalo dhi ili opo ospana yetu yi imonene aalanduli yi itula mospana ndjika.

Okwa ti ashike opo omuntu wu sindane ino pumbwa okukutha ondjila ofupi , na opo wu adhe omalalakano goye owa pumbwa okulonga noonkondo oshowo nuudhiginini okuza kewiliko oshowo kaadhani mospana.

Kombinga ye omukokoli gwa JS Academy, Jacqui Shipanga, okwa ti:  “Etompelo okujoina Tura Magic, oshoka tse otuna euveko nuufilosofi wumwe kombinga yokuhumitha komeho aagundjuka. Elalakano olyo okugandja oompito kaamati naakadhona okukoka muudhano wetanga lyokoompadhi pehala lyoku tala ashike kaadhani mboka konyala ya pyokoka nale no ye na owino mokudhana uudhano mbuka,”

 

LEAVE A REPLY

Please enter your comment!
Please enter your name here