Meekulu Penina a pandula ewedelo lopendjela yovakulupe

0
210

Lüderitz- Meekulu Penina Uushini-Tadeus omukalimo womoJakkalssdraai mo Lüderitz moshitopolwa sha //Kharas, okwa pandula unene epangelo eshi la udaneka okuwedela opendjela yovakulupe, okudja poN$600, komwedi, okuya poN$1000, komwedi.

“Ovakulupe paife ohatuka mona eyovi lapata, komwedi keshe, omunhu to dulu tuu okuli landela nomaadi edimba liwa, ove to lande mo ngaa nokakumbafa koye shaashi ovakulupe ohatu tila outalala,” Meekulu Penina osho a tumbula nelimemesho.

Omukulupe pu okwa ti oshihafifa unene eshi epangelo laNamibia tali twikile nokufila oshisho ovakulupe moshilongo. Ta kumaida ovakulupe vakwao opo va kwate nawa oshimaliwa osho tava pewa kepangelo, moku landa eemhumbwe davo na unene tuu oikulya, opo va palule omalutu avo voo va kale vena oukolele. Okwa kunghilila ovakulupe vaha longife nande oimaliwa yavo mokulanda omalodu, ta ti “omalodu ka ena apa ta eku twala shapo ota eku hanauna po ashike.”

Meekulu Penina okwa tumbula kutya otashi ka kala ohoni yakula ngee omuPresidente woshilongolo okwa ka talela po vamwepo vomovakulupe moshilongo, ndele ta hange ve li monghalo ihena oukoshoki. “Omunhu owa pumbwa ngaho to li landele ofewa nokukosha oikutu noikumbafa yoye. ON$1000, oimaliwa ihapu shili, eyovi lapata!” Meekulu Penina osho a tumbula.

Omunamido 67 nokuli odalele yomoLüderitz, okwa indila aveshe ovo hava mono oshikuvila shepangelo oshoyo ovo ovayambididi vaavo vakulupa neenghono va longife nawa oshimaliwa osho ha shiyandjwa kepangelo, opo shidule oku va kwafela meenghalamwenyo davo.

LEAVE A REPLY

Please enter your comment!
Please enter your name here