Kilimanjaro ta longekidha uudhano woongonyo moNooli

0
168

OSHAKATI-Aakalimo yomOshakati niitopolwa yopopepi otaya ka nyanyudhwa kongundu yoKilimandjaro Boxing Club okupitila muudhano woongonyo moshitopolwa mboka ta wu ka kwata konyala omwedhi.

Sho ali ta popitha iikundaneki pendiki lyaanyasha mOshakati, Ikolelela Ekandjo ngoka oye eli  omukwatakanithi guudhano mbuka okupitila mongeshefa yo Blessing Infotainments  okwa ti uudhano mbuka ota wu ka tameka mo 01 sigo 30 August 2015 pokapale kEmanguluko mOshakati.

Ta tsikileko ta ti edhingoloko etiyali sigo olya hugunina ota li ka dhanenwa moshinyanga shendiki lyaanyasha mOshakati.

“Aabokisi mboka taya ka kanitha uudhano medhingoloko kehe ota ya ka shuna komagumbo naamboka taya ka sindana momadhingoloko kehe oya tegelewa ya ka tsikile nuudhano”, Ekandjo ta ti.

Ekandjo okwa ti uudhano mbuka owa egulukila aadhengi- ngonyo ayehe yeli kohi yoshiviha shookilograma 60 na ita ya ka pulwa nando epeni lyasha oku kuthombinga.

Aadhengingonyo ayehe ota ya ka pewa omulalo momuhandjo gwendiki lyaanyasha mOshakati na ota ya ka pewa wo iikulya ko kangundulongekidhi.

Joseph Benhard mwene goKalaba yo Kilimandjaro ndjoka oyo ya kwatela komeho uudhano mbuka okwa ti ndjika oyo ompito ombwaanawa kaadhengingonyo mboka ihaya mono ompito yoku ulika iitalenti yawo opo ye yi longithe.

Okwa ti momukokomoko guudhano mbuka, aadhengi ngonyo oya tegelelelwa ya ka ulike omaihumbato ta ga hokitha oshoka ita ku ka idhidhimikilwa nande omaihumbato omawiinayi.

Uudhano mbuka owa kwashilipalekwa kongeshefa yo Ndahafa Cash Loan, moka omusindani gotango taka yambulapo okapandi ko N$ 5000 ekopi nombandi yoshingoli, omutiyali N$ 3000 nombandi yoshisiliveli, omanga ngoka te ke ya pehala etitatu ota ka mona N$ 2000 nombandi yoshikushu.

Okalaba kehe tayi ka eta aadhani nayo woo ota yi ka pewa olupandu lwoodola N$ 200, okwi ikwathela miinyangadhalwa yawo. Uudhano mbuka otawu ka ithanwa King Mandume Ndemufayo Boxing Championship na owuli wa mangulukila omuNamibia kehe.

LEAVE A REPLY

Please enter your comment!
Please enter your name here